ភ្នំពេញៈ សភាពាណិជ្ជកម្ម​កម្ពុជា ​(CCC) នឹង​បើក​ដំណើរការ​ការិយាល័យ​តំណាង​របស់ខ្លួន​លើកដំបូង​នៅ​ប្រទេស​កាដាណា​នៅ​ថ្ងៃទី​ ២៧ ខែឧសភា​ឆ្នាំ​ ២០២២ ​នេះ ដើម្បី​ទាក់ទាញ​ការវិនិយោគ​ពី​បរទេស និង​ជំរុញ​កំណើន​ទំហំ​ពាណិជ្ជកម្ម​រវាង​ប្រទេស​ទាំង​ ២​។

លោក លឹម ហេង អ្នកនាំពាក្យ និង​ជា​អនុប្រធាន​សភាពាណិជ្ជកម្ម​កម្ពុជា​បាន​ប្រាប់​ភ្នំពេញ​ប៉ុស្តិ៍​ឱ្យដឹងថា សភាពាណិជ្ជកម្ម​កម្ពុជា​នឹង​បោះឆ្នោត​ជ្រើសរើស​ប្រធាន​ការិយាល័យ​តំណាង​សភាពាណិជ្ជកម្ម​កម្ពុជា​នៅ​ប្រទេស​កាណាដា​នៅក្នុង​សប្តាហ៍​នេះ​ ដើម្បី​ឈាន​ទៅដល់​ការបើក​ដំណើរការ ការិយាល័យ​តំណាង​របស់ខ្លួន​ជា​លើកដំបូង​នៅក្នុង​ប្រទេស​កាដាណា​នៅ​ថ្ងៃទី​ ២៧ ខែឧសភា ឆ្នាំ​ ២០២២ នេះ​។

លោក​បាន​បន្ថែមថា លោក​នឹង​ចូលរួម​ក្នុងការ​បោះឆ្នោត​ជ្រើសតាំង​ប្រធានសភា​ពាណិជ្ជកម្ម​ប្រចាំ​ទីក្រុង​តូរ៉ុនតូ ប្រទេស​កាណាដា​មួយរូប និង​សមាជិក​សភា​ពាណិជ្ជកម្ម​ ១៤ ​រូប​។

លោក​បាន​បញ្ជាក់ថា​៖ «​ការបើក​ការិយាល័យ​តំណាង​សភាពាណិជ្ជកម្ម​កម្ពុជា នៅ​ប្រទេស​កាណាដា​នេះ​នឹង​ជំរុញ​ការនាំចេញ​ទំនិញ​ពី​កម្ពុជា​ទៅ​ប្រទេស​នេះ​កាន់តែ​កើនឡើង​ថែមទៀត ខណៈ​ដែល​ទំហំ​ពាណិជ្ជកម្ម​រវាង​កម្ពុជា និង​កាណាដា​នាពេល​បច្ចុប្បន្ន​បន្ត​មាន​កំណើន​គួរឱ្យ​កត់សម្គាល់​។ យើង​ជឿថា ការិយាល័យ​តំណាង​នេះ​នឹង​ជំរុញ​ឱ្យ​ទំហំ​ពាណិជ្ជកម្ម​រវាង​ប្រទេស​ទាំង​ ២​ កាន់តែ​ធំ​ថែមទៀត​។ បន្ទាប់ពី​កាណាដា យើង​គ្រោង​នឹង​បើក​នៅ​ប្រទេស​ជប៉ុន​បន្តទៀត​»​។

លោក ប៉ែន សុវិជាតិ អ្នកនាំពាក្យ​ក្រសួង​ពាណិជ្ជកម្ម​បាន​ប្រាប់​ភ្នំពេញ​ប៉ុស្តិ៍ នៅ​ថ្ងៃទី​ ២៦ ​ថា ការបើក​ការិយាល័យ​តំណាង​សភាពាណិជ្ជកម្ម​កម្ពុជា​ជា​លើកដំបូង​នេះ គឺជា​ជំហាន​មួយ​ដ៏សំខាន់​សម្រាប់​ការផ្សព្វផ្សាយ​ដល់​ធុរជន និង​វិនិយោគិន​របស់​កាណាដា​ឱ្យ​ស្គាល់​ពី​សក្តានុពល​របស់​កម្ពុជា និង​ជាការ​សម្រួល​ដល់​ជំហាន​បន្តបន្ទាប់​ទៀត​ក្នុង​ការ​សិក្សា​ទីផ្សារ​ឱ្យបាន​ច្បាស់​អំពី​របាំង​បច្ចេកទេស​មិនមែន​ពន្ធ ដែល​អាច​ឈាន​ទៅរក​ការចុះ​កិច្ចព្រមព្រៀង​ពាណិជ្ជកម្ម​សេរី​ទ្វេភាគី​នា​អនាគត​។

លោក​បាន​បន្ថែមថា ការិយាល័យ​តំណាង​នេះ​ជា​ឈ្នាន់​មួយ ឬក៏​ជា​មជ្ឈមណ្ឌល​ផ្សព្វផ្សាយ​ព័ត៌មាន​មួយ​ពី​កម្ពុជា​ទាក់ទង​ទីផ្សារ​ទៅកាន់​វិនិយោគិន​កាណាដា និង​ប្រមូល​ព័ត៌មាន​ទីផ្សារ​ពី​កាណាដា​មក​ផ្សព្វផ្សាយ​ដល់​វិនិយោគិន​កម្ពុជា​វិញ រួមទាំង​ការរៀបចំ​ពិព័រណ៍ និង​ការផ្សព្វផ្សាយ​លក្ខខណ្ឌ​វិនិយោគ​នានា​ផងដែរ​។

លោក​បាន​បញ្ជាក់ថា​៖ «​កាណាដា ជា​ទីផ្សារ​ដ៏ធំ​មួយ​របស់​កម្ពុជា ដោយសារ​ប្រទេស​នេះ​ក៏បាន​និង​កំពុងផ្តល់​ភាពអនុគ្រោះ​ពន្ធ GSP កម្ពុជា​ដដែល​។ ការនាំ​ចេញពី​កម្ពុជា​ទៅ​កាណាដា គឺជា​ទំហំ​ពាណិជ្ជកម្ម​ដ៏ធំ​មួយ ហើយ​ដូចដែល​យើង​ដឹង​ហើយ​ថា កាណាដា និង​អាមេរិក គឺជា​ប្រទេស​ជិត ដែលមាន​ការផ្សារភ្ជាប់​គ្នា​យ៉ាង​ស្អិតល្មួត និង​មាន​កតិកាសញ្ញា​ជាមួយ​គ្នា ដូច្នេះ​ទំនិញ​ទៅដល់​កាណាដា ក៏ដូចជា​ទៅដល់​អាមេរិក​ដែរ​។ កត្តា​នេះ​ធ្វើឱ្យ​ទីផ្សារ​ ២​ នេះ​ក្លាយជា​ទីផ្សារ​ដ៏ធំ​សម្រាប់​កម្ពុជា​យើង​»​។

លោក​បាន​បន្តថា ដោយសារ​តែ​ក្រសួង​ពាណិជ្ជកម្ម​ជា​អាណាព្យាបាល​បច្ចេកទេស​របស់​សភាពាណិជ្ជកម្ម​កម្ពុជា ដូចនេះ​ក្រសួង​កំពុងតែ​សម្លឹង​រកមើល​ទីតាំង​សមស្រប​បន្តទៀត​នៅ​ទ្វីបអឺរ៉ុប ដើម្បី​នឹង​បើក​ការិយាល័យ​តំណាង​បន្ថែមទៀត​នាពេល​ខាងមុខ​។

តាម​ទិន្នន័យ​ដែល​ចេញផ្សាយ​ដោយ​អគ្គនាយកដ្ឋាន​គយ និង​រដ្ឋាករ​កម្ពុជា​ឱ្យដឹងថា​រយៈពេល​ ៤​ ខែ​ដើមឆ្នាំ​ ២០២២ ទំហំ​ពាណិជ្ជកម្ម​ទ្វេភាគី​រវាង​កម្ពុជា និង​កាណាដា​មាន​តម្លៃ​ជាង ៣៤៧ ​លាន​ដុល្លារ​កើនឡើង​ ២១,៣ ​ភាគរយ ធៀប​រយៈពេល​ដូចគ្នា​ឆ្នាំ​ ២០២១​។ កម្ពុជា​នាំចេញ​ទៅ​កាណាដា​មាន​តម្លៃ​ទឹកប្រាក់​សរុប​ជាង ៣៤០ ​លាន​ដុល្លារ កើនឡើង​ ២២,៩​ ភាគរយ​៕ LA