ភ្នំពេញ: បន្ទាប់ពីរដ្ឋាភិបាលតាមរយ:ក្រសួងសេដ្ឋកិច្ច និង ហិរញ្ញវត្ថុ ដាក់ចេញគោលនយោបាយស្តារវិស័យទេសចរណ៍ដែលរងផលប៉ះពាល់ដោយកូវីដ១៩ ក្រសួងទេសចរណ៍ បានផ្សព្វផ្សាយ "នីតិវិធី និងលក្ខខណ្ឌកម្ចីក្នុងគម្រោង សហហិរញ្ញប្បទានស្តារ និងជំរុញកំណើនក្នុងវិស័យទេសចរណ៍"។
លោក សុង តុងហាប់ រដ្ឋលេខាធិការ និងជាប្រធានអនុក្រុមការងារគាំពារសហគ្រាស និងការងារក្នុងវិស័យទេសចរណ៍ បានដឹកនាំ កម្មវិធីផ្សព្វផ្សាយនេះ បន្ទាប់ពីរាជរដ្ឋាភិបាលបានដាក់ឱ្យអនុវត្តកាលពីថ្ងៃទី១៧ ខែឧសភា ឆ្នាំ ២០២២ ថ្មីៗនេះ។
កម្មវិធីនេះត្រូវបានរៀបចំទ្បើងក្នុងគោលបំណង ជំរុញការអនុវត្ត និងផ្សព្វផ្សាយកម្មវិធីសហហិរញ្ញប្បទានរបស់រាជរដ្ឋាភិបាល ឱ្យបានលម្អិតដល់ថ្នាក់ដឹកនាំក្រសួងទេសចរណ៍ រដ្ឋបាលថ្នាក់ក្រោមជាតិ ផ្នែកឯកជនក្នុងវិស័យទេសចរណ៍ និងសាលាបណ្តុះបណ្តាលវិជ្ជាជីវៈទេសចរណ៍ ដើម្បីងាយស្រួលក្នុងការភ្ជាប់ទំនាក់ទំនង និងយល់ដឹងពីនីតិវិធី-លក្ខខណ្ឌក្នុងការទទួលបានកម្ចីក្នុងអត្រាការប្រាក់សម្បទាន យកទៅគាំទ្រក្នុងការជួសជុលកែលម្អទីតាំងអាជីវកម្មទេសចរណ៍ ឬធ្វើទំនើបកម្ម-ពិពិធកម្មសេវាកម្មនិងផលិតផលទេសចរណ៍សំដៅត្រៀមខ្លួនទទួលភ្ញៀវទេសចរជាតិ-អន្តរជាតិទ្បើងវិញក្នុងពេលនិងបន្ទាប់ពី វិបត្តិជំងឺកូវីដ១៩ បានធូរស្រាល។ នេះបើយោងតាមក្រសួងទេសចរណ៍។
គម្រោងសហហិរញ្ញប្បទាននេះមានទំហំទឹកប្រាក់កម្ចី ១៥០ លានដុល្លារអាមេរិក ដែលមានបដិភាគរបស់រាជរដ្ឋាភិបាលចំនួន ៧៥ លានដុល្លារអាមេរិក តាមរយៈធនាគារសហគ្រាសធុនតូចនិងមធ្យមកម្ពុជា (SME Bank) និងរបស់គ្រឹះស្ថានហិរញ្ញវត្ថុចូលរួម (PFIs) ចំនួន ៧៥ លានដុល្លារអាមេរិក ដោយផ្តល់អាទិភាពទាំងស្រុងដល់អាជីវកម្មទេសចរណ៍ដែលទទួលរងផលប៉ះពាល់ដោយវិបត្តិជំងឺកូវីដ១៩ ទូទាំងប្រទេស។
ក្រសួងបានបញ្ជាក់ថា ដោយសារឥណទានមានចំនួនកំណត់គ្រឹះស្ថានហិរញ្ញវត្ថុចូលរួមនឹង អនុវត្តគោលការណ៍ទៅមុន ទទួលបានកម្ចីមុន (First come, First served) ដោយទាមទារឱ្យអាជីវកម្មទេសចរណ៍សាកសួរព័ត៌មានពីគ្រឹះស្ថាន ហិរញ្ញវត្ថុចូលរួមឱ្យបានឆាប់ ករណីមានតម្រូវការឥណទានក្នុងគោលដៅខាងលើ៕