ភ្នំពេញៈ លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក(PATA) បានឱ្យដឹងថា ការរុះរើភាគហ៊ុនិករបស់ក្រុមហ៊ុនអាកាសចរណ៍ Cambodia Angkor Air នឹងធ្វើឱ្យក្រុមហ៊ុននេះអាចដើរតួនាទីជាក្រុមហ៊ុនអាកាសចរណ៍ជាតិមួយក្នុងការពង្រីកជើងហោះហើរទៅកាន់ទីផ្សារថ្មីៗ និងធំៗនៅជុំវិញពិភពលោក។
ការលើកឡើងរបស់លោក ស៊ីណាន ធ្វើឡើងបន្ទាប់ពីក្រុមហ៊ុនអាកាសចរណ៍វៀតណាម Vietnam Airlines បានប្រកាសពីការលក់ភាគហ៊ុនរបស់ក្រុមហ៊ុន Vietnam Airlines ចំនួន ៣៥ ភាគរយទៅឱ្យក្រុមហ៊ុនដ៏ធំរបស់ប្រទេសចិន។
លោក ស៊ីណាន បានថ្លែងថា កន្លងមក Cambodia Angkor Air មិនទាន់បានដំណើរការជាក្រុមហ៊ុនអាកាសចរណ៍ជាតិឡើយ ដោយសារតែក្រុមហ៊ុននេះមិនបានធ្វើការតភ្ជាប់ទៅកាន់ទិសដៅនានាឡើយ។
លោកថ្លែងថា៖ «ខ្ញុំមិនខ្វល់ថា តើភាគហ៊ុនិកណាទិញនោះទេ សំខាន់បើសិនគាត់តាំងចិត្តជាក្រុមហ៊ុនអាកាសចរណ៍ជាតិគាត់ត្រូវបំពេញកាតព្វកិច្ចក្នុងការភ្ជាប់ទៅកាន់ទីផ្សារធំៗ និងថ្មីដើម្បីបើកមុខដល់ក្រុមហ៊ុនអាកាសចរណ៍ឯកជនក្នុងការតភ្ជាប់តាមក្រោយ»។
បើយោងតាមលោក តឹករ៉េត សំរេច ប្រធានក្រុមប្រឹក្សាភិបាលក្រុមហ៊ុន Cambodia Angkor Air ដែលបានប្រាប់សារព័ត៌មាន Fresh News កាលពីថ្ងៃទី ៣ ខែមិថុនា បានឱ្យដឹងថា ក្រុមហ៊ុន Vietnam Airlines បានចរចាលក់ភាគហ៊ុនរបស់ខ្លួនតាំងពីមុនពេលមានការរីករាលដាលជំងឺកូវីដ ១៩ មកម្ល៉េះ ប៉ុន្តែដោយសារតែវិបត្តិកូវីដ ១៩ ការលក់ត្រូវបានអូសបន្លាយពេលរហូតដល់ពេលថ្មីៗនេះ។ ភ្នំពេញប៉ុស្ដិ៍មិនអាចទាក់ទងលោក តឹករ៉េត សំរេច ដើម្បីសុំព័ត៌មានបន្ថែមបានឡើយ។
លោកថ្លែងថា ការលក់ភាគហ៊ុនរបស់ក្រុមហ៊ុនអាកាសចរណ៍វៀតណាមឱ្យក្រុមហ៊ុនចិននឹងជួយឱ្យអាជីវកម្មរបស់ Cambodia Angkor Air កាន់តែមានភាពរឹងមាំ និងរស់រវើក ព្រោះក្រុមហ៊ុនដែលទិញភាគហ៊ុនពីក្រុមហ៊ុនវៀតណាមនេះ គឺជាក្រុមហ៊ុនរដ្ឋរបស់ចិនដ៏ធំទី ៣ ដែលកំពុងធ្វើប្រតិបត្តិការក្នុងវិស័យទេសចរណ៍ ហើយក្រុមហ៊ុននេះក៏មានជំនាញខាងអាកាសចរណ៍ស៊ីវិលផងដែរ។
លោកនិយាយថា៖ «ការចូលមករបស់ក្រុមហ៊ុនចិននេះនឹងជួយដល់ប្រតិបត្តិការអាជីវកម្មរបស់ Cambodia Angkor Air ជាពិសេសត្រៀមទទួលភ្ញៀវចិនក្នុងពេលដែលពួកគេបញ្ចប់វិធានរឹតត្បិតកូវីដ ១៩ និងបើកទូលាយឱ្យមានការធ្វើដំណើរចេញចូលដូចមុនឡើងវិញ»។
បើយោងតាមការចុះផ្សាយរបស់សារព័ត៌មានវៀតណាម VN Express ក្រុមហ៊ុន Vietnam Airlines បានលក់ភាគហ៊ុនរបស់ខ្លួនចំនួន ៣៥ ភាគរយនៅក្នុងក្រុមហ៊ុន Cambodia Angkor Air ក្នុងតម្លៃ ៣៥ លានដុល្លារ កាលពីថ្ងៃទី ៣១ ខែ ឧសភា ឆ្នាំ ២០២២ ដែលធ្វើឱ្យក្រុមហ៊ុននេះនៅសល់ភាគហ៊ុន ១៤ ភាគរយប៉ុណ្ណោះ។
បច្ចុប្បន្នក្រុមហ៊ុនអាកាសចរណ៍ Cambodia Angkor Air មានម្ចាស់ភាគហ៊ុនចំនួន ៣ គឺកម្ពុជា ៥១ ភាគរយ, ក្រុមហ៊ុនចិន ៣៥ ភាគរយ និងក្រុមហ៊ុនវៀតណាម ១៤ ភាគរយ។
បើតាមលោក តឹករ៉េត សំរេច បច្ចុប្បន្នប្រតិបត្តិការហោះហើររបស់ Cambodia Angkor Air ត្រូវបានធ្វើឡើងជារៀងរាល់ថ្ងៃសម្រាប់ទិសដៅក្នុងស្រុក និងពីភ្នំពេញ-ហូជីមិញ ចំនួន ១ ជើងក្នុង ១ សប្តាហ៍ ហើយក៏មានទិសដៅទៅកាន់ប្រទេសចិនផងដែរ។
ទិន្នន័យផ្លូវការរបស់ក្រសួងទេសចរណ៍ឱ្យដឹងថា ចាប់ពីខែមករា ដល់ខែមេសា ឆ្នាំ ២០២២ ភ្ញៀវបរទេសដែលបានមកដល់កម្ពុជាតាមអាកាសយានដ្ឋាន-អន្តរជាតិទាំង ៣ មានចំនួនសរុប ១៣១ ៨៦៤ នាក់ កើនឡើង ២៤៣,៩ ភាគរយ ពីចំនួន ៣៨ ៣៤៦ នាក់ នារយៈពេលដូចគ្នាឆ្នាំ ២០២១៕ LA