ភ្នំពេញៈ កំពង់ផែស្វយ័តក្រុងព្រះសីហនុ (PAS) ដែលជាកំពង់ផែសមុទ្រទឹកជ្រៅរបស់ព្រះរាជាណាចក្រកម្ពុជា និងបានចុះបញ្ជីភាគហ៊ុនបានរាយការណ៍ពីកំណើនដ៏រឹងមាំនៃប្រតិបត្តិការនៅក្នុងត្រីមាសទី ១ ឆ្នាំនេះ ដែលឆ្លុះបញ្ចាំងពីការស្ទុះងើបឡើងវិញនៃសកម្មភាពសេដ្ឋកិច្ចក្នុងតំបន់ និងពិភពលោក។
យោងតាមឯកសាររបស់ PAS ដែលផ្ញើឱ្យក្រុមហ៊ុនផ្សារមូលបត្រកម្ពុជាកាលពីថ្ងៃទី ២៧ ខែឧសភា PAS បានបន្តការវិវឌ្ឍយ៉ាងខ្លាំងក្លា ដើម្បីបម្រើសកម្មភាពធុរកិច្ចរបស់ខ្លួនជាលទ្ធផលនៅត្រីមាសទី ១ ឆ្នាំ ២០២២ នេះ PAS ទទួលបានប្រាក់ចំណូលសរុបចំនួនជាង ៩០ ពាន់លានរៀល និងទទួលបានប្រាក់ចំណេញសុទ្ធក្រោយការបង់ពន្ធក្នុងកាលបរិច្ឆេទចំនួនជាង ៣៣ ពាន់លានរៀល។ បើប្រៀបធៀបនឹងត្រីមាសទី ១ ឆ្នាំ ២០២១ ប្រាក់ចំណូលសុទ្ធបានកើនឡើងចំនួនជាង ៩ ពាន់លានរៀលគឺស្មើនឹង ១១,១៨ ភាគរយ ចំណែកប្រាក់ចំណេញសុទ្ធក្រោយការបង់ពន្ធវិញ ថយចុះចំនួនជាង ៣,៧ ពាន់លានរៀល គឺស្មើនឹង ១០,២៣ ភាគរយ។
លោក លូ គីមឈន់ ប្រធានអគ្គនាយក ថ្លែងថា៖ «លទ្ធផលនេះបណ្ដាលមកពីបរិមាណកុងតឺន័រ និងទំនិញឆ្លងកាត់មានការកើនឡើង ប៉ុន្តែការចំណេញពីអត្រាប្តូរប្រាក់យ៉េន (មិនទាន់សម្រេច) មានការថយចុះធៀបនឹងត្រីមាសទី ១ ឆ្នាំ ២០២១ ធ្វើឱ្យប្រាក់ចំណេញសុទ្ធក្រោយការបង់ពន្ធមានការថយចុះ បើធៀបនឹងត្រីមាសទី ១ ឆ្នាំ ២០២១»។
ជាលទ្ធផល ការចំណេញក្នុង ១ ឯកតាមូលបត្រកម្មសិទ្ធិ មានចំនួន ៣៨៥,២៣ រៀល សម្រាប់ត្រីមាសទី ១ ឆ្នាំ ២០២២ នេះ។ ដោយឡែក ក្នុងត្រីមាសទី ១ ឆ្នាំ ២០២២ កុងតឺន័រដែលបានឆ្លងកាត់ PAS មានចំនួន ១៩៨ ១៨២ TEUs ពោលគឺកើនឡើងចំនួន ២៧ ៨១២ TEUs ស្មើនឹង ១៦,៣២ ភាគរយ បើធៀបនឹងត្រីមាសទី ១ ឆ្នាំ ២០២១។
លោក គីមឈន់ បានឱ្យដឹងទៀតថា PAS នឹងបន្តកិច្ចខិតខំប្រឹងប្រែង ដើម្បីបំពេញសេវាកម្ម អាជីវកម្មឱ្យកាន់តែប្រសើរ និងសម្រេចបានលទ្ធផលខ្ពស់ជាប្រយោជន៍ដល់ភាគហ៊ុនិករបស់ខ្លួន។
លោកបន្តថា៖ «PAS បានពង្រឹងប្រសិទ្ធភាពការងារ និងការកសាងហេដ្ឋារចនាសម្ព័ន្ធបន្ថែមទៀត ដើម្បីឆ្លើយតបនឹងកំណើនតម្រូវការសេវាកម្មរបស់អតិថិជន និងការរីកចម្រើនសេដ្ឋកិច្ចជាតិ»។ លោកបានពន្យល់ថា ដោយសារតែការកើនឡើងបរិមាណទំនិញ និងកុងតឺន័រឆ្លងកាត់ PAS បានធ្វើការកែសម្រួលផែច្រាំងថ្មី (សាងសង់ឆ្នាំ ១៩៦៩ ប្រវែង ៣៥០ ម៉ែត្រ) ទៅជាចំណតផែកុងតឺន័រប្រវែង ២៤៣ ម៉ែត្រ ដើម្បីក្លាយជាចំណតផែកុងតឺន័រមួយបន្ថែមទៀត ដែលបច្ចុប្បន្នមានត្រឹមតែ ២ ចំណតប៉ុណ្ណោះ។
PAS កំពុងអនុវត្តគម្រោងអភិវឌ្ឍន៍ផែកុងតឺន័រថ្មី (ជំហានទី ១) ប្រវែង ៣៥០ ម៉ែត្រ និងមានជម្រៅទឹក ១៤,៥ ម៉ែត្រ រួមបញ្ចូលទាំងការបំពាក់គ្រឿងចក្រលើកដាក់កុងតឺន័រទំនើប ប្រភេទ QC ចំនួន ៣ គ្រឿង និងប្រភេទ RTG ចំនួន ៩ គ្រឿង រថលើកកុងតឺន័រទទេ (Empty Reach Stackers) ចំនួន ២ គ្រឿង ក្បាលសណ្ដោងកុងតឺន័រចំនួន ១៦ គ្រឿង និងប្រព័ន្ធគ្រប់គ្រងចំណតផែកុងតឺន័រស្វ័យប្រវត្តិកម្ម ៩ កំប្លេ។
លោកលើកឡើងថា៖ «សម្រាប់ចំណតផែកុងតឺន័រថ្មីនេះអាចអនុញ្ញាតឱ្យនាវាដឹកជញ្ជូនកុងតឺន័រធុនធំក្នុងតំបន់ចូលចតនៅផែបាន ដែលនឹងធ្វើឱ្យឧបសគ្គអំពីជម្រៅទឹកសម្រាប់កំពង់ផែត្រូវបានដោះស្រាយ ព្រមទាំងតម្លៃដឹកជញ្ជូនតាមសមុទ្រមានតម្លៃប្រហាក់ប្រហែលបណ្ដាប្រទេសជិតខាង និងក្នុងតំបន់ ដែលជាការរួមចំណែកដល់ការជួយសម្រួលផ្នែកពាណិជ្ជកម្ម និងការអភិវឌ្ឍសេដ្ឋកិច្ចសង្គមកម្ពុជា»។
លោកបន្ថែមថា តាមការរំពឹងទុក គម្រោងនេះនឹងគ្រោងបញ្ចប់ការសាងសង់នៅពាក់កណ្ដាលឆ្នាំ ២០២៥ ហើយសមត្ថភាពលើកដាក់កុងតឺន័រដល់ ១ ១៥០ ០០០ TEUs ក្នុង ១ ឆ្នាំ នៅពេលដែលចំណតផែកុងតឺន័រនេះដាក់ឱ្យប្រតិបត្តិការនៅឆ្នាំ ២០២៥ ខាងមុខ៕ LA