ទីក្រុងញូវដែលីៈ ប្រទេសឥណ្ឌាបាននិយាយថា ខ្លួនបានកាត់បន្ថយការនាំចេញស្ករសដើម្បីការពារការផ្គត់ផ្គង់ផ្ទាល់ខ្លួន និងបន្ធូរបន្ថយអតិផរណា ប៉ុន្មានថ្ងៃបន្ទាប់ពីការហាមឃាត់លើការនាំចេញស្រូវសាលីបានធ្វើឱ្យតម្លៃពិភពលោកកើនឡើងបន្ទាប់ពីសង្គ្រាមអ៊ុយក្រែន។
ប្រទេសផលិតស្ករសដ៏ធំបំផុតរបស់ពិភពលោក និងជាអ្នកនាំចេញលំដាប់លេខ ១ បន្ទាប់ពីប្រទេសប្រេស៊ីលបានឱ្យដឹងកាលពីថ្ងៃអង្គារថា ការនាំចេញនឹងត្រូវបានកំណត់ត្រឹម ១០លានតោនសម្រាប់ឆ្នាំទីផ្សារបច្ចុប្បន្នដល់ខែកញ្ញា។
ក្រសួងចំណីអាហារ បាននិយាយនៅក្នុងសេចក្តីថ្លែងការណ៍មួយថា ការសម្រេចចិត្តនេះត្រូវបានធ្វើឡើង «ក្នុងគោលបំណងដើម្បីរក្សាភាពអាចរកបានក្នុងស្រុក និងស្ថិរភាពតម្លៃក្នុងអំឡុងរដូវស្ករស»។
ការនាំចេញស្ករសត្រូវបានគេព្យាករថានឹងកើនឡើងខ្ពស់បំផុតនៅឆ្នាំទីផ្សារនេះ ជាមួយនឹងកិច្ចសន្យាដែលបានចុះហត្ថលេខាសម្រាប់ប្រហែល ៩ លានតោន និង ៧,៨លានតោនត្រូវបានដឹកជញ្ជូនរួចហើយ។
ដោយលើកឡើងពីអតិផរណា និងតម្រូវការសន្តិសុខស្បៀងនៅក្នុងប្រទេស នៅពាក់កណ្តាលខែឧសភា ប្រទេសឥណ្ឌាបានហាមឃាត់ការនាំចេញស្រូវសាលីថ្មីណាមួយដោយគ្មានការយល់ព្រមពីរដ្ឋាភិបាលបន្ទាប់ពីខែមីនា ដែលក្តៅបំផុតក្នុងកំណត់ត្រា ដោយស្តីបន្ទោសលើការប្រែប្រួលអាកាសធាតុ នាំប៉ះពាល់ដល់ការប្រមូលផល។
ថ្វីបើឥណ្ឌាជាអ្នកលេងតិចតួចនៅលើទីផ្សារពិភពលោកក៏ដោយ ការសម្រេចចុងក្រោយ នេះបានជំរុញឱ្យតម្លៃស្បៀងអាហារសកលកើនឡើងបន្ថែមទៀត ចាប់តាំងពីការលុកលុយកាលពីខែកុម្ភៈរបស់រុស្ស៊ីទៅលើប្រទេសមហាអំណាចកសិកម្មអ៊ុយក្រែន ដែលកាលពីមុនមានចំនួន ១២ភាគរយនៃការនាំចេញសកល។
ការសម្រេចចិត្តនេះក៏បានធ្វើឱ្យមានការភ័យខ្លាចចំពោះការកើនឡើងនៃការការពារនិយមនៅពេលមានជម្លោះ។
ការហាមឃាត់ការនាំចេញក៏បានបន្សល់ទុកស្រូវសាលីរាប់សែនតោនជាប់គាំងនៅកំពង់ផែធំមួយនៅភាគខាងលិចប្រទេសឥណ្ឌា ដោយមានឡានដឹកទំនិញរាប់ពាន់គ្រឿងរង់ចាំដឹកចេញ។
អាជ្ញាធរបានសង្កត់ធ្ងន់ថា ការស្នើសុំរវាងរដ្ឋាភិបាលនិងរដ្ឋាភិបាលសម្រាប់ស្រូវសាលីពីប្រទេសផ្សេងទៀតដែលឡើងថ្លៃខ្ពស់នឹងត្រូវបានអនុញ្ញាត។
នៅកន្លែងផ្សេងទៀតនៅអាស៊ី ប្រទេសឥណ្ឌូនេស៊ីបានផ្អាកការនាំចេញប្រេងដូងជាបណ្តោះអាសន្ន ខណៈដែលម៉ាឡេស៊ីបានហាមឃាត់ការនាំចេញសាច់មាន់៕ AFP/RR