The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​រំពឹង​នឹង​ទទួលបាន​កំណើន​ភ្ញៀវទេសចរ​បរទេស​តាម​ច្រករបៀង​ពី​ប្រទេស​ជិតខាង

កម្ពុជា​រំពឹង​នឹង​ទទួលបាន​កំណើន​ភ្ញៀវទេសចរ​បរទេស​តាម​ច្រករបៀង​ពី​ប្រទេស​ជិតខាង

Content image - Phnom Penh Post
ច្រកព្រំដែនព្រែកចាក កម្ពុជា-វៀតណាម នាពេលកន្លងទៅ។ ហុង មិនា

កម្ពុជា​រំពឹង​នឹង​ទទួលបាន​កំណើន​ភ្ញៀវទេសចរ​បរទេស​តាម​ច្រករបៀង​ពី​ប្រទេស​ជិតខាង

កែបៈ កម្ពុជា​រំពឹង​ទទួល​បាន​កំណើន​ភ្ញៀវទេសចរ​អន្តរជាតិ​តាម​ច្រករបៀង​ខាងត្បូង​ជាមួយ​ប្រទេស​វៀតណាម និង​ថៃ​កាន់តែ​ច្រើន ក្រោយពី​មាន​ការសម្រួល​ឱ្យមាន​ការធ្វើ​ដំណើរ​កាន់តែ​ងាយស្រួល​ជាង​មុន​។

នៅក្នុង​សិក្ខាសាលា​ផ្សព្វផ្សាយ​ស្ដីពី​បទដ្ឋាន​គតិយុត្ត​នានា​ក្នុង​ការ​គ្រប់គ្រង និង​អភិវឌ្ឍ​តំបន់ឆ្នេរ​សមុទ្រ​កាលពី​ថ្ងៃទី​ ៣០ ខែឧសភា នៅ​សាលាខេត្ត​កែប រដ្ឋមន្ត្រី​ក្រសួង​ទេសចរណ៍ លោក ថោង ខុន បាន​ថ្លែងថា ការរៀបចំ​គ្រប់គ្រង និង​អភិវឌ្ឍ​តំបន់ឆ្នេរ​ឱ្យបាន​ត្រឹមត្រូវ គឺ​ដើម្បី​ទាក់ទាញ​ភ្ញៀវទេសចរ​បាន​កាន់តែ​ច្រើន ខណៈ​កន្លងទៅ​តំបន់ឆ្នេរ​បាន​ទាក់ទាញ​ទេសចរ​ផ្ទៃក្នុង​យ៉ាងច្រើន​។ លោក​បាន​បន្ថែមថា កម្ពុជា​ក៏មាន​កិច្ចសហប្រតិបត្តិ​ការជំរុញ​ចលនា​ភ្ញៀវទេសចរ​តាម​តំបន់ឆ្នេរ​ជាមួយ​ប្រទេស​ជិតខាង គឺ​វៀតណាម និង​ថៃ បន្ទាប់ពី​ប្រទេស​ទាំង​ ២ ​នេះ​បាន​សម្រេច​បើក​ឱ្យមាន​ការធ្វើ​ដំណើរ​សម្រាប់​ភ្ញៀវទេសចរ​ឡើងវិញ​។

លោក​លើកឡើង​ថា​៖ «​ក្នុង​តំបន់ឆ្នេរ​របស់​យើង​ក៏មាន​ការអភិវឌ្ឍ​ក្នុង​ក្របខ័ណ្ឌ Southern Corridor របៀង​ខាងត្បូង​ដែល​ជាប់​ជាមួយ​វៀតណាម និង​ថៃ​។ ប្រសិនបើ​ការអភិវឌ្ឍ​ខេត្តកំពត ខេត្ត​កែប ដំណើរការ​ល្អ​នោះ កម្ពុជា​នឹង​អាច​ទាក់ទាញ​ភ្ញៀវទេសចរ​ពី​ប្រទេស​វៀតណាម​ ​បាន​ច្រើន តាមរយៈ​ការតភ្ជាប់​ផ្លូវ​ធ្វើដំណើរ​ចេញពី​ច្រកព្រំដែន តាមរយៈ​នាវា​ល្បឿន​លឿន​ភ្ជាប់​គោលដៅ​ទេសចរណ៍​ពី​កោះត្រល់​ (​ហ្វូគុក​) មក​កំពង់ផែ​ខេត្តកំពត និង​កំពង់ផែ​ក្នុង​ខេត្ត​កែប​។ ទន្ទឹមនឹងនោះ​ទេសចរ​មកពី​ប្រទេស​ថៃ​ក៏​អាច​ធ្វើ​ដំណើរ​មក​តាម​ភាគ​ខាងត្បូង​ចូលមក​តាម​ខេត្តកោះកុង​បន្ត​មក​ខេត្ត​ព្រះសីហនុ និង​ខេត្ត​ផ្សេងទៀត​តាម​តំបន់ឆ្នេរ ក៏ដូចជា​តំបន់​អេកូ-​ទេសចរណ៍​ផងដែរ​»​។

លោក ថោង ខុន បាន​បន្ថែមថា ក្នុង​បរិបទ​នៃ​ការរីក​រាលដាល​ជំងឺ​កូវីដ​ ១៩ នៅ​ទូទាំង​សកលលោក ព្រមទាំង​វិបត្តិ​សង្គ្រាម​រុស្ស៊ី​-​អ៊ុយក្រែន និង​វិបត្តិ​ប្រេង​ឡើងថ្លៃ​ផង​នោះ ប្រទេស​ជា​សមាជិក​អាស៊ាន​មានតែ​ខិតខំ​ទាក់ទាញ​ភ្ញៀវ​ពីគ្នា​ទៅវិញ​ទៅមក​ក្នុង​តំបន់​ ជាពិសេស​ទេសចរ​ពី​ប្រទេស​នៅ​ជិតខាង​ទាំង​ផ្លូវគោក ផ្លូវអាកាស និង​ផ្លូវទឹក​។

លោក សោម ពិសិដ្ឋ អភិបាលខេត្ត​កែប​បាន​ប្រាប់​ភ្នំពេញ​ប៉ុស្តិ៍​ថា ដោយសារ​តែ​ខេត្ត​កែប​មិនមាន​ព្រំដែន​គោក​ជាមួយ​ប្រទេស​ជិតខាង ដូចនេះ​មិនទាន់​មាន​ការបើក​ជា​ផ្លូវការ ឬ​ចល័ត​ភ្ញៀវទេសចរ​នៅឡើយ​ទេ​។

លោក​បញ្ជាក់ថា​៖ «​តាម​ការណែនាំ​របស់​ឯកឧត្តម ថោង ខុន រដ្ឋមន្ត្រី​ក្រសួង​ទេសចរណ៍ និង​ជា​អនុប្រធាន​អចិន្ត្រៃយ៍​គណៈកម្មការ​ជាតិ​អភិវឌ្ឍន៍​ឆ្នេរសមុទ្រ​កម្ពុជា ដោយសារ​ប្រទេស​ជិតខាង​បាន​បើក​ឡើងវិញ​ហើយ ដូចនេះ​យើង​កំពុង​សិក្សា និង​ស្នើសុំ​គោលការណ៍​ពី​ថ្នាក់ដឹកនាំ​ក្រសួង​មហាផ្ទៃ​អំពី​កម្រិត​នៃ​ការរៀបចំ​ច្រកព្រំដែន​ជា​កម្រិត​ទ្វេភាគី តំបន់ ឬ​អន្តរជាតិ​។ ដោយឡែក សម្រាប់​ស្ថានភាព​ទេសចរណ៍​ក្នុង​ខេត្ត​កែប​បច្ចុប្បន្ន​គឺ​ទទួល​ត្រឹម​ភ្ញៀវទេសចរ​ក្នុងស្រុក និង​មាន​ភ្ញៀវ​អន្តរជាតិ​ខ្លះ​ដែរ​»​។

លោក សយ ស៊ីណុល ប្រធាន​មន្ទីរ​ទេសចរណ៍​ខេត្តកំពត​បាន​ប្រាប់ថា នៅ​ខេត្តកំពត​មាន​ច្រក​អន្តរជាតិ​ព្រែកចាក និង​ច្រក​ទ្វេភាគី​ទាន់ហន់ ដែល​ច្រក​ទាំង​ ២​ កាលពី​មិនទាន់​មាន​កូវីដ​-១៩ ទទួល​បាន​ភ្ញៀវទេសចរ​អន្តរជាតិ​ប្រមាណ ១៨ ​ម៉ឺន​នាក់​ក្នុង​ ១ ​ឆ្នាំ​។

លោក​ប្រាប់ថា​៖ «​បច្ចុប្បន្ន​ប្រទេស​ថៃ​បាន​បើក​ពេញលេញ​ហើយ នៅតែ​វៀតណាម​មិន​បាន​បើក​ពេញលេញ​។ ដូចនេះ​យើង​រំពឹងថា នៅពេល​ប្រទេស​ទាំង​ ២ ​នេះ​បើក​ពេញលេញ​ឡើងវិញ​ដូចគ្នា លំហូរ​ទេសចរ​មក​តាម​ច្រក​ព្រំដែន​នឹងមាន​កំណើន​ឡើងវិញ​»​។

ទីប្រឹក្សា​សមាគម​ទីភ្នាក់ងារ​ទេសចរណ៍​កម្ពុជា លោក ហូ វណ្ឌី បានឱ្យ​ដឹងថា នៅមុន​ពេល​មាន​វិបត្តិ​កូវីដ​ ១៩ ចំនួន​ភ្ញៀវទេសចរ​បរទេស​ដែល​មក​កម្សាន្ត​នៅ​កម្ពុជា​តាម​ច្រករបៀង មាន​ចន្លោះ​ពី ១០-២៥ ​ភាគរយ​នៃ​ចំនួន​ភ្ញៀវទេសចរ​អន្តរជាតិ​សរុប​ប្រចាំឆ្នាំ​។

លោក​និយាយថា​៖ «​ខ្ញុំ​ជឿថា ចាប់ពី​រដូវរំហើយ​ទៅ​ភ្ញៀវទេសចរ​នឹង​មក​កម្ពុជា​ច្រើន​តាម​ច្រករបៀង​កម្ពុជា​-​ថៃ និង​ច្រករបៀង​ជាមួយនឹង​វៀតណាម​។ បើ​ប្រទេស​ឡាវ​បើក​ទៀត នឹងមាន​ការចេញចូល​កាន់តែ​ច្រើនរ​វាង​ប្រទេស​ជិតខាង​ទាំង ៣ ដែល​នឹង​ផ្តល់​ផលប្រយោជន៍​ទាំងសងខាង​»​។

បើតាម​ក្រសួង​ទេសចរណ៍ កម្ពុជា វៀតណាម និង​ថៃ​បាន​ដាក់​ចេញរួច​ហើយ​នូវ​កិច្ចសហប្រតិបត្តិការ​ច្រករបៀង​សេដ្ឋកិច្ច​កម្ពុជា វៀតណាម ថៃ ឬ​ហៅថា CVTEC (Cambodia Vietnam Thailand Economic Corridor) ក្នុងនោះ​ក៏មាន​ការជំរុញ​ចលនា​ភ្ញៀវទេសចរ​ពីគ្នា​ទៅវិញ​ទៅមក​ផងដែរ ខណៈ​ខេត្ត​-​ក្រុង ដែល​ពាក់ព័ន្ធ​នឹង​កិច្ចសហប្រតិបត្តិការ CVTEC នេះ រួមមាន ខេត្ត​ជលបុរី ខេត្ត​រ៉ាក់យ៉ង ខេត្ត​ចន្ទបុរី ខេត្ត​ត្រាត ខេត្ត​កោះកុង ខេត្ត​ព្រះសីហនុ ខេត្ត​កំពត ខេត្ត​កែប និង​ខេត្ត​គៀងយ៉ាង និង​ទីក្រុង​កាន់ថឺរ ជាដើម​៕ LA

អត្ថបទគួរចាប់អារម្មណ៍