.jpg)
ស្លាកសញ្ញាធនាគារសហគ្រាសធុនតូច និងមធ្យមកម្ពុជា តាមបណ្ដោយផ្លូវសហព័ន្ធរុស្ស៊ី។ ហេង ជីវ័ន
ភ្នំពេញៈ គិតត្រឹមថ្ងៃទី ៣១ ឧសភា ឆ្នាំ ២០២២ មានសហគ្រាសធុនតូច និងមធ្យម (SMEs) ចំនួន ១ ៨៣៤ បានទទួលឥណទានពីគម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម ជំហានទី ២ (SCFS II) ជាមួយនឹងទំហំឥណទានចំនួន ២២១ លានដុល្លារ ស្មើនឹង ៩២ ភាគរយនៃគម្រោងថវិកាសរុប ២៤០ លានដុល្លារ។ នេះបើយោងតាមធនាគារសហគ្រាសធុនតូច និងមធ្យមកម្ពុជា (SME Bank)។
SME Bank បញ្ជាក់ថា ក្នុងនោះឥណទានសម្រាប់វិស័យអាទិភាពមាន ៤៣ ភាគរយ ខណៈវិស័យទូទៅមាន ៥៧ ភាគរយ និងសហគ្រិនជាស្ត្រី ៣០ ភាគរយ។
ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា លោក តែ តាំងប៉ បានប្រាប់ភ្នំពេញប៉ុស្តិ៍នៅថ្ងៃទី ៥ ខែមិថុនា ថា ធនាគារ SME Bank បានសហការជាមួយនឹងវិស័យឯកជនជាង ៣០ ធនាគារ ដោយបានដាក់ទុនប្រមាណ ៥០ ភាគរយរៀងខ្លួនសម្រាប់ផ្តល់កម្ចីឱ្យសហគ្រាសធុនតូច និងមធ្យមនៅកម្ពុជាក្នុងន័យជួយសង្គ្រោះ និងស្តារសេដ្ឋកិច្ចឡើងវិញនៅក្នុងដំណាក់កាលនៃវិបត្តិដែលបណ្តាលមកពីជំងឺកូវីដ ១៩។
លោកបន្តថា មួយវិញទៀតធនាគារ SME Bank បានផ្តល់កម្ចីទៅសហគ្រាសធុនតូច និងមធ្យមណាដែលធ្វើការទៅលើវិស័យអាទិភាពដូចជា ការកែច្នៃចំណីអាហារ និងវិស័យកសិកម្ម ជាដើមឱ្យតែស្របតាមគោលនយោបាយរបស់រដ្ឋាភិបាលកម្ពុជា។ ជាមួយគ្នានេះលោកក៏បានជំរុញឱ្យសហគ្រាសធុនតូច និងមធ្យមដែលទទួលបានឥណទានពីគម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យមជំហានទី ២ (SCFS II) នេះត្រូវប្រើប្រាស់កម្ចីឱ្យចំគោលដៅ ដើម្បីសម្រេចបានជោគជ័យ។
បើតាម លោក តាំងប៉ សហគ្រាសធុនតូច និងមធ្យមមួយចំនួនក៏មិនបានទទួលឥណទានពីគម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យមជំហានទី ២ (SCFS II) នេះទេ ដោយសារសហគ្រាសធុនតូច និងមធ្យម ទាំងនោះមានជាប់បំណុលជាមួយធនាគារក្នុងកម្ពុជាក្នុងអត្រាការប្រាក់ខ្ពស់រួចហើយកាលពីពេលមុន និងមួយចំនួនទៀតមិនចំគោលដៅរបស់ SME Bank។
លោកថ្លែងថា៖ «បញ្ហាមួយដែលខ្ចីគេឱ្យហើយ បែរជាខ្លួនឯងនៅជាប់បំណុលធនាគារផ្សេងទៀត។ ការជាប់បំណុលធនាគារផ្សេងហ្នឹង គឺធនាគារនៅក្នុងចង្កោម និងសហការជាមួយនឹង SME Bank ទៀត។ អ៊ីចឹងយើងកំពុងតែធ្វើការអំពាវនាវឱ្យមានការយល់យោគគ្នាលើបញ្ហានេះ»។
លោកបញ្ជាក់ថា សម្ព័ន្ធសមាគម-សហគ្រាសធុនតូច និងមធ្យមកម្ពុជាមានតួនាទីក្នុងការបណ្តុះបណ្តាលសហគ្រាសធុនតូច និងមធ្យមឱ្យមានការយល់ដឹងអំពីនីតិវិធីនៃការរៀបចំផែនការមេទៅខ្ចីលុយពីធនាគារ SME នេះ និងរកចំណូលដើម្បីសងត្រឡប់មកវិញ ដែលបច្ចុប្បន្នសម្ព័ន្ធសមាគម-សហគ្រាសធុនតូច និងមធ្យមកម្ពុជាបានបណ្តុះបណ្តាលចំណេះដឹងទៅដល់សមាជិកបានជិតគ្រប់ ២៥ រាជធានី-ខេត្តហើយ។
លោក លឹម អូន អគ្គនាយកធនាគារ-សហគ្រាសធុនតូច និងមធ្យមកម្ពុជា បានលើកឡើងកាលពីខែកុម្ភៈកន្លងមកថា ដោយមើលឃើញពីការទទួលបាននូវលទ្ធផលជាវិជ្ជមានចេញពីការអនុវត្ត SCFS II និងតម្រូវការចាំបាច់ក្នុងការបន្តគាំទ្រផ្នែកហិរញ្ញវត្ថុដល់សហគ្រាសធុនតូច និងមធ្យមទើបរដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុបានសម្រេចផ្តល់ថវិកាបន្ថែម ៥០ លានដុល្លារដល់ធនាគារ SME ដើម្បីបន្តអនុវត្ត SCFS II រួមនឹងថវិកាបដិភាគ ៥០ លានដុល្លារទៀតពីគ្រឹះស្ថានហិរញ្ញវត្ថុ (PFIs)។
លោកថ្លែងថា៖ «ដូច្នេះថវិកាសរុបនៃគម្រោងនេះនឹងកើនឡើងទៅដល់ ២៤០ លានដុល្លារ (ធនាគារ SME ១២០ លានដុល្លារ និងបដិភាគពី PFIs ១២០ លានដុល្លារ)»៕
