.jpg)
នាវាកំពុងដឹកកុងតឺន័រទំនិញ តាមដងទន្លេមេគង្គនាពេលកន្លងមក។ រូប រ៉ាស់ហឺម
ទីក្រុងដាវ៉ូសៈ រដ្ឋមន្ត្រីក្រសួងពាណិជ្ជកម្មកម្ពុជាបានជំរុញឱ្យមានភាពចាំបាច់នៃការលុបបំបាត់ និងកាត់បន្ថយរបាំងពាណិជ្ជកម្ម តាមរយៈយន្ដការនៃកិច្ចសម្រួលពាណិជ្ជកម្មក្នុងប្រទេស តំបន់ និងពិភពលោក ដែលជាមធ្យោបាយដ៏សំខាន់ ដើម្បីស្ដារសេដ្ឋកិច្ចឡើងវិញឱ្យបានឆាប់រហ័ស។
លោក ប៉ាន សូរស័ក្តិ ក្នុងកិច្ចពិភាក្សាក្រោមប្រធានបទ «ការដោះស្រាយបញ្ហារបាំងពាណិជ្ជកម្ម ដើម្បីការងើបឡើងវិញ» ដែលបានរៀបចំឡើងក្នុងកិច្ចប្រជុំប្រចាំឆ្នាំ ២០២២ របស់វេទិកាសេដ្ឋកិច្ចពិភពលោកនៅដាវ៉ូស-ក្លូស្ទ័រ ប្រទេសស្វ៊ីស កាលពីថ្ងៃទី ២៣ ខែឧសភា បានបញ្ជាក់ថា ការបើកចំហទីផ្សារសម្រាប់ពាណិជ្ជកម្ម និងផែនការសកម្មភាពដែលផ្ដោតលើការធ្វើឱ្យប្រសើរឡើងនូវការតភ្ជាប់សេដ្ឋកិច្ច និងពង្រឹងខ្សែចង្វាក់ផ្គត់ផ្គង់ពិភពលោក គឺមានភាពចាំបាច់ និងជាផ្នែកនៃអាទិភាពអាស៊ាន នៅក្នុងអំឡុងពេលដែលកម្ពុជាធ្វើជាប្រធានអាស៊ាន ២០២២ ស្របតាមមូលបទ «អាស៊ានរួមគ្នាធ្វើដោះស្រាយបញ្ហាប្រឈមទាំងអស់គ្នា»(ASEAN: Addressing Challen-ges Together)។
ជាមួយគ្នានេះលោកក៏បានលើកឡើងអំពីសកម្មភាពរបស់កម្ពុជាក្នុងការសម្រួលពាណិជ្ជកម្ម ដូចជា ក្របខ័ណ្ឌយុទ្ធសាស្ដ្រ និងកម្មវិធីស្ដារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ ១៩ តាមគន្លងប្រក្រតីថ្មីសម្រាប់ឆ្នាំ ២០២១-២០២២, វេទិការដ្ឋាភិបាល និងវិស័យឯកជន, ប្រព័ន្ធ ASYCUDA, ប្រព័ន្ធបញ្ជរតែមួយជាតិ (National Single Window) និងកំណែទម្រង់មួយចំនួន ដែលជួយពន្លឿនដល់ការបញ្ចេញទំ-និញតាមព្រំដែនសម្រាប់ទំនិញទូទៅ ក៏ដូចជាទំនិញ និងសម្ភារពេទ្យសំខាន់ៗ ក្នុងអំឡុងពេលវិបត្តិកូវីដ ១៩។
លោកថ្លែងថា៖ «កម្ពុជានៅតែបន្ដធ្វើឱ្យប្រសើរឡើងនូវប្រព័ន្ធទាំងនេះ និងបានលើកឡើងអំពីគម្រោង SeT4SME ជាមួយ Global Alliance ដើម្បីកិច្ចសម្រួលពាណិជ្ជកម្ម និងដើម្បីបង្កើត Electronic Advance Data ដ៏ពេញលេញមួយតាមរយៈការច្របាច់បញ្ចូលគ្នានៃប្រព័ន្ធ ASYCUDA និងប្រព័ន្ធប្រកាសពន្ធគយនៃប្រៃសណីយ៍កម្ពុជា»។
លោករដ្ឋមន្ត្រីក៏បានស្នើឱ្យមានការចាប់អារម្មណ៍ទៅលើបញ្ហាសម្រាប់ប្រទេសអភិវឌ្ឍន៍តិចតួចពាក់ព័ន្ធនឹងអនុលោមភាពនៃឯកសារតម្រូវសម្រាប់ការនាំចេញ ដូចជា «proof of non-manipulation» ឬវិញ្ញាបនបត្របញ្ជាក់ប្រភពដើម ដែលឯកសារតម្រូវទាំងនេះធ្វើឱ្យការចំណាយកើនឡើងសម្រាប់អ្នកនាំចេញទំនិញ ដូច្នេះឯកសារតម្រូវទាំងនេះគួរត្រូវបានលុបចោល និងជំនួសវិញដោយការបញ្ជាក់ប្រភពដើមដោយខ្លួនឯង។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មប្រាប់ភ្នំពេញប៉ុស្តិ៍នៅថ្ងៃទី ២៤ ខែឧសភាថា ការបើករបាំងពាណិជ្ជកម្មទាំងក្នុងតំបន់ និងពិភពលោក គឺដើម្បីធ្វើយ៉ាងណាឱ្យសេដ្ឋកិច្ចមានការរីកលូតលាស់ឱ្យបានឆាប់ នៅក្រោយពេលបញ្ហានៃជំងឺកូវីដ ១៩ មានភាពធូរស្បើយ។ ជាមួយគ្នានេះកម្ពុជាបានដាក់ចេញនូវគោលនយោបាយសំខាន់ៗ ដើម្បីដំណើរការសេដ្ឋកិច្ចឡើងវិញ។ ទោះយ៉ាងណាសង្គ្រាមរុស្ស៊ី និងអ៊ុយក្រែនក៏ជាបញ្ហាដែរ។
លោកបន្តថា អ្វីដែលលោករដ្ឋមន្ត្រីលើកឡើង និងផ្តល់អនុសាសន៍ក្នុងវេទិកាសេដ្ឋកិច្ចពិភពលោកនៅដាវ៉ូស-ក្លូស្ទ័រ ប្រទេសស្វ៊ីស គឺដើម្បីឱ្យដឹងថា កម្ពុជាដែលជាប្រទេសបន្សាំខ្លួនទៅនឹងវ៉ាក់សាំងល្អជាងគេ និងជាប្រទេសដែលទទួលបានការកោតសរសើរជាប្រទេសទី ២ ក្នុងការស្តារសេដ្ឋកិច្ចឡើងវិញបន្ទាប់ពីជំងឺកូវីដ ១៩ និងជាប្រទេសបើកចំហសេដ្ឋកិច្ចបានពេញលេញ ដែលអាចជាគំរូមួយសម្រាប់ប្រទេសដទៃទៀត»។
លោក ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាបានប្រាប់ថា បើនិយាយអំពីពាណិជ្ជកម្មអន្តរជាតិ បញ្ហារបាំងពាណិជ្ជកម្មផ្តោតជាសំខាន់ទៅលើពន្ធគយ ពន្ធត្រួតលើគ្នា ការងាររដ្ឋបាល និងការដឹកជញ្ជូនរួមជាមួយនឹងឧបសគ្គផ្សេងៗទៀត ដែលធ្វើឱ្យដំណើរការសេដ្ឋកិច្ច និងការធ្វើពាណិជ្ជកម្មមិនអាចដំណើរការបានលឿន ហើយដែលប្រទេសក្នុងតំបន់ និងពិភពលោកត្រូវតែស្វែងរកច្រកមួយសមរម្យ ដើម្បីជំរុញកំណើនសេដ្ឋកិច្ចអន្តរជាតិឡើងវិញ។
លោកថ្លែងថា៖ «បញ្ហានេះយើងទាំងអស់គ្នាដឹងហើយ វាជះឥទ្ធិពលអវិជ្ជមានច្រើនណាស់កន្លងមកនេះ វាមានបញ្ហារបាំងពាណិជ្ជកម្ម។ អ៊ីចឹង បានជារាជរដ្ឋាភិបាលកម្ពុជាខិតខំប្រឹងប្រែងដោះស្រាយ និងបង្កើតនូវច្បាប់វិនិយោគថ្មី បង្កើតតំបន់សេដ្ឋកិច្ចពិសេស និងសម្រួលដល់ការដឹកជញ្ជូនទំនិញក្នុងការទាក់ទាញវិនិយោគិនអន្តរជាតិ និងរុញកំណើនសេដ្ឋកិច្ចឱ្យមានសម្ទុះឡើងវិញ»៕ LA
