.jpg)
ភ្នំពេញ: ធនាគារ អេស៊ីលីដា ភីអិលស៊ី ដែលជាធនាគារបោះផ្សារមូលបត្រនៅកម្ពុជានៅថ្ងៃទី ២៧ ខែឧសភានេះបានប្រកាសថា ខ្លួនបានចុះកិច្ចព្រមព្រៀងឥណទានជាមួយទីភ្នាក់ងារសហប្រតិបត្តិការអន្តរជាតិជប៉ុន (JICA) និងធនាគារជប៉ុន SMBC ដើម្បីទទួលបានសហហិរញ្ញប្បទានចំនួន ១៣៥ លានដុល្លារអាមេរិក សម្រាប់ផ្តល់កម្ចីដល់វិស័យកសិកម្មក្នុងប្រទេសកម្ពុជា។
លោក អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានលើកឡើងក្នុងសេចក្តីប្រកាសនោះថា ធនាគារ អេស៊ីលីដា ជាធនាគារពាណិជ្ជធំមួយ ដែលមានបណ្តាញប្រតិបត្តិការច្រើនជាងគេក្នុងព្រះរាជាណាចក្រកម្ពុជា។ បណ្តាញប្រតិបត្តិការដ៏សម្បូរបែបផ្តល់ភាពងាយស្រួលជូនដល់ប្រជាជនកម្ពុជា គ្រប់មជ្ឈដ្ឋានក្នុងសហគមន៍ ជាពិសេស អ្នកដែលរស់នៅជនបទអាចប្រើប្រាស់សេវាកម្មហិរញ្ញវត្ថុគ្រប់ប្រភេទរបស់ធនាគារ រួមទាំងសេវាកម្មឥណទាន ដែលមានគោលដៅ សម្រាប់ពង្រឹង និងពង្រីកវិស័យកសិកម្មនៅតាមជនបទ។
លោកបានបន្តថា នៅក្នុងកិច្ចខិតខំប្រឹងប្រែង ដើម្បីលើកស្ទួយការប្រើប្រាស់ សេវាកម្មហិរញ្ញវត្ថុឱ្យកាន់តែសកម្មនៅតាមជនបទ ទីភ្នាក់ងារសហប្រតិបត្តិការអន្តរជាតិជប៉ុន (JICA) និងធនាគារ SMBC បានផ្តល់សហហិរញ្ញប្បទានចំនួន ១៣៥ លានដុល្លារអាមេរិកដល់ធនាគារ អេស៊ីលីដា ដើម្បីផ្តល់កម្ចីដល់វិស័យកសិកម្មនៅកម្ពុជា។
លោកបញ្ជាក់ថា "សហហិរញ្ញប្បទាននេះនឹងជួយលើកស្ទួយដល់ផលិតកម្មកសិកម្ម និងការអភិវឌ្ឍសេដ្ឋកិច្ចសង្គម"។
គម្រោងសហហិរញ្ញប្បទានរយៈពេលវែងដែលទទួលបានពីទីភ្នាក់ងារសហប្រតិបត្តិការអន្តរជាតិជប៉ុន (JICA) និងធនាគារ SMBC ពិតជាមានសារៈសំខាន់យ៉ាងខ្លាំង សម្រាប់ធនាគារ អេស៊ីលីដា ក្នុងការផ្តល់កម្ចីដល់សហគ្រាសខ្នាតតូចបំផុត ខ្នាតតូច និងខ្នាតមធ្យម ដែលមានតម្រូវការឥណទានក្នុងការចាប់ផ្តើម និង/ឬការពង្រីកផលិតកម្មកសិកម្ម ដើម្បីបង្កើនប្រាក់ចំណូល។ នេះបើយោងតាមសេចក្តីប្រកាសព័ត៌មាន។
សេចក្តីប្រកាសនោះបានឱ្យដឹងដែរថា ធនាគារ SMBC គឺជាស្ថាប័នហិរញ្ញវត្ថុឈានមុខមួយក្នុងសកលលោក និងជាបុត្រសម្ព័ន្ធរបស់ Sumitomo Mitsui Financial Group (SMBC Group) ដែលមានការិយាល័យកណ្តាលនៅរាជធានីតូក្យូ។ SMBC គឺជាធនាគារជប៉ុនដែលមានទ្រព្យសកម្មច្រើនបំផុត និងមានចំណាត់ថ្នាក់ឥណទានយ៉ាងល្អ តាមរយៈបណ្តាញប្រតិបត្តិការទូលំទូលាយនៅទូទាំងពិភពលោក ដែលមានវិសាលភាពគ្របដណ្តប់ជាង ៤១ ប្រទេស និងតំបន់ដោយមាន ១៦ សាខាស្ថិតនៅក្នុងតំបន់អាស៊ី។
ធនាគារ SMBC ក៏ដូចជា SMBC Group ផ្តល់សេវាកម្មធនាគារជូនសាធារណជនទូទៅ សាជីវកម្ម និងការវិនិយោគ (investment bank) ដើម្បីឆ្លើយតបនឹងតម្រូវការអតិថិជនរបស់ខ្លួន។ ធនាគារ SMBC ត្រូវបង្កើតឡើង ដោយឈរលើការផ្តល់អាទិភាពដល់អតិថិជន និងភាពងាយស្រួលពីគ្រប់ទីកន្លែង និងនៅក្នុងតំបន់៕
