ភ្នំពេញៈ និយតករមូលបត្រកម្ពុជា (SERC) អំពាវនាវឱ្យវិស័យឯកជនពិចារណាការចេញសញ្ញាបណ្ណបៃតង ដើម្បីកសាងសហគមន៍អាជីវកម្ម និងវិនិយោគបៃតងនៅកម្ពុជា។
អគ្គនាយក SERC លោក ស៊ូ សុជាតិ បានប្រាប់ភ្នំពេញប៉ុស្តិ៍កាលពីថ្ងៃទី ២៦ ខែឧសភាថា ស្ថាប័នលោកបានធ្វើការជាមួយ ADB អស់រយៈពេលជាច្រើនឆ្នាំលើគម្រោងនេះ ខណៈពេលនេះលោកកំពុងធ្វើការសិក្សា និងវាយតម្លៃក្រុមហ៊ុនដែលមានសិទ្ធិ និងត្រៀមចេញបណ្ណបៃតងនេះ។
លោកថ្លែងថា៖ «យើងលើកទឹកចិត្តក្រុមហ៊ុនឯកជនទាំងអស់ចេញសញ្ញាបណ្ណបៃតង ប៉ុន្តែវាមិនមែនមានន័យថា តាមច្បាប់យើងអនុញ្ញាតឱ្យចេញសញ្ញាបណ្ណបៃតងប៉ុណ្ណោះនោះទេ។ ពួកគេអាចចេញសញ្ញាបណ្ណណាមួយក៏បាន។ ប្រសិនបើពួកគេចេញសញ្ញាបណ្ណបៃតង ពួកគេនឹងទទួលបានការលើកទឹកចិត្តច្រើនជាងការចេញសញ្ញាបណ្ណធម្មតា»។
លោកបន្ថែមថា សម្រាប់អ្នកដែលចេញសញ្ញាបណ្ណបៃតង មូលនិធិដែលប្រមូលបានពីការបោះផ្សាយត្រូវប្រើប្រាស់ក្នុងអាជីវកម្ម ឬការវិនិយោគបៃតង ដែលមិនប៉ះពាល់ដល់បរិស្ថាន។ លោកបន្តថា សញ្ញាបណ្ណបៃតងតម្រូវឱ្យអ្នកជំនាញវាយតម្លៃលើមូលនិធិដែលទទួលបានលើគម្រោងនានា ដែលពួកគេវិនិយោគថា តើត្រូវបានប្រើប្រាស់ត្រឹមត្រូវតាមផែនការឬទេ?
លោកថ្លែងថា៖ «ADB នឹងគាំទ្រផ្តល់អ្នកជំនាញសម្រាប់ក្រុមហ៊ុនចេញសញ្ញាបណ្ណបៃតង ដើម្បីសន្សំការចំណាយពួកគេ ហើយមូលនិធិដែលប្រមូលបានត្រូវប្រើប្រាស់ឱ្យបានត្រឹមត្រូវ។ យើងលើកទឹកចិត្តឱ្យក្រុមហ៊ុននានាពិចារណានៅក្នុងការបោះផ្សាយសញ្ញាបណ្ណបៃតង»។ លោកបន្តថា៖ «មកដល់ពេលនេះមានក្រុមហ៊ុនមួយចំនួនបានបង្ហាញចំណាប់អារម្មណ៍ ប៉ុន្តែពួកគេមិនទាន់ដាក់លិខិតផ្លូវការនៅឡើយទេ»។
កាលពីថ្ងៃទី ២៤ ខែឧសភា ឆ្នាំ ២០២២ និយតករមូលបត្រកម្ពុជា និង ADB តាមរយៈគំនិតផ្តួចផ្តើមទីផ្សារមូលបត្រអាស៊ី (ABMI) បានសហការរៀបចំកិច្ចប្រជុំពិគ្រោះយោបល់ស្តីពី «ដំណើរការ និងឱកាសនៃការចេញសញ្ញាបណ្ណបៃតងប្រកបដោយនិរន្តរភាពដល់កម្ពុជា»។
ក្រុមអ្នកជំនាញរបស់ ADB បានចេញផ្សាយមតិយោបល់របស់ពួកគេកាលពីថ្ងៃទី ២០ ខែមករា ឆ្នាំ ២០២២ ថា ទីផ្សារមូលបត្រនៅកម្ពុជារីកចម្រើនយ៉ាងឆាប់រហ័សក្នុងរយៈពេលប៉ុន្មានឆ្នាំចុងក្រោយមកនេះ។ ការណ៍នេះបានចោទជាសំណួរដល់អ្នកចូលរួម និងនិយតករថា តើពួកគេអាចទាញយកអត្ថប្រយោជន៍ពីទីផ្សារនេះក្នុងការលើកកម្ពស់ការការពារបរិស្ថាន និងការអភិវឌ្ឍសេដ្ឋកិច្ចសង្គមយ៉ាងដូចម្តេច?
អ្នកជំនាញបានលើកឡើងថា វិធីមួយដើម្បីសម្រេចបានកិច្ចការនេះគឺតាមរយៈឧបករណ៍ហិរញ្ញវត្ថុដែលមានគោលដៅទាក់ទងនឹងបរិស្ថាន សង្គម និងអភិបាលកិច្ចមកពិចារណាដូចជាសញ្ញាបណ្ណបៃតងសង្គម និងនិរន្តរភាព (GSS)។ ប្រាក់ចំណូលមកពីមូលបត្របំណុលប្រកបដោយភាពច្នៃប្រឌិតទាំងនេះ ត្រូវបានប្រើដើម្បីផ្តល់ហិរញ្ញប្បទាន ឬផ្តល់ហិរញ្ញប្បទានឡើងវិញដល់គម្រោងដែលជះលទ្ធផលវិជ្ជមានដល់បរិស្ថាន។
អ្នកជំនាញបានបន្ថែមទៀតថា ក្នុងនាមជាប្រធានវេទិកាទីផ្សារមូលធនអាស៊ានដែលជាក្រុមនៃនិយតករមូលបត្រអាស៊ាន និយតករមូលបត្រកម្ពុជាគួរតែធានាថាការអភិវឌ្ឍទីផ្សារសញ្ញាបណ្ណ GSS ក្នុងស្រុកគឺស្របតាមគំនិតផ្តួចផ្តើមក្នុងតំបន់ ដូចជា សេដ្ឋកិច្ចពន្ធដារអាស៊ានសម្រាប់ហិរញ្ញវត្ថុប្រកបដោយនិរន្តរភាព (ASEAN Taxonomy for Sustainable Finance)៕ LA