ភ្នំពេញៈ កម្ពុជាបាននាំចេញដូងប្រេងឆៅទៅក្រៅប្រទេសជាង ២ ម៉ឺនតោន ក្នុងរយៈពេល ៥ ខែដើមឆ្នាំ ២០២២ នេះ ថយចុះជាង ៦ ភាគរយ បើធៀបនឹងរយៈពេលដូចគ្នាឆ្នាំ ២០២១។
ទិន្នន័យក្រសួងកសិកម្ម រុក្ខាប្រមាញ់ និងនេសាទឱ្យដឹងថា ការនាំចេញដូងប្រេង ចាប់ពីខែមករា-ឧសភា ឆ្នាំ ២០២១ មានចំនួន ២០ ៤៩២ តោន ថយចុះ ៦,០៧ ភាគរយ ដោយក្នុងនោះការនាំចេញទៅប្រទេសឥណ្ឌាមានចំនួន ១៧ ១០០ តោន, ម៉ាឡេស៊ី ៣ ២០០ តោន និងថៃចំនួន ១៩២ តោន។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានប្រាប់ភ្នំពេញប៉ុស្តិ៍ថា កម្ពុជាមិនមែនជាកន្លែងដាំដូងប្រេងច្រើនទេ ដោយសព្វថ្ងៃមានតែចម្ការដូងប្រេងរបស់លោក ម៉ុង ឫទ្ធី ប៉ុណ្ណោះ។ ម្យ៉ាងទៀតដំណាំដូងប្រេងនេះកាន់តែមានអាយុច្រើនដែលធ្វើឱ្យទិន្នផលថមថយ។ លោកបន្តថា ចំពោះបញ្ហាមួយទៀតគឺដោយសារបញ្ហាខ្សែចង្វាក់ផលិតកម្មរបស់ពិភពលោកដែលពាក់ព័ន្ធនឹងការដឹកជញ្ជូន និងតម្រូវការទីផ្សារជាដើមមានការធ្លាក់ចុះ។
លោកថ្លែងថា៖ «វិបត្តិកូវីដ ១៩ បានធ្វើប៉ះពាល់ដល់ការនាំចេញកសិផល។ ក្នុងនោះការនាំចេញដូងប្រេងក៏ដូចគ្នាដែរ ដោយសារតែតម្លៃឥន្ធនៈឡើងថ្លៃ នាំឱ្យការដឹកជញ្ជូនឡើងថ្លៃ ទើបក្រុមឈ្មួញងាកមកជំរុញការកែច្នៃសម្រាប់ប្រើប្រាស់នៅក្នុងស្រុកវិញ»។
លោក ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុប បានប្រាប់ភ្នំពេញប៉ុស្តិ៍ថា ការនាំចេញដូងប្រេងពិតជាមានការថយចុះ ប៉ុន្តែចំនួនផលិតកម្មមិនថយចុះទេ ដោយសារលោកបានបង្វែរយកមកធ្វើជាវត្ថុធាតុដើមផលិតចំណីសត្វ និងផលិតជាផលិតផលផ្សេងៗទៀតជាច្រើននៅក្នុងប្រទេស។
លោកបន្ថែមថា បច្ចុប្បន្នដោយសារមានការកើនឡើងនៃរោងចក្រផលិតចំណីសត្វទើបជំរុញឱ្យមានតម្រូវការដូងប្រេងក្នុងស្រុកកើនឡើង ខណៈប្រជាពលរដ្ឋខ្មែរមួយចំនួនបានងាកមកប្រើប្រាស់ប្រេងដូងជំនួសប្រេងឆាវិញសម្រាប់ការប្រើប្រាស់ប្រចាំថ្ងៃ ដោយសារប្រេងឆាមានកាឡូរីខ្ពស់ពេក។
លោកបញ្ជាក់ថា៖ «ការប្រើប្រេងដូងធ្វើជាវត្ថុធាតុដើមសម្រាប់ផលិតចំណីសត្វ និងផលិតជាផលិតផលផ្សេងៗមានជាយូរមកហើយ គ្រាន់តែតម្រូវការពេលនេះកើនឡើងជាបន្តបន្ទាប់ ជាពិសេសក្នុងឆ្នាំ ២០២២ មានតម្រូវការច្រើន។ យើងចង់បង្កើតរោងចក្រកែច្នៃប្រេងដូងនេះដែរ ដោយការចំណាយខ្ទង់ ២៥ លានដុល្លារ។ ម្យ៉ាងវិញទៀតប្រេងដូងឆៅរបស់យើង ក៏មិនមានគ្រប់គ្រាន់សម្រាប់កែច្នៃនោះទេ»។
លោកបានបន្តថា ក្រុមហ៊ុន ម៉ុងឫទ្ធី គ្រុប មានទិសដៅពង្រីកការដាំដុះឱ្យកើនដល់ ៣០ ០០០ ហិកតា ខណៈបច្ចុប្បន្នមានត្រឹមតែប្រមាណ ២០ ០០០ ហិកតាប៉ុណ្ណោះ។
តាមរបាយការណ៍ពីក្រសួងកសិកម្ម កាលពីឆ្នាំ ២០២១ កម្ពុជានាំចេញដូងប្រេងឆៅទៅក្រៅប្រទេសក្នុងតម្លៃជាង ៦៦ លានដុល្លារ ដែលមានបរិមាណជិត ៣៦ ម៉ឺនតោនកើន ១៧៦ ភាគរយ បើធៀបឆ្នាំ ២០២០៕ LA