The Phnom Penh Post Search

Search form




Logo of Phnom Penh Post newspaper Phnom Penh Post - ការនាំចេញ​សណ្តែកសៀង និង​សណ្តែក​បាយ​មាន​ទឹកប្រាក់ ជាង $៥០០​ លាន

ការនាំចេញ​សណ្តែកសៀង និង​សណ្តែក​បាយ​មាន​ទឹកប្រាក់ ជាង $៥០០​ លាន

Content image - Phnom Penh Post
ចម្ការសណ្ដែកបាយ។ កម្ពុជា​នាំចេញ​គ្រាប់​សណ្តែកសៀង និង​សណ្តែកបាយ ចំនួន ៦៤ ៦៦០ ​តោន នៅក្នុង​រយៈពេល​ ៤​ ខែ​ដើមឆ្នាំ​ ២០២២។ រូបថត YOUTUBE

ការនាំចេញ​សណ្តែកសៀង និង​សណ្តែក​បាយ​មាន​ទឹកប្រាក់ ជាង $៥០០​ លាន

ភ្នំពេញៈ កម្ពុជា​នាំចេញ​គ្រាប់​សណ្តែកសៀង និង​សណ្តែកបាយ ចំនួន ៦៤ ៦៦០ ​តោន នៅក្នុង​រយៈពេល​ ៤​ ខែ​ដើមឆ្នាំ​ ២០២២ កើនឡើង​ប្រមាណ ១០០​ ភាគរយ​រៀង​គ្នា បើ​ធៀប​នឹង​រយៈពេល​ដូចគ្នា​ក្នុង​ឆ្នាំ​ ២០២១ ខណៈ​ប្រទេស​វៀតណាម គឺជា​ទីផ្សារ​ទទួល​ទិញ​ធំជាងគេ​។ នេះ​បើ​យោងតាម​ទិន្នន័យ​ពី​ក្រសួង​កសិកម្ម រុក្ខាប្រមាញ់ និង​នេសាទ​។

របាយការណ៍​សភាពការណ៍​កសិកម្ម​ប្រចាំ​ខែមេសា ឆ្នាំ​ ២០២២ របស់​ក្រសួង​កសិកម្ម​បង្ហាញថា គិត​ចាប់ពី​ខែមករា ដល់​ខែមេសា ឆ្នាំ​ ២០២២ ការនាំចេញ​គ្រាប់​សណ្តែកសៀង សម្រេច​បាន​ចំនួន ៥៣ ៩៦០ ​តោន កើនឡើង ១០០ ​ភាគរយ​បើ​ធៀប​នឹង​រយៈពេល​ដូចគ្នា​ឆ្នាំ​ ២០២១ ក្នុងនោះ​ប្រទេស​វៀតណាម​ទទួល​ទិញ ៥១ ៧១០ ​តោន និង​ថៃ ២ ២៥០ ​តោន​។ ចំណែក​ការនាំចេញ​សណ្តែកបាយ​មាន​ចំនួន ១០ ៧០០ ​តោន កើនឡើង ១០០ ​ភាគរយ ដែល​ការនាំចេញ​ទាំងអស់​គឺ​ទៅ​ប្រទេស​វៀតណាម​។

ទោះយ៉ាងណា​របាយការណ៍​ក្រសួង​កសិកម្ម មិន​បង្ហាញ​ពី​ចំនួន​ទឹកប្រាក់​ដែល​កម្ពុជា​ទទួលបាន​ពី​ការនាំចេញ​សណ្តែកសៀង និង​សណ្តែកបាយ​ទេ ដោយ​ក្រសួង​គ្រាន់តែ​បញ្ជាក់ថា ការនាំចេញ​កសិផល​ក្រៅពី​ស្រូវអង្ករ (​ដំឡូងមី​, គ្រាប់ស្វាយចន្ទី​, ពោត​, ផ្លែ​ចេក​ស្រស់​, ស្វាយ ដូងប្រេង​, ថ្នាំជក់​, ម្រេច​, ក្រូច​ត្លុង​, និង​បន្លែ ជាដើម​) ​ក្នុង​រយៈពេល ៤ ​ខែ មាន​ទឹកប្រាក់​សរុប​ជាង ១ ០៨៧,១៨ ​លាន​ដុល្លារ​។

ប្រធាន​មន្ទីរ​កសិកម្ម រុក្ខាប្រមាញ់ និង​នេសាទ ខេត្តព្រៃវែង លោក អ៊ុក សំណាង បាន​ប្រាប់​ភ្នំពេញ​ប៉ុស្តិ៍​ក្នុង​ថ្ងៃទី​ ៣១ ខែឧសភា​ថា កំណើន​ទិន្នផល​ដែល​កសិករ​ប្រមូលបាន និង​កិច្ចខិតខំ​ជួយ​សម្របសម្រួល​របស់​អាជ្ញាធរខេត្ត​បាន​ធ្វើឱ្យ​ការនាំចេញ​កសិផល​ពី​ខេត្ត​ព្រៃវែង​ទៅ​ប្រទេស​វៀតណាម​កើន​ជា​លំដាប់​។ លោក​បាន​បន្តថា សម្រាប់​បរិមាណ​នាំចេញ​សរុប​របស់​សណ្តែកសៀង និង​សណ្តែកបាយ លោក​មិនមាន​ទិន្នន័យ​ទេ ខណៈ​តម្លៃ​ក្នុង​ឆ្នាំនេះ​ប្រហាក់ប្រហែល​នឹង​ឆ្នាំមុន​ដែរ​។

លោក​លើកឡើង​ថា​៖ «​ការនាំចេញ​កសិផល​ពី​កម្ពុជា​ទៅ​វៀតណាម​បានបង្ហាញ​ពី​សញ្ញា​វិជ្ជមាន​ស្ទើរ​គ្រប់មុខ​ទំនិញ ពិសេស​ការនាំចេញ​ស្រូវ​។ កំណើន​នេះ​នឹងមាន​ច្រើន​បន្ថែមទៀត ខណៈ​ការដាំដុះ​ក្នុង​វិស័យ​កសិកម្ម​កំពុង​កើនឡើង​»​។

បើតាម​លោក សំណាង នៅក្នុង​ខេត្ត​ព្រៃវែង​មាន​ច្រក​នាំចេញ​កសិផល​ធំៗ​ចំនួន​ ២ គឺ​ច្រក​បន្ទាយ​ចក្រី​ (​ស្រុក​ព្រះស្តេច​) និង​ច្រក​កោះរកា​ (​ស្រុក​ពាមជរ​)​។

អ្នកស្រាវជ្រាវ​សេដ្ឋកិច្ច​នៃ​រាជបណ្ឌិត្យ​សភា​កម្ពុជា លោក ហុង វណ្ណៈ បាន​ប្រាប់ថា ទិន្នន័យ​នេះ​បញ្ជាក់ថា ទិន្នផល​ក្នុង​វិស័យ​កសិកម្ម​នៅ​កម្ពុជា​កំពុង​កើនឡើង ជាពិសេស​បន្ទាប់ពី​រាជរដ្ឋាភិបាល​ដាក់ចេញ​នូវ​យុទ្ធសាស្ត្រ​ថ្មីៗ​ជាច្រើន​ក្នុងន័យ​ធ្វើយ៉ាងណា​ឱ្យ​កម្ពុជា​អាច​ធានា​បាន​ឯករាជភាព​សម្រាប់​ការផ្គត់ផ្គង់​ចំណី​អាហារ​ក្នុងស្រុក និង​បង្កើន​សក្តានុពល​នាំចេញ​។ លោក​បន្តថា ជាក់ស្តែង​ក្នុង​ពេលនេះ​ចំនួន​នៃ​ការបណ្តាក់ទុន​ក្នុង​វិស័យ​កសិកម្ម​នៅ​កម្ពុជា ក៏​កំពុង​កើនឡើង​ដែរ​។

លោក​អះអាង​ថា​៖ «​វឌ្ឍនភាព​នៃ​កំណើន​នាំចេញ​កសិផល​នេះ​មិន​ត្រឹមតែ​ជួយ​ធ្វើឱ្យ​ប្រជាកសិករ និង​រដ្ឋាភិបាល​ទទួល​បាន​ចំណូល​បន្ថែម​ប៉ុណ្ណោះ​ទេ ប៉ុន្តែ​ក៏​កំពុង​ជួយ​បង្កើន​នូវ​ទំនុកចិត្ត​របស់​ប្រទេស​នានា​ក្នុង​ការប្រមូលទិញ​កសិផល​ពី​កម្ពុជា​ផងដែរ​»​។

អាជីវករ​លក់​សណ្តែក​គ្រប់​ប្រភេទ ក្នុង​ផ្សារ​អូរឫស្សី អ្នកស្រី នាក់ ភាព បាន​ប្រាប់ថា តម្លៃ​សណ្តែកសៀង និង​សណ្តែកបាយ ក្នុងឆ្នាំនេះ​បាន​កើនឡើង​តិចតួច​ធៀប​នឹង​ឆ្នាំមុន ប៉ុន្តែ​ការលក់​ឆ្នាំនេះ​ល្អ​ជាង​មុន​។ អ្នកស្រី​បន្តថា នៅពេល​នេះ​សណ្តែកសៀង​ (​លេខ​ ១) មានតម្លៃ​ជា​មធ្យម​ (​លក់ដុំ​) ៣ ៨០០​ រៀល​ក្នុង​ ១ ​គីឡូក្រាម កើនឡើង​ពី ៣ ២០០​ រៀល នា​រយៈពេល​ដូចគ្នា​ឆ្នាំមុន និង​សណ្តែកបាយ​ (​លេខ​ ១) មានតម្លៃ ៥ ២០០ ​រៀល ដោយ​តម្លៃ​នេះ​ប្រហាក់​ប្រហែល​នឹង​ឆ្នាំមុន​។

អ្នកស្រី​ប្រាប់ទៀត​ថា ដោយសារ​ផលិតផល​សណ្តែក​ទាំង​ ២ សុទ្ធតែ​ស្តុក​ទុក​បានយូរ ដូច្នេះ​តម្លៃ​វា​មិនសូវ​ប្រែប្រួល​ដូច​ផលិតផល​មួយចំនួន​មាន​តាម​រដូវ​នោះទេ​។

បើ​យោង​តាម​ក្រសួង​កសិកម្ម ក្នុង​ឆ្នាំ ​២០២១ កម្ពុជា​បាន​នាំចេញ គ្រាប់​សណ្តែកសៀង ១០៥ ៦៥៥,០៤ ​តោន កើនឡើង ២៦៤,២៤ ​ភាគរយ ដោយ​នាំទៅ​ប្រទេស​វៀតណាម ៨២ ៧០៥​ តោន​, ថៃ ២២ ៩៥០ ​តោន និង​អារ៉ាប់ ០,០៤ ​តោន​។ ការនាំចេញ​សណ្ដែកបាយ​មាន​ចំនួន ២៩ ១៩២,៣៥ ​តោន កើនឡើង ១៨៩,៦១ ​ភាគរយ នាំទៅ​វៀតណាម ២៩ ១៧០ ​តោន និង​កោះ​តៃវ៉ាន់ ២២,៣៥ ​តោន​៕ LA

អត្ថបទគួរចាប់អារម្មណ៍