.jpg)
រថយន្តកុងតឺន័រដឹកទំនិញបើកឆ្លងកាត់ខណ្ឌពោធិ៍សែនជ័យ នាពេលកន្លងទៅ។ ហេង ជីវ័ន
ភ្នំពេញៈ ក្រុមអ្នកនៅក្នុងវិស័យដឹកជញ្ជូន និងអ្នកនាំចេញបានអះអាងថា ការកើនឡើងជាបន្តបន្ទាប់នៃតម្លៃប្រេងឥន្ធនៈលើទីផ្សារអន្តរជាតិ ជាពិសេសវិបត្តិនៃការផ្គត់ផ្គង់ប្រេងដែលបណ្តាលមកពីសង្គ្រាមឈ្លានពានរបស់រុស្ស៊ីទៅក្នុងប្រទេសអ៊ុយក្រែនបានជំរុញឱ្យតម្លៃដឹកជញ្ជូននៅកម្ពុជាកើនឡើងប្រមាណពី ១៥-២០ ភាគរយបើធៀបនឹងខែមេសា កន្លងមក។ ការណ៍នេះកំពុងយាយីដល់ការកើនឡើងថ្លៃដើមផលិតកម្មនៅកម្ពុជា។
ការងើបឡើងវិញនៃកំណើនសេដ្ឋកិច្ចសកលពីវិបត្តិជំងឺកូវីដ ១៩ ដែលជំរុញឱ្យមានតម្រូវការប្រេងឥន្ធនៈក្នុងបរិមាណច្រើន ស្របពេលការផ្គត់ផ្គង់ធ្លាក់ចុះ (វិបត្តិនៅអ៊ុយក្រែន) បានធ្វើឱ្យតម្លៃប្រេងនៅកម្ពុជាកើនឡើងជាបន្តបន្ទាប់។
សេចក្តីប្រកាសព័ត៌មានរបស់ក្រសួងពាណិជ្ជកម្ម កាលពីថ្ងៃទី ២៣ ខែឧសភា ឱ្យដឹងថា ផ្អែកតាមតម្លៃប្រេងឆៅនៅលើទីផ្សារអន្តរជាតិ តម្លៃលក់រាយប្រេងឥន្ធនៈនៅកម្ពុជាចាប់ពីថ្ងៃទី ២១-៣១ ខែឧសភា ឆ្នាំ ២០២២ គឺសាំងធម្មតា ត្រូវលក់តម្លៃ ៥ ៦០០ រៀលក្នុង ១ លីត្រ និងប្រេងម៉ាស៊ូត តម្លៃ ៥៤០០ រៀល។ កាលពីថ្ងៃទី ១ ខែមករា ឆ្នាំ ២០២២ សាំងធម្មតា មានតម្លៃ ៤ ២០០ រៀល និងម៉ាស៊ូត តម្លៃ ៣ ៨០០ រៀល។
ប្រធានសមាគមភ័ស្តុភារកម្មកម្ពុជា លោក ស៊ិន ចន្ធី បានប្រាប់ ភ្នំពេញ ប៉ុស្តិ៍ ក្នុងថ្ងៃទី ២៣ ខែឧសភាថា ការកើនឡើងនៃតម្លៃប្រេងឥន្ធនៈ រួមទាំងប្រភពថាមពល កំពុងធ្វើឱ្យមានផលប៉ះពាល់ដល់គ្រប់ចង្វាក់ផលិតកម្ម ដោយចាប់តាំងពីថ្លៃដើមផលិត រហូតដល់ការដឹកជញ្ជូនផលិតផលសម្រេច។ សម្រាប់តម្លៃដឹកជញ្ជូននៅកម្ពុជាគឺទើបចាប់ផ្តើមកើនឡើងកាលពីខែមេសា ខណៈតម្លៃប្រេងឥន្ធនៈលើទីផ្សារអន្តរជាតិ បានហក់ឡើងជាបន្តបន្ទាប់ ក្រោយពីការចូលលុកលុយរបស់កងយោធារុស្ស៊ី នៅក្នុងប្រទេសអ៊ុយក្រែនកាលពីខែកុម្ភៈ។
លោកនិយាយថា៖ «តម្លៃដឹកជញ្ជូនទំនិញនៅក្នុងក្របខ័ណ្ឌទូទាំងប្រទេសពេលនេះបានកើនឡើងក្នុងរង្វង់ពី ១៥-២០ ភាគរយចាប់ពីខែមេសាមក ប៉ុន្តែសម្រាប់តម្លៃដឹកជញ្ជូនជាអន្តរជាតិ គឺឡើងតាំងពីពាក់កណ្តាលឆ្នាំ ២០២០ ដែលជាអំឡុងពេលកូវីដ ១៩ រីករាលដាលខ្លាំងមកម្ល៉េះ»។
ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់កម្ពុជា លោក ជា ចាន់ដារ៉ា បានប្រាប់ថា ចាប់តាំងពីស្ថានភាពការឆ្លងរាលដាលជំងឺកូវីដ ១៩ នៅលើពិភពលោកមានភាពធូរស្រាល តម្លៃប្រេងបានកើនឡើងជាបន្តបន្ទាប់ គ្រាន់តែការហក់ឡើងខ្ពស់ គឺចាប់ផ្តើមពីពេលមានវិបត្តិសង្គ្រាមនៅប្រទេសអ៊ុយក្រែន។ សម្រាប់វិស័យដឹកជញ្ជូននៅកម្ពុជា តម្លៃទើបចាប់ផ្តើមឡើងកាលពីខែមេសា មកព្រោះក្រុមហ៊ុនដឹកជញ្ជូនមិនអាចទ្រទ្រង់ការខាតបង់ដែលបណ្តាលមកពីការកើនឡើងតម្លៃប្រេងឥន្ធនៈបាន។
លោកប្រាប់ថា៖ «ទោះបីការដឹកជញ្ជូនក្នុងស្រុកបានឡើងតម្លៃមួយចំនួនក៏ដោយ ក៏ប្រាក់ចំណេញនៅមិនទាន់មានទេ គឺបានត្រឹមតែរួចខ្លួនប៉ុណ្ណោះ»។
ប្រធានសហព័ន្ធស្រូវអង្ករកម្ពុជា លោក សុង សារ៉ន បានប្រាប់ថា ការកើនឡើងតម្លៃប្រេងឥន្ធនៈមិនទាន់មានអ្វីប៉ះពាល់ដល់វិស័យស្រូវអង្ករកម្ពុជាទេ ដោយសាររោងម៉ាស៊ីនកិនស្រូវសុទ្ធតែប្រើប្រាស់ភ្លើងអគ្គិសនី ហើយតម្លៃអគ្គិសនីក៏មិនមានការដំឡើងថ្លៃដែរ។ លោកបន្តថា ទោះយ៉ាងណាតម្លៃផលិតកម្មនៅលើការដាំដុះអាចមានផលប៉ះពាល់ខ្លះ ពិសេសលើតម្លៃឈ្នួល ការជួលគ្រឿងចក្រសម្រាប់ភ្ជួរ រាស់ និងច្រូតកាត់ ជាដើម។ ដោយឡែកសម្រាប់ថ្លៃប្រេងបូមទឹកក្នុងរដូវនេះ គឺមិនចោទជាបញ្ហាអ្វីទេ ដោយសារការធ្វើស្រូវវស្សា ភាគច្រើនបំផុតគឺប្រើប្រាស់ទឹកភ្លៀង។
លោកបន្តថា៖ «មកដល់ពេលនេះ តម្លៃដឹកជញ្ជូនក្នុងស្រុកគឺមានការប្រែប្រួលខ្លះ ដោយក្រុមហ៊ុនដឹកជញ្ជូនបានគិតតម្លៃប្រេងបន្ថែម (Fuel Charge) ២០ ភាគរយ ហើយតម្លៃដឹកជញ្ជូនអន្តរជាតិ គឺនៅដដែល ដោយសារតម្លៃដែលគាត់បានឡើងនោះគឺឡើងតាំងពីប្រេងមិនទាន់ឡើងថ្លៃមកម្ល៉េះ»។
ទាក់ទងនឹងការនាំចេញអង្ករទៅកាន់ទីផ្សារអន្តរជាតិលោក សារ៉ន បានប្រាប់ថា ជាទស្សនៈរបស់លោក គឺមិនមានអ្វីដែលបញ្ហាធំនោះឡើយដរាបណាបរិមាណប្រេងនៅមានការផ្គត់ផ្គង់លើទីផ្សារ ព្រោះប្រេងមានឥទ្ធិពលលើតម្លៃដើមផលិតកម្ម ដាំដុះតិចតួចបំផុត គឺប្រមាណ ១៣ ភាគរយសម្រាប់ស្រូវប្រាំង ហើយស្រូវវស្សា មិនមានការប្រើប្រាស់ប្រេងឥន្ធនៈសម្រាប់បូមទឹកនោះឡើយ៕ LA
វីដេអូ៖
