.jpg)
ភ្នំពេញៈ ម្រេចចំនួន ៥ ៥៥៨,៥៨ តោន ត្រូវបានកម្ពុជានាំចេញទៅលក់នៅទីផ្សារអន្តរជាតិក្នុងរយៈពេល ៥ ខែឆ្នាំ ២០២២ ធ្លាក់ចុះជាង ២៥,៥ ភាគរយបើធៀបនឹងរយៈពេលដូចគ្នាឆ្នាំ ២០២១។ នេះបើយោងតាមទិន្នន័យក្រសួងកសិកម្ម រុក្ខាប្រមាញ់ និងនេសាទ។
យោងតាមក្រសួងកសិកម្មទិន្នផលម្រេចដែលនាំចេញនោះរួមមាន ទៅប្រទេសវៀតណាម ចំនួន ៥ ១៣១,៥១តោន, ប្រទេសអាល្លឺម៉ង់ ៣៥៥,៧៨តោន, កោះតៃវ៉ាន់ ២១តោន, ម៉ាឡេស៊ី ១៣,៦៤តោន, ប្រទេសបារាំង ១០,៥១តោន, ប៊ែលហ្ស៊ិក ៨,៨០តោន សាធារណរដ្ឋឆេក ៧,៨៨តោន, ជប៉ុន ២,៤៧តោន, ស៊ុយអ៊ែត ២,៣៦តោន, កាណាដា ១,២៨តោន, អាមេរិក ០,៩២តោន, ឥណ្ឌា ០,៩២តោន, ចក្រភពអង់គ្លេស ០,៩០តោន, កាហ្សាក់ស្ថាន ០,២៩តោន, កូរ៉េ ០,២២តោន និងប្រទេសអូស្ត្រាលី ចំនួន ០,១០តោន។
ក្រសួងកសិកម្ម បានឱ្យដឹងថា ការធ្លាក់ចុះបរិមាណនាំចេញម្រេចនៅពេលនេះអាចបណ្តាលមកពីមានការរឹតបន្តឹង និងការត្រួតពិនិត្យទំនិញយ៉ាងតឹងរ៉ឹង ដើម្បីទប់ស្កាត់ការរាលដាលឆ្លងកូវីដ១៩ ពិសេសប្រទេសជិតខាង។
ប្រធានសមាគមម្រេចកំពត លោក ងួន ឡាយ បានប្រាប់ភ្នំពេញប៉ុស្តិ៍ថា ការប្រមូលផលម្រេចកំពុងសម្រុកធ្វើ ខណៈតម្លៃឈ្មួញប្រមូលទិញ គឺប្រហាក់ប្រហែលនឹងឆ្នាំមុនដែរ។
លោកបញ្ជាក់ថា៖ «តម្លៃ និងទិន្នផលម្រេចឆ្នាំនេះ ប្រហាក់ប្រហែលនឹងឆ្នាំ ២០២១ ដែរ ដោយសារតែមិនសូវរងផលប៉ះពាល់ពីអាកាសធាតុ»។
លោកបន្ថែមថា បច្ចុប្បន្នមានក្រុមហ៊ុនប្រមាណ ៨ ក្នុងចំណោមក្រុមហ៊ុនជាង ៣០ ដែលបានចុះកុងត្រាជាមួយដៃគូ ដើម្បីនាំចេញទៅក្រៅប្រទេស៕
