.jpg)
អ្នកដំណើរឆ្លងកាត់ស្នាក់ការកណ្ដាលធនាគារអេស៊ីលីដា នាពេលកន្លងទៅ។ ហុង មិនា
ភ្នំពេញៈ ទីភ្នាក់ងារសហប្រតិបត្តិការអន្តរជាតិជប៉ុន (JICA) និងធនាគារ SMBC របស់ជប៉ុនបានចុះហត្ថលេខាលើកិច្ចព្រមព្រៀងផ្តល់សហហិរញ្ញប្បទានចំនួន ១៣៥ លានដុល្លារជាមួយធនាគារអេស៊ីលីដា ដើម្បីពង្រីកប្រាក់កម្ចីបន្ថែមទៀតនៅក្នុងវិស័យកសិកម្មសម្រាប់ឆ្លើយតបទៅនឹងតម្រូវការ។
លោក អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី បានថ្លែងក្នុងពិធីចុះហត្ថលេខាកាលពីថ្ងៃទី ២៧ ខែឧសភាថា គម្រោងសហហិរញ្ញប្បទានរយៈពេលវែង ដែលបានទទួលពីទីភ្នាក់ងារសហប្រតិបត្តិការអន្តរជាតិជប៉ុន និងធនាគារ SMBC ពិតជាមានសារៈសំខាន់ខ្លាំងសម្រាប់ធនាគារ អេស៊ីលីដា ក្នុងការផ្តល់កម្ចីដល់សហគ្រាសខ្នាតតូចបំផុត ខ្នាតតូច និងខ្នាតមធ្យម ដែលមានតម្រូវការឥណទានក្នុងការចាប់ផ្តើម និង/ឬ ការពង្រីកផលិតកម្មកសិកម្ម ដើម្បីបង្កើនប្រាក់ចំណូល។
លោកបានថ្លែងថា៖ «អេស៊ីលីដា ជាធនាគារពាណិជ្ជធំដែលមានបណ្តាញប្រតិបត្តិការច្រើនជាងគេនៅកម្ពុជា។ បណ្តាញប្រតិបត្តិការដ៏សម្បូរបែបផ្តល់ភាពងាយស្រួលជូនដល់ប្រជាជនខ្មែរ គ្រប់មជ្ឈដ្ឋានក្នុងសហគមន៍ ពិសេស អ្នករស់នៅជនបទអាចប្រើប្រាស់សេវាកម្មហិរញ្ញវត្ថុគ្រប់ប្រភេទរបស់ធនាគារ រួមទាំងសេវាកម្មឥណទាន ដែលមានគោលដៅសម្រាប់ពង្រឹង និងពង្រីកវិស័យកសិកម្មនៅតាមជនបទ»។
លោកលើកឡើងថា៖ «ក្នុងកិច្ចខិតខំប្រឹងប្រែងដើម្បីលើកស្ទួយការប្រើប្រាស់ សេវាកម្មហិរញ្ញវត្ថុឱ្យកាន់តែសកម្មនៅតាមជនបទ ទីភ្នាក់ងារសហប្រតិបត្តិការអន្តរជាតិជប៉ុន (JICA) និងធនាគារ SMBC បានផ្តល់សហហិរញ្ញប្បទានចំនួន ១៣៥ លានដុល្លារដល់ធនាគារ អេស៊ីលីដា ដើម្បីផ្តល់កម្ចីដល់វិស័យកសិកម្មនៅកម្ពុជា។ សហហិរញ្ញប្បទាននេះនឹងជួយលើកស្ទួយដល់ផលិតកម្មកសិកម្ម និងការអភិវឌ្ឍសេដ្ឋកិច្ចសង្គម»។
យោងតាម JICA វិស័យកសិកម្មបានដើរតួនាទីយ៉ាងសំខាន់ក្នុងសេដ្ឋកិច្ចកម្ពុជាដែលស្មើនឹងប្រមាណ ២០ ភាគរយនៃផលិតផលក្នុងស្រុកសរុប និង ៣០ ភាគរយនៃការងារ។ ម្យ៉ាងទៀតលទ្ធភាពទទួលបានហិរញ្ញប្បទានក្នុងវិស័យកសិកម្មត្រូវបានកំណត់ត្រឹមប្រហែល ៩ ភាគរយនៃចំនួនប្រាក់កម្ចីសរុបនៅកម្ពុជា ហើយកសិករជាងពាក់កណ្តាលមិនមានលទ្ធភាពទទួលបានហិរញ្ញប្បទានទេ។ ប្រហែល ៩០ ភាគរយនៃប្រជាជនក្រីក្រកម្ពុជារស់នៅតំបន់ជនបទ ដែលប្រហែល ៨០ ភាគរយប្រកបរបរកសិកម្ម ហើយប្រាក់ចំណូលក្នុងតំបន់ទាំងនេះមានត្រឹមពី ៥០-៦០ ភាគរយប៉ុណ្ណោះក្នុងចំណោមប្រជាជននៅក្នុងទីក្រុងដែលបង្កើតឱ្យមានវិសមភាពសេដ្ឋកិច្ច។
JICA បានឱ្យដឹងថា៖ «កម្ចីនេះនឹងរួមចំណែកធ្វើឱ្យប្រសើរឡើងនូវលទ្ធភាពទទួលបានហិរញ្ញប្បទានសម្រាប់កសិករនៅតាមជនបទតាមរយៈធនាគារអេស៊ីលីដា។ ប្រាក់កម្ចីនេះមានគោលបំណងរួមចំណែកដល់កំណើនសេដ្ឋកិច្ចប្រកបដោយចីរភាពនៅក្នុងប្រទេសកម្ពុជាតាមរយៈការគាំទ្រទៅដល់ការពង្រីកការផ្តល់ប្រាក់កម្ចីដល់វិស័យកសិកម្ម»៕ LA
