ធនាគារកម្ពុជាសាធារណៈ ភីអិលស៊ី (ធនាគារកម្ពុ) បានប្រារព្ធខួប ៣០ ឆ្នាំរបស់ខ្លួន កាលពីថ្ងៃពុធ ខណៈធនាគារកម្ពុ បានចាប់ផ្ដើមអាជីវកម្មរបស់ខ្លួននៅក្នុងព្រះរាជាណាចក្រកម្ពុជាក្នុងឆ្នាំ ១៩៩២ ហើយ រហូតមកដល់ពេលបច្ចុប្បន្ននេះ ធនាគារបានពង្រីកសាខាសរុបចំនួន ៣១ សាខា ហើយគ្រោងនឹងបើកសាខាថ្មីៗបន្ថែមទៀតនៅក្នុងរយៈពេលប៉ុន្មានឆ្នាំខាងមុខ ដើម្បីផ្ដល់សេវាធនាគារកាន់តែជិតជូនដល់អតិថិជន និងសហគមន៍។
លោក អុង មីងតិច ដែលជានាយកប្រតិបត្តិមានប្រសាសន៍ថា៖ «លទ្ធផលប្រាក់ចំណេញគួរជាទីមោទនៈរបស់ធនាគារកម្ពុ ដែលសម្រេចបានទាំងក្នុងគ្រាល្អ និងគ្រាលំបាក បានមកពីការគ្រប់គ្រងរឹងមាំ អភិបាលកិច្ចល្អ និងការគាំទ្រយ៉ាងពេញទំហឹងពីធនាគារមេ គឺធនាគារសាធារណៈ ប៊ែហាដ ដែលជាក្រុមហ៊ុនដ៏ធំបំផុតមិនក្រោមចំណុះរដ្ឋាភិបាលដែលបានចុះបញ្ជីនៅក្នុងទីផ្សារភាគហ៊ុន Bursa ប្រទេសម៉ាឡេស៊ី ជាមួយនឹងមូលធនកម្មទីផ្សារចំនួន ១៩,៤ ប៊ីលានដុល្លារអាមេរិក ហើយជាធនាគារពាណិជ្ជធំបំផុតទី៣ នៅក្នុងប្រទេសម៉ាឡេស៊ី គិតត្រឹមចុងឆ្នាំ ២០២១»។
«ចក្ខុវិស័យច្បាស់លាស់របស់ Tan Sri Dato’ Sri Dr. Teh Hong Piow ដែលជាស្ថាបនិក និងជាប្រធានក្រុមប្រឹក្សាភិបាលកិត្តិយស អភិបាល និងទីប្រឹក្សានៃសម្ព័ន្ធធនាគារសាធារណៈដែលប្រកាន់ខ្ជាប់ក្នុងរយៈពេល ៥៥ ឆ្នាំ ចាប់តាំងពីការចាប់ផ្ដើមអាជីវកម្មរបស់ធនាគារសាធារណៈនៅក្នុងឆ្នាំ ១៩៦៦ នឹងបន្ដតម្រង់ទិស ដល់ធនាគារកម្ពុ រិៈរកយុទ្ធសាស្ដ្រ និងជម្នះរាល់បញ្ហាប្រឈមទាំងឡាយក្នុងបរិបទនៃការឆ្លងរាលដាលជំងឺកូវីដ ១៩ ជាមួយនឹងមូលដ្ឋានគ្រឹះដ៏រឹងមាំ»។
«បើទោះបី ឆ្នាំ ២០២០ និងឆ្នាំ ២០២១ បានបង្ហាញឱ្យឃើញភាពមិនប្រាកដប្រជា ដោយសារផលប៉ះពាល់នៃជំងឺកូវីដ ១៩ រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុវត្តវិធានការទប់ស្កាត់ការឆ្លងរាលដាលប្រកបដោយភាពជោគជ័យ រឹងមាំ និងប្រសិទ្ធភាព ដើម្បីស្ដារសេដ្ឋកិច្ចរបស់ប្រទេសជាតិឱ្យងើបឡើងចេញពីវិបត្តិ និងឆ្ពោះទៅរកមាគ៌ាស្ដារសេដ្ឋកិច្ចប្រកបដោយភាពរឹងមាំ»។
លោក អុង ថ្លែងបន្ថែមថា៖ «ដើម្បីចូលរួមចំណែកឆ្ពោះទៅរកការអភិវឌ្ឍប្រទេសជាតិ ធនាគារកម្ពុ នៅតែបន្ដ និងប្ដេជ្ញាចិត្តលើកស្ទួយបរិយាប័ន្នហិរញ្ញវត្ថុ ដើម្បីផ្ដល់ជូនអ្នកដែលមិនទទួលបានសេវាកម្មធនាគារ ដោយរួមបញ្ចូលផ្នត់គំនិតផ្ដោតលើបរិស្ថាន សង្គម និងអភិបាលកិច្ចទៅក្នុងអាជីវកម្ម និងប្រតិបត្តិការរបស់ខ្លួន ព្រមទាំងផ្ដល់ជំនួយដល់អតិថិជនដែលប្រឈមនឹងផលវិបាកផ្នែកហិរញ្ញវត្ថុ ដោយសារការឆ្លងរាលដាលជាសកលនៃជំងឺកូវីដ ១៩»។
លោកក៏បានសម្ដែងនូវការដឹងគុណរបស់ធនាគារចំពោះឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា និយតករនានា ព្រមទាំងអតិថិជនទាំងអស់ចំពោះការបន្ដគាំទ្រ ទំនុកចិត្ត និងភាពជឿជាក់លើធនាគារកម្ពុក្នុងរយៈពេលជាច្រើនឆ្នាំកន្លងមក។
ជាផ្នែកមួយនៃការប្រារព្ធខួប ៣០ ឆ្នាំរបស់ធនាគារកម្ពុ និងដើម្បីឆ្លើយតបតាមតម្រូវការរបស់អតិថិជន ធនាគារកម្ពុគ្រោងដាក់ឱ្យដំណើរការសេវាកម្មឌីជីថលកាន់តែល្អប្រសើរ និងពេញលេញដល់អតិថិជន ក្នុងនោះរួមមានសេវាផ្ទេរប្រាក់ឆ្លងដែនរវាងព្រះរាជាណាចក្រកម្ពុជា និងប្រទេសម៉ាឡេស៊ី ព្រមទាំងផ្សព្វផ្សាយផលិតផល និងសេវាកម្មថ្មីៗ»៕