.jpg)
ភ្ញៀវទេសចរចូលកម្សាន្តក្នុងបរិវេណប្រាសាទអង្គរវត្ត។ ហេង ជីវ័ន
ភ្នំពេញៈ កម្ពុជារំពឹងថា នឹងទទួលបានកំណើនលំហូរភ្ញៀវទេសចរអន្តរជាតិពីប្រទេសជិតខាង ក្រោយពីប្រទេសថៃ បានប្រកាសដកចេញនូវការធ្វើចត្តាឡីស័ក និងសម្រេចបើកព្រំដែនគោកទាំងអស់ឡើងវិញ។
ចាប់ពីថ្ងៃទី ១ មិថុនា ប្រទេសថៃ បានសម្រេចបន្ធូរបន្ថយការរឹតបន្តឹងសម្រាប់អ្នកធ្វើដំណើរគ្រប់ប្រភេទ ដោយបានសម្រេចលុបចោលលក្ខខណ្ឌតម្រូវឱ្យនៅដាច់ដោយឡែកពីគេក្រោយការមកដល់ ការបើកព្រំដែនគោកទាំងអស់ និងអនុញ្ញាតឱ្យក្លិបរាត្រី និងកន្លែងកម្សាន្តផ្សេងៗទៀតបើកដំណើរការផងដែរកាលពីចុងខែឧសភា។ វិស័យទេសចរណ៍កម្ពុជា ក៏ត្រូវរំពឹងថា នឹងមានកំណើនភ្ញៀវទេសចរអន្តរជាតិ តាមរយៈការបើកទូលាយរបស់ប្រទេសថៃដែរ។
អ្នកនាំពាក្យក្រសួងទេសចរណ៍ លោក តុប សុភ័ក បានប្រាប់ ភ្នំពេញ ប៉ុស្តិ៍ នៅថ្ងៃទី ៦ ខែមិថុនាថា នៅពេលនេះវិស័យទេសចរណ៍នៅកម្ពុជា បានចាប់ផ្តើមងើបឡើងវិញបណ្តើរៗហើយ ពិសេសទេសចរក្នុងស្រុកមានសម្ទុះគួរឱ្យកត់សម្គាល់ ខណៈដែលទេសចរអន្តរជាតិក៏ចាប់ផ្តើមមានឡើងវិញដែរ ក្រោយពីប្រទេសជិតខាងកម្ពុជាបើកពេញលេញឡើងវិញ។
លោកបានបន្ថែមថា ការបើកដំណើរការវិស័យទេសចរណ៍ឡើង វិញពីសំណាក់ប្រទេសថៃ ក៏ដូចជាវៀតណាមដែរនោះ គឺចំណុចដ៏ល្អប្រសើរបំផុតសម្រាប់កម្ពុជា ដែលនឹងអាចជំរុញចលនាទេសចរណ៍អន្តរជាតិឱ្យមានភាពងាយស្រួល ពិសេសទេសចរទៅវិញទៅមករវាងប្រទេស និងប្រទេស ក៏ដូចជាទេសចរមកពីប្រទេសផ្សេងៗទៀត។
លោកបញ្ជាក់ថា៖ «ការបើកពេញលេញរបស់ថៃ ជាចំណុចមួយល្អក្នុងការធ្វើឱ្យវិស័យទេសចរណ៍កម្ពុជាងើបឡើងវិញ។ ដូចយើងដឹងស្រាប់ហើយថា ប្រទេសថៃ មានក្រុមហ៊ុនអាកាសចរណ៍ច្រើន មានអាកាសយានដ្ឋានធំនិងមានជើងហោះហើរច្រើន ដូចនេះ នៅពេលថៃបើកជាប្រក្រតីឡើងវិញ កម្ពុជាក៏អាចនឹងទទួលផលចំណេញពីលំហូរទេសចរពីខាងថៃមកដែរ»។
លោក ធួន ស៊ីណាន ប្រធានក្រុមប្រឹក្សាភិបាលក្រុមហ៊ុន IMCT ខូអិលធីឌី និងជាប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATACC) បានឱ្យដឹងថា នៅពេលប្រទេសជិតខាងគ្នាមានការបើកចំហឡើងវិញដូចគ្នា នឹងទទួលបានអត្ថប្រយោជន៍ដូចគ្នាចំពោះការជំរុញចលនាទេសចរទៅវិញទៅមក។
លោកបញ្ជាក់ថា៖ «ប្រទេសថៃ បានបើកទូលាយមួយរយៈពេលមកហើយ គ្រាន់តែការចូលទៅប្រទេសនៅតែត្រូវការប្រាក់ធានារ៉ាប់រង។ នៅពេលគេបើកទូលំទូលាយបែបនេះ យើងអាចបានផលពីគេច្រើនដែរ ជាពិសេសនៅថ្ងៃនេះមានទេសចរអន្តរជាតិស្នាក់នៅច្រើន ខណៈដែលទេសចរជនជាតិថៃក៏មកលេងកម្ពុជាច្រើនដែរ ហើយខ្មែរទៅលេងថៃ និងទិញអីវ៉ាន់នៅថៃក៏ច្រើនដែរ។ ដូចនេះយើងឃើញថា ការទទួលនេះ គឺមានទៅវិញទៅមក»។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាបាននិយាយថា ការចេញចូលរបស់ទេសចរមកកាន់កម្ពុជា តាមច្រកព្រំដែនកម្ពុជាថៃ នឹងកាន់តែមមាញឹក ក្រោយពីថៃបានសម្រេចបើកព្រំដែនគោកទាំងអស់ឡើងវិញ។
លោកបញ្ជាក់ថា៖ «ទេសចរអន្តរជាតិដែលទៅកម្សាន្តនៅប្រទេសថៃ រយៈពេលយូរថ្ងៃ ភាគច្រើនតែងជ្រើសរើសយកកម្ពុជាធ្វើជាគោលដៅបន្ទាប់សម្រាប់ដំណើរកម្សាន្តពួកគេ ដោយការធ្វើដំណើរពីថៃមកកម្ពុជាមានទាំងតាមផ្លូវអាកាស និងផ្លូវគោក។ នៅមុនពេលកូវីដ ១៩ ទេសចរដែលមកកម្សាន្តនៅកម្ពុជា តាមច្រកព្រំដែនគោករវាងថៃ និងកម្ពុជា មានចន្លោះពី ១០ ទៅ២០ ភាគរយនៃភ្ញៀវទេសចរសរុប»។
របាយការណ៍ពីក្រសួងទេសចរណ៍បង្ហាញថា ក្នុងឆ្នាំ ២០២១ ចំនួនអ្នកដំណើរពីប្រទេសថៃ មកប្រទេសកម្ពុជា មានចំនួនសរុប ៨១ ៨៤៤ នាក់ ជាប់លេខ ១ ក្នុងចំណោម ១០ ប្រទេស។ ដោយឡែកទី២ មកពីចិន មាន ៤៥ ៧៧៥ នាក់, និងទី៣ គឺវៀតណាម មាន ២២ ១២០ នាក់៕ LA
