The Phnom Penh Post Search

Search form




Logo of Phnom Penh Post newspaper Phnom Penh Post - ការសាងសង់​អាកាសយានដ្ឋាន​អន្តរជាតិ​សៀមរាប​-​អង្គរ សម្រេច​បាន​ជាង ២៧%

ការសាងសង់​អាកាសយានដ្ឋាន​អន្តរជាតិ​សៀមរាប​-​អង្គរ សម្រេច​បាន​ជាង ២៧%

Content image - Phnom Penh Post
គម្រោងសាងសង់​អាកាសយានដ្ឋាន​អន្តរជាតិ​សៀមរាប​-​អង្គរ។ រូបថត Twitter

ការសាងសង់​អាកាសយានដ្ឋាន​អន្តរជាតិ​សៀមរាប​-​អង្គរ សម្រេច​បាន​ជាង ២៧%

ភ្នំពេញៈ ការសាងសង់​ហេដ្ឋារចនាសម្ព័ន្ធ​អាកាសយានដ្ឋាន​អន្តរជាតិ​សៀមរាប​-​អង្គរ កំពុង​ជួប​បញ្ហា​ប្រឈម​ខ្លះ ខណៈ​គម្រោង​សាងសង់​អាកាស​យានដ្ឋាន​ទាំងមូល​ទើប​សម្រេចបាន​ជាង ២៧ ​ភាគរយ​ប៉ុណ្ណោះ គិត​ត្រឹម​ខែឧសភា ឆ្នាំ​ ២០២២ នេះ​។

លោក ស៊ីន ចាន់សិរីវុត្ថា អ្នកនាំពាក្យ​រដ្ឋលេខាធិការដ្ឋាន​អាកាសចរ​ស៊ីវិល​បាន​ប្រាប់ ​ភ្នំពេញ ​ប៉ុស្តិ៍​ នៅ​ថ្ងៃទី​ ២៤ ខែឧសភា​ថា ការសាងសង់​អាកាសយានដ្ឋាន​អន្តរជាតិ​សៀមរាប​ថ្មី មាន​បញ្ហា​ប្រឈម​តិចតួច ដោយសារតែ​ការរីករាលដាល​ជំងឺ​កូវីដ​ ១៩ បានធ្វើឱ្យ​អ្នក​បច្ចេកទេស និង​អ្នកជំនាញការ​ក្រុមហ៊ុន​មានការ​លំបាក​នៅក្នុង​ការ​ធ្វើដំណើរ​ចេញ​-​ចូល មាន​ការ​លំបាក​នៅក្នុង​ខ្សែចង្វាក់​ផ្គត់ផ្គង់ និង​ភ័ស្តុភារកម្ម ការដឹកជញ្ជូន ការផ្គត់ផ្គង់​ឧបករណ៍​សម្ភារ​បរិក្ខារ ពេលវេលា និង​តម្លៃ​។​ល​។

លោក​បាន​បន្ថែមថា ថ្វីដ្បិតតែ​មាន​បញ្ហា​ប្រឈម​ខ្លះ​ក៏ពិតមែន ប៉ុន្តែ​ក្រុមហ៊ុន​សាងសង់​នៅ​មិនទាន់​បញ្ជាក់​ពី​ការពន្យារពេល​បញ្ចប់​ការសាងសង់ ឬ​ពន្យារពេល​ការបើក​ដំណើរការ​សាកល្បង​នៅឡើយ​ទេ​។

លោក​បាន​បញ្ជាក់ថា​៖ «​តាម​ការគ្រោងទុក​របស់​ក្រុមហ៊ុន គឺ​នឹង​បញ្ចប់​ការសាងសង់​នៅ​ថ្ងៃទី​ ៣០ ខែមីនា ឆ្នាំ​ ២០២៣ និង​ដំណើរការ​សាកល្បង ជា​លើកដំបូង​នៅ​ខែតុលា ឆ្នាំ​ ២០២៣​។ ក្នុងករណី​ដែលមាន​ការផ្លាស់ប្តូរ ក្រុមហ៊ុន​សាងសង់​នឹង​ជូនដំណឹង​មក​រដ្ឋលេខាធិការដ្ឋាន​អាកាសចរ​ស៊ីវិល ខណៈ​បច្ចុប្បន្ន​ការសាងសង់​នៅ​បន្ត​ជាធម្មតា គ្រាន់​តែមាន​បញ្ហា​តិចតួច​»​។

លោក ធួន ស៊ីណាន ប្រធាន​សមាគម​ទេសចរណ៍​អាស៊ី​ប៉ាស៊ីហ្វិក​កម្ពុជា បានឱ្យដឹង​ដែរ​ថា អាកាសយានដ្ឋាន​អន្តរជាតិ​សៀមរាប​-​អង្គរ អាច​នឹង​ក្លាយជា Hub Airport មួយ​នៅក្នុង​តំបន់ ដោយសារ​អាកាសយានដ្ឋាន​ថ្មី​នេះ​មាន​ទំហំ​ធំ​ជាង​អាកាសយានដ្ឋាន​ចាស់​ច្រើនដង ដែល​នេះ​ជា​កិត្យានុភាព​មួយ​ក្នុង​ការ​ទាក់ទាញ​ស្ទើរ​គ្រប់​វិស័យ ពិសេស​វិស័យ​ទេសចរណ៍​។

លោក​បន្តថា នៅពេលដែល​អាកាសយានដ្ឋាន​ទៅដល់​តំបន់​ណាមួយ វា​នឹង​នាំ​ភាព​ទាក់ទាញ​បន្ថែម​ទៅដល់​តំបន់​នោះ ដោយ​ការសង​សង់​អាកាសយានដ្ឋាន​អន្តរជាតិ​សៀមរាប​-​អង្គរ​នេះ គឺជា​ការបង្កើត​ទីក្រុង​ថ្មី​មួយទៀត​សម្រាប់​ខេត្ត​សៀមរាប ខណៈ​ទីក្រុង​ចាស់​ក៏​ចាប់ផ្តើម​តូចចង្អៀត​។

លោក​បញ្ជាក់ថា​៖ «​អាកាសយានដ្ឋាន​អន្តរជាតិ​សៀមរាប​-​អង្គរ​ថ្មី​នេះ​ស្ថិតនៅ​ឆ្ងាយ​ពី​តំបន់​បេតិកភណ្ឌ ដែល​ជួយ​បាន​ច្រើន​ទៅដល់​បេតិកភណ្ឌ​របស់​យើង ខណៈ​ព្រលានយន្តហោះ​ចាស់ អាច​នឹង​បង្ក​ហានិភ័យ​រយៈពេល​វែង​ដល់​សំណង់​បេតិកភណ្ឌ​នេះ​។ ដើម្បី​ឈានដល់​ចំណុច​នេះ លុះណា​រាជរដ្ឋាភិបាល និង​ស្ថាប័ន​ពាក់ព័ន្ធ​មានការ​ខិតខំ​ប្រឹងប្រែង​ និង​អនុវត្ត​ការងារ​នេះ​ឱ្យបាន​ហ្មត់ចត់ និង​ត្រឹមត្រូវ​»​។

អាកាសយានដ្ឋាន​អន្តរជាតិ​សៀមរាប​-​អង្គរ ត្រូវបាន​សាងសង់​ដោយ​ក្រុមហ៊ុន Angkor International Airport Investment (Cambodia) Co., Ltd(AIAI) នៅលើ​ផ្ទៃដី​ ៧០០,០៦ ​ហិកតា ដែលមាន​ទុនវិនិយោគ​ប្រមាណ ៨៨០ លាន​ដុល្លារ​។ អាកាសយានដ្ឋាន​នេះ​មាន​សមត្ថភាព​ទទួល​អ្នក​ដំណើរ​ប្រចាំឆ្នាំ រយៈពេល​ខ្លី-​មធ្យម ៧ ​លាន​នាក់​ក្នុង ១ ​ឆ្នាំ​ដែល​ត្រូវ​ចំណាយ​ទុន​ជាង ៥០០ ​លាន​ដុល្លារ និង​រយៈពេល​វែង​ទទួលបាន ២០ ​លាន​នាក់​ក្នុង​ ១ ​ឆ្នាំ ដែល​ត្រូវ​ចំណាយ​ទុន​ជាង ៣០០ ​លាន​ដុល្លារ​បន្ថែមទៀត​។ សម្រាប់​សមត្ថភាព​ទទួល​ទំនិញ​ប្រចាំឆ្នាំ​វិញ​នៅក្នុង​រយៈពេល​ខ្លី​-​មធ្យម ១០ ០០០​ តោន ក្នុង ១ ​ឆ្នាំ និង​រយៈពេល​វែង ៦០ ០០០ ​តោន​៕ LA

អត្ថបទគួរចាប់អារម្មណ៍