ភ្នំពេញៈ រដ្ឋាភិបាលកម្ពុជា និងរដ្ឋាភិបាលស៊ុយអែតបានប្តេជ្ញានឹងពង្រឹងទំនាក់ទំនង និងកិច្ចសហប្រតិបត្តិការវិស័យសេដ្ឋកិច្ច-ពាណិជ្ជកម្មជាមួយគ្នា ដើម្បីជំរុញកំណើនទំហំពាណិជ្ជកម្ម និងស្តារកំណើនសេដ្ឋកិច្ចឡើងវិញនៅក្រោយការរីករាលនៃជំងឺកូវីដ ១៩។
លោក ឱក ប៊ុង រដ្ឋមន្ត្រីស្តីទីក្រសួងពាណិជ្ជកម្មក្នុងជំនួបពិភាក្សាការងារជាមួយលោក Jon Astrom Grondahl ឯកអគ្គរាជទូតស៊ុយអែតប្រចាំកម្ពុជាទើបតែងតាំងថ្មី កាលពីថ្ងៃទី ២៤ ខែឧសភា បានឱ្យដឹងថា កម្ពុជា-ស៊ុយអែតមានទំនាក់ទំនងល្អនាពេលកន្លងមក ពិសេសលើវិស័យសេដ្ឋកិច្ច និងពាណិជ្ជកម្ម។
លោកបន្តទៀតថា ជាមួយគ្នានេះកម្ពុជាក៏កំពុងទទួលបានជោគជ័យលើការប្រយុទ្ធប្រឆាំងនឹងជំងឺកូវីដ ១៩ តាមរយៈការដាក់ចេញនូវវិធានការទប់ស្កាត់ដ៏មានប្រសិទ្ធភាព និងយុទ្ធនាការចាក់វ៉ាក់សាំងដោយជោគជ័យ ដែលអនុញ្ញាតឱ្យកម្ពុជាបើកប្រទេសជាប្រក្រតី និងដំណើរការសកម្មភាពសេដ្ឋកិច្ចពេញលេញលើគ្រប់វិស័យ។
លោកថ្លែងថា៖ «រដ្ឋាភិបាលកម្ពុជាបានខិតខំប្រឹងប្រែងធ្វើពិពិធកម្មពាណិជ្ជកម្ម តាមរយៈការបង្កើតកិច្ចព្រមព្រៀងពាណិជ្ជកម្មសេរីក្រោមក្របខ័ណ្ឌពហុភាគី តំបន់ និងទ្វេភាគី ស្របជាមួយនឹងការធ្វើកំណែទម្រង់ច្បាប់ និងបទប្បញ្ញត្តិ ដើម្បីកែលម្អបរិយាកាសធុរកិច្ច និងវិនិយោគឱ្យកាន់តែប្រសើរ»។
បើតាម លោក ឱក ប៊ុង បច្ចុប្បន្នរាជរដ្ឋាភិបាលកម្ពុជាកំពុងសហការយ៉ាងជិតស្និទ្ធក្នុងការអនុវត្តកម្មវិធីគម្រោងរោងចក្រកាន់តែប្រសើរនៅកម្ពុជានៃអង្គការពលកម្មអន្តរជាតិ ដែលជួយធ្វើឱ្យបរិយាកាសការងារមានភាពប្រសើរឡើង ការលុបបំបាត់ពលកម្មកុមារ និងការលើកកម្ពស់អនុលោមភាពទៅតាមនិយាម និងបទដ្ឋានអន្តរជាតិ និងផ្តល់សុខុមាលភាព និងទំនុកចិត្តដល់និយោជិត និងនិយោជក។
លោក Jon Astrom Grondahl បានប្រាប់ថា ស៊ុយអ៊ែត មានឆន្ទៈនៅក្នុងការបន្តជំរុញកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសទាំង ២ ឱ្យកាន់តែរឹងមាំបន្ថែមទៀត។
លោកក៏បានបង្ហាញពីការប្តេជ្ញាចិត្តនៅក្នុងបេសកកម្មការទូតរបស់លោក ចំពោះការលើកទឹកចិត្តដល់ពាណិជ្ជករ និងវិនិយោគិនស៊ុយអែតឱ្យស្វែងយល់បន្ថែមពីសក្តានុពលពាណិជ្ជកម្ម វិនិយោគ និងទេសចរណ៍នៅកម្ពុជា និងបន្តពង្រឹងទំនាក់ទំនងល្អ ពិសេសក្នុងវិស័យពាណិជ្ជកម្មឱ្យកាន់តែរឹងមាំ និងស៊ីជម្រៅ ដែលអាចជួយដល់ការស្តារសេដ្ឋកិច្ចឡើងវិញ និងជួយបង្កើនទំហំពាណិជ្ជកម្មទ្វេភាគីកម្ពុជា-ស៊ុយអែត ដើម្បីឈានដល់កម្រិតសក្តានុពលពេញលេញ។
ពាក់ព័ន្ធនឹងបញ្ហានេះ លោក ឱក ប៊ុង បានបញ្ជាក់ពីការត្រៀមខ្លួនរបស់កម្ពុជាក្នុងការស្វាគមន៍ពាណិជ្ជករ និងវិនិយោគិនស៊ុយអែត ដើម្បីចាប់យកឱកាសធុរកិច្ច និងវិនិយោគដ៏ធំធេងនៅកម្ពុជា។ លោកក៏ស្នើឱ្យភាគីស៊ុយអែតបង្កើនការនាំចូលទំនិញកសិកម្ម និងកម្មន្តសាលពីកម្ពុជា វិនិយោគលើវិស័យរថយន្តអគ្គិសនី និងពិនិត្យលទ្ធភាពបង្កើតសភាពាណិជ្ជកម្មស៊ុយអែតឱ្យមានវត្តមាននៅកម្ពុជា។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក គី សេរីវឌ្ឍន៍ បានប្រាប់ភ្នំពេញប៉ុស្តិ៍ក្នុងថ្ងៃទី ២៥ ឧសភាថា ទំហំពាណិជ្ជកម្មរវាងកម្ពុជា និងស៊ុយអែត នៅមានកម្រិតតិចតួចដែលតម្រូវឱ្យភាគីទាំង ២ ត្រូវពង្រឹងកិច្ចសហប្រតិបត្តិការបង្កើនការវិនិយោគបន្ថែមទៀត។ ជាមួយគ្នានេះកម្ពុជាក៏អាចនាំផលិតផលកសិកម្មទៅប្រទេសស៊ុយអែតបានផងដែរ។
លោកថ្លែងថា៖ «ពីកម្ពុជាទៅស៊ុយអែតមានចម្ងាយឆ្ងាយ ហើយផលិតផលស្រស់ពិបាកក្នុងការនាំចេញទៅ ប៉ុន្តែកសិកម្មដែលអាចចេញទៅបានមានដូចជាសាច់ ម្រេច គ្រាប់ធញ្ញជាតិ និងផលិតផលផ្សេងទៀតដែលអាចសម្ងួតបានទៅកាន់ប្រទេសនេះ។ នេះ គឺជាការធ្វើពិពិធកម្មទីផ្សាររបស់វិស័យកសិកម្មកម្ពុជាលើទីផ្សារស៊ុយអែត»។
របាយការណ៍របស់ក្រសួងពាណិជ្ជកម្មបានបង្ហាញថា ទំហំពាណិជ្ជកម្មទ្វេភាគីកម្ពុជា និងស៊ុយអែត នៅឆ្នាំ ២០២០ មានចំនួន ៦៤ លានដុល្លារ ខណៈរយៈពេល ៥ ខែ ដើមឆ្នាំ ២០២១ មានចំនួន ២៣ លានដុល្លារ៕ LA