ភ្នំពេញៈ បន្លែចម្រុះជិត ៤០ តោនត្រូវបាននាំចេញពីកម្ពុជាទៅលក់នៅទីផ្សារអន្តរជាតិក្នុងរយៈពេល ៥ ខែដើមឆ្នាំ ២០២២ នេះកើនឡើង ៩,២២ ភាគរយបើធៀបទៅនឹងរយៈពេលដូចគ្នាឆ្នាំ ២០២១។ នេះបើយោងតាមទិន្នន័យពីក្រសួងកសិកម្ម រុក្ខាប្រមាញ់ និងនេសាទ។
ទិន្នន័យបង្ហាញថា ចាប់ពីខែមករា ដល់ខែឧសភា ឆ្នាំ ២០២២ ការនាំចេញបន្លែចម្រុះសម្រេចបានប្រមាណ ៣៩,៨២ តោន ដោយបន្លែទាំងនោះត្រូវបាននាំចេញទៅប្រទេសបារាំង ៣៩,៧៨ តោន និងប្រទេសនូវែលសេឡង់ ០,០៤ តោន។
អនុប្រធានសមាគមសុវត្ថិភាពបន្លែ ត្រី សាច់ លោក សុខ យ៉ន បានប្រាប់ភ្នំពេញប៉ុស្តិ៍កាលពីថ្ងៃទី ៥ ខែមិថុនាថា ទោះបីក្នុងរយៈពេល ២-៣ ឆ្នាំចុងក្រោយនេះរាជរដ្ឋាភិបាលកម្ពុជា តាមរយៈក្រសួងកសិកម្មបានដាក់ចេញនូវយុទ្ធសាស្ត្រថ្មីៗជាបន្តបន្ទាប់ ដើម្បីលើកកម្ពស់ និងជំរុញការផលិតបន្លែក្នុងស្រុកឱ្យបានច្រើន ក៏បរិមាណទិន្នផលហាក់មិនកើនឡើងខ្ពស់ដូចការចង់បានឡើយ។ លោកបន្តទៀតថា កំណើននៃការដាំដុះបន្លែធម្មជាតិសម្រាប់នាំចេញអាចមានខ្លះ ប៉ុន្តែសម្រាប់បន្លែធម្មតា គឺមិនមានអ្វីកើនឡើងគួរឱ្យកត់សម្គាល់ទេ ខណៈការនាំចូលពីប្រទេសជិតខាងនៅតែមានជាប្រចាំទាំងបន្លែ ត្រី សាច់។
លោកបញ្ជាក់ថា៖ «សម្រាប់កំណើននាំចេញខាងលើយើងពិតជារីករាយ ប៉ុន្តែទន្ទឹមនឹងនេះ ការនាំចូលបន្លែពីប្រទេសជិតខាងក៏មានច្រើនដែរ»។
បើតាមលោក សុខ យ៉ន វិស័យកសិកម្មកម្ពុជានៅមិនទាន់រីកចម្រើនទៅមុខលឿន ដោយសារកត្តាមួយចំនួនដូចជា កង្វះរោងចក្រផលិតជីកសិកម្មក្នុងស្រុក មិនមានកន្លែងស្តុកទុកត្រឹមត្រូវ មិនមានបច្ចេកទេសដាំដុះមិនមានទីផ្សារ និងមានការលួចនាំចូលខុសច្បាប់ជាច្រើន។
លោកបញ្ជាក់ថា៖ «ដើម្បីឱ្យវិស័យកសិកម្មកម្ពុជាអាចវិវត្តទៅមុខរហ័ស គឺត្រូវការឱ្យអាជ្ញាធរជួយបន្ថែមទៀតទៅលើបច្ចេកទេសដាំដុះ ពូជ ប្រព័ន្ធស្រោចស្រព ការបន្ទាបថ្លៃដើមផលិត (ជីកសិកម្ម) និងការជួយផ្តល់ឥណទានពីគ្រឹះស្ថានហិរញ្ញវត្ថុផងដែរ»។
លោកបន្ថែមថា ការដាំដុះបន្លែដែលមានគុណភាពស្តង់ដា និងមានភូតគាមអនាម័យ ក៏ជារឿងសំខាន់ដែលប្រជាកសិករត្រូវគិតគូរផងដែរ។
លោក ចាន់ ពេជ្រ ប្រធានគ្រប់គ្រងទូទៅក្រុមហ៊ុន Signature of Asia ដែលជាក្រុមហ៊ុននាំចេញអង្ករ និងបន្លែបានប្រាប់ថា បើទោះបីកម្ពុជាប្រកាសបើកប្រទេសឡើងវិញចាប់តាំងពីខែវិច្ឆិកា ឆ្នាំ ២០២១ ក៏ដោយ ប៉ុន្តែក្រុមហ៊ុនរបស់លោកនៅមិនទាន់ចាប់ផ្តើមនាំចេញបន្លែឡើងវិញនោះទេ។
លោកថ្លែងថា៖ «តាំងពីផ្ទុះជំងឺកូវីដ-១៩ ក្រុមហ៊ុនបានឈប់នាំចេញបន្លែដោយសារកង្វះជើងយន្តហោះ ហើយបើទោះជាយើងចាប់ផ្តើមបើកប្រទេសឡើងវិញ ក៏ត្រូវចំណាយពេលដឹកជញ្ជូនបន្លែយូរដែរ អ៊ីចឹងវាធ្វើឱ្យបន្លែខូច។ យើងមិនទាន់ចាប់ផ្តើមទំនាក់ទំនងជាមួយភ្ញៀវឡើងវិញក្នុងការរៀបចំនាំចេញនៅឡើយទេ»។
ក្នុងពិធីសម្ពោធដាក់ឱ្យដំណើរការមជ្ឈមណ្ឌលបន្លែសុវត្ថិភាពគំរូ និងការបង្កើតភាពជាដៃគូ ដើម្បីជំរុញខ្សែចង្វាក់បន្លែសុវត្ថិភាពតាមស្តង់ដាការអនុវត្តកសិកម្មល្អកម្ពុជា (CamGAP) នៅខេត្តកណ្តាលកាលពីចុងឆ្នាំ ២០២១ រដ្ឋមន្ត្រីក្រសួងកសិកម្ម លោក វេង សាខុន បាននិយាយថា សកម្មភាពការដាំដុះ ប្រមូលផល និងការនាំចេញផលិតផលកសិកម្មនៅកម្ពុជាកំពុងកើនឡើង ជាពិសេសចាប់តាំងពីការផ្ទុះជំងឺកូវីដ ១៩។ លោកបានបន្តថា ក្រសួងក៏បានដាក់ចេញគោលនយោបាយជាច្រើន ដើម្បីគាំទ្រ និងជំរុញបរិមាណផលិត និងគុណភាពសម្រាប់ឆ្លើយតបនឹងតម្រូវការក្នុងស្រុក និងឈានទៅការនាំចេញ។
ក្នុងឆ្នាំ ២០២១ កម្ពុជាបាននាំចេញកសិផលទៅក្រៅប្រទេសជិត ៨ លានតោន កើនឡើង ៦៣ ភាគរយបើធៀបនឹងឆ្នាំ ២០២០ និងទទួលបានចំណូលជិត ៥ ពាន់លានដុល្លារ។ នេះបើតាមរដ្ឋមន្ត្រីក្រសួងកសិកម្ម៕ LA