ភ្នំពេញៈ បើទោះបីក្នុងឆ្នាំ ២០២១ កន្លងមកវិបត្តិជំងឺកូវីដ ១៩ បានធ្វើឱ្យប្រទេសកម្ពុជាជួបនឹងបញ្ហាប្រឈមជាច្រើនក៏ដោយ ក៏បុព្វលាភធានារ៉ាប់រង (ប្រាក់ចំណូលសរុបពីការលក់ធានារ៉ាប់រង) នៅកម្ពុជានៅតែបង្ហាញសញ្ញាវិជ្ជមានដដែល ដោយមានទំហំទឹកប្រាក់ជិត ៣០០ លានដុល្លារ កើនឡើងជាង ៩ ភាគរយបើធៀបនឹងឆ្នាំ ២០២០ ខណៈការទូទាត់សងជូនអតិថិជនមានជាង ៤១ លានដុល្លារ។ នេះបើយោងតាមទិន្នន័យរបស់សមាគមធានារ៉ាប់រងកម្ពុជា (IAC)។
ទិន្នន័យ IAC បង្ហាញថា ក្នុងឆ្នាំ ២០២១ វិស័យធានារ៉ាប់រងនៅកម្ពុជានៅតែបោះជំហានទៅមុខល្អប្រសើរ ដោយបុព្វលាភធានារ៉ាប់រងសរុបមានចំនួន ២៩៧,៦ លានដុល្លារ កើនឡើង ៩,៦ ភាគរយបើធៀបនឹងឆ្នាំ ២០២០។ ទោះយ៉ាងណា អត្រាកំណើននេះបានធ្លាក់ចុះបន្តិចបើធៀបបណ្តាឆ្នាំមុនៗពោលគឺមុនពេលមានវត្តមាននៃកូវីដ-១៩ ដោយជាមធ្យមក្នុងរយៈពេល ៥ ឆ្នាំចុងក្រោយ គឺកំណើនមានប្រមាណ ២០ ភាគរយ។
សម្រាប់ឆ្នាំ ២០២១ ចំនួនប្រជាពលរដ្ឋដែលទទួលបានការពារដោយធានារ៉ាប់រងពាក់ព័ន្ធនឹងអាយុជីវិតសុខភាព និងគ្រោះថ្នាក់បុគ្គលមានចំនួនសរុប ២,២ លាននាក់ កើនឡើងប្រមាណ ៣២ ភាគរយធៀបនឹងឆ្នាំ ២០២០។ ដោយក្នុងនោះធានារ៉ាប់រងអាយុជីវិត មានចំនួន ១,៣ លាននាក់ ធានារ៉ាប់រងមិនមែនអាយុជីវិត ៥៥ ម៉ឺននាក់ និងធានារ៉ាប់រងខ្នាតតូច ចំនួន ៣៨ ម៉ឺននាក់។
បើយោងតាម IAC ទឹកប្រាក់ទាំង ២៩៧,៦ លានដុល្លារនេះ គឺទទួលបានពីការទិញធានារ៉ាប់រងអាយុជីវិតចំនួន ៧២,៨ លានដុល្លារកើន ៩,៧ ភាគរយ, បុព្វលាភធានារ៉ាប់រងទូទៅចំនួន ៥៧,៩ លានដុល្លារកើន ១៧,៥ ភាគរយ និងបុព្វលាភធានារ៉ាប់រងខ្នាតតូច មានចំនួន ២,៨ លានដុល្លារ ថយចុះ ១៧,៧ ភាគរយ។
ប្រធានសមាគមធានារ៉ាប់រងកម្ពុជា លោក ហ៊ុយ វ៉ាថារ៉ូ បានប្រាប់ភ្នំពេញ-ប៉ុស្តិ៍កាលពីថ្ងៃ ៧ ខែមិថុនាថា កំណើនបុព្វលាភក្នុងវិស័យធានារ៉ាប់រង គឺឆ្លុះបញ្ចាំងថា ប្រជាជនខ្មែរយល់ដឹងកាន់តែច្រើនពីភាពចាំបាច់នៃការប្រើប្រាស់ធានារ៉ាប់រង ដើម្បីធ្វើជាឧបករណ៍ការពារហានិភ័យទៅលើហេតុការណ៍ចៃដន្យដែលអាចកើតឡើងភ្លាមៗ។
លោកអះអាងថា៖ «នៅពេលមានការប្រើប្រាស់សេវាធានារ៉ាប់រងកាន់តែច្រើន មានន័យថា សំណាញ់សុវត្ថិភាពហិរញ្ញវត្ថុរបស់យើងក៏កាន់តែរឹងមាំដែរ ដោយវាមានភាពធន់ទៅនឹងហានិភ័យផ្សេងៗ»។
លោកបន្តថា ជាមួយនឹងកំណើននៃបុព្វលាភដែលទទួលបានវិស័យធានារ៉ាប់រងនៅកម្ពុជាក៏បានផ្តល់សំណងត្រឡប់ទៅកាន់អតិថិជនក្នុងទឹកប្រាក់ប្រមាណ ៤១,២ លានដុល្លារផងដែរ ដោយក្នុងនោះសំណងធានារ៉ាប់រងអាយុជីវិត ចំនួន១០,៦ លានដុល្លារ (សំណងលើការស្លាប់ប្រមាណ ៨,៣ លានដុល្លារ), សំណងធានារ៉ាប់រងទូទៅ ២៩,៧ លានដុល្លារ និងសំណងធានារ៉ាប់រងខ្នាតតូច ៧៦ ម៉ឺនដុល្លារ។
ទាក់ទងនឹងទំហំបុព្វលាភ ខាងលើ លោក វ៉ាថារ៉ូ បានបញ្ជាក់ថា បុព្វលាភក្នុងវិស័យធានារ៉ាប់រងនៅកម្ពុជាមានប្រមាណជាង ១ ភាគរយប៉ុណ្ណោះបើធៀបនឹងទំហំ GDP របស់ប្រទេស ដែលចំនួននេះនៅកម្រិតទាបខ្លាំងបើធៀបនឹងប្រទេសជិតខាងដែលមានក្នុងរង្វង់ ៤-៥ ភាគរយ និងនៅប្រទេសរីកចម្រើនស្ថិតក្នុងរង្វង់ ៧-៨ ភាគរយប្រចាំឆ្នាំ។
លោកបញ្ជាក់ថា៖ «តាមទិន្នន័យនេះយើងអាចនិយាយថា ការប្រើប្រាស់សេវាកម្មធានារ៉ាប់រងនៅកម្ពុជានៅមានកម្រិតទាបនៅឡើយ។ យើងពិតជាចង់លើកទឹកចិត្តឱ្យប្រជាជនខ្មែរប្រើប្រាស់សេវាធានារ៉ាប់រងឱ្យបានកាន់តែច្រើនបន្ថែមទៀត»។
យោងតាម លោក វ៉ាថារ៉ូ បច្ចុប្បន្នសមាគមធានារ៉ាប់រងកម្ពុជាមានក្រុមហ៊ុនធានារ៉ាប់រងចំនួន ៤០ ជាសមាជិក គឺក្រុមហ៊ុនធានារ៉ាប់រងទូទៅចំនួន ១៨, ក្រុមហ៊ុនធានារ៉ាប់រងអាយុជីវិត ១៤, ក្រុមហ៊ុនធានារ៉ាប់រងខ្នាតតូច ៧ និងក្រុមហ៊ុនធានារ៉ាប់រងបន្ដចំនួន ១។
ប្រធានអគ្គនាយកក្រុមហ៊ុនធានារ៉ាប់រង Forte Insurance លោក យក់ ចំរើនឫទ្ធិ បានប្រាប់ថា ការទិញសេវាកម្មធានារ៉ាប់រងរបស់អតិថិជនពីក្រុមហ៊ុន Forte Insurance កាលពីឆ្នាំ ២០២១ មិនសូវមានភាពល្អប្រសើរដូចបណ្តាឆ្នាំមុនមានការផ្ទុះឡើងនៃជំងឺកូវីដ ១៩ នោះទេ ដោយកំណើនបុព្វលាភរបស់ក្រុមហ៊ុនក្នុងឆ្នាំ ២០២១ មានប្រមាណ ១០ ភាគរយប៉ុណ្ណោះបើធៀបនឹងឆ្នាំ ២០២០។ លោកបន្តថា វិបត្តិកូវីដ ១៩ បានធ្វើឱ្យចំណូលរបស់ប្រជាជនមួយចំនួនធ្លាក់ចុះ ហើយការធ្វើដំណើរក៏ត្រូវកាត់បន្ថយផងដែរ។ នេះក៏ជាផ្នែក ១ ដែលធ្វើឱ្យការស្វែងរកទិញសេវាធានារ៉ាប់រងត្រូវធ្លាក់ចុះ។
ទោះយ៉ាងណា លោកបានអះអាងថា៖ «ក្នុងឆ្នាំ ២០២២ នេះកំណើនបុព្វលាភរបស់ក្រុមហ៊ុន Forte Insurance ត្រូវបានរំពឹងថា នឹងកើនលើសឆ្នាំ ២០២១»៕ LA