.jpg)
លោក Kenji Okamura នាយករងនៃមូលនិធិរូបិយវត្ថុអន្តរជាតិ (IMF)។ ហេង ជីវ័ន
ភ្នំពេញៈ ធនាគារពិភពលោក (WB) បានព្រមានថា វិបត្តិ ២ ដែលកើតឡើងផ្ទួន គឺការរីករាលដាលជំងឺកូវីដ ១៩ និងការឈ្លានពានរបស់ប្រទេសរុស្ស៊ីលើអ៊ុយក្រែនបានកំពុងរារាំងដល់ការរំពឹងទុកនៃចក្ខុវិស័យកំណើនសេដ្ឋកិច្ចពិភពលោក និងតំបន់ពិសេសប្រទេសកំពុងមានសេដ្ឋកិច្ចរីកដុះដាលដូចជាកម្ពុជា ដែលទាមទារឱ្យអ្នកបង្កើតគោលនយោបាយធ្វើឱ្យមានតុល្យភាពតម្រូវការ ដើម្បីធានានិរន្តរភាពសារពើពន្ធជាមួយតម្រូវការកាត់បន្ថយផលប៉ះពាល់ និងហានិភ័យដែលអាចកើតមានជាយថាហេតុ។
យោងតាមរបាយការណ៍ចក្ខុវិស័យសេដ្ឋកិច្ចសកលចុងក្រោយរបស់ធនាគារពិភពលោកចេញផ្សាយកាលពីថ្ងៃទី ៨ ខែមិថុនា ព្យាករថា កំណើនសេដ្ឋកិច្ចពិភពលោកត្រូវរំពឹងថានឹងស្រុតចុះពី ៥ ទៅ ៧ ភាគរយនៅក្នុងឆ្នាំ ២០២១ មកត្រឹម ២,៩ ភាគរយនៅក្នុងឆ្នាំ ២០២២ ដែលទាបជាងច្រើនធៀបនឹង ៤,១ ភាគរយដែលត្រូវបានប្រមើលទុកកាលពីខែមករាដើមឆ្នាំនេះ។ ចំណែកកំណើនសេដ្ឋកិច្ចតំបន់អាស៊ីបូព៌ា និងប៉ាស៊ីហ្វិកត្រូវបានព្យាករថានឹងធ្លាក់ចុះមកនៅត្រឹម ៤,៤ ភាគរយក្នុងឆ្នាំ ២០២២ មុនពេលកើនដល់ ៥,២ ភាគរយក្នុងឆ្នាំ ២០២៣ ដែលឆ្លុះបញ្ចាំងពីការធ្លាក់ចុះគួរឱ្យកត់សម្គាល់នៅក្នុងប្រទេសចិន។ ទន្ទឹមនឹងនេះកំណើនសេដ្ឋកិច្ចប្រទេសកម្ពុជាត្រូវបានព្យាករថានឹងមានចំនួន ៤,៥ ភាគរយនៅឆ្នាំ ២០២២ និង ៥,៨ ភាគរយសម្រាប់ឆ្នាំ ២០២៣។
ជាមួយគ្នានេះដែរលោក Ayhan Kose ប្រធានក្រុម Prospects Group នៃធនគារពិភពលោកបានថ្លែងថា បណ្តាប្រទេសកំពុងអភិវឌ្ឍន៍ចាំបាច់ត្រូវតែថ្លឹងថ្លែងរវាងតម្រូវការនៃភាពចាំបាច់ ដើម្បីរក្សាស្ថិរភាពសារពើពន្ធជាមួយនឹងតម្រូវការក្នុងការសម្រាលផលប៉ះទង្គិចរបស់វិបត្តិដែលកំពុងកើតមានផ្ទួនៗគ្នាទៅលើពលរដ្ឋក្រីក្របំផុតរបស់ខ្លួននាពេលបច្ចុប្បន្ន»។
លោកបានថ្លែងថា៖ «ការផ្សព្វផ្សាយឱ្យបានច្បាស់លាស់អំពីការសម្រេចចិត្តផ្នែកគោលនយោបាយរូបិយវត្ថុ, ការបង្កើនអានុភាពនៃក្របខ័ណ្ឌគោលនយោបាយរូបិយវត្ថុគួរឱ្យទុកចិត្តបាន និងការការពារឱ្យបាននូវឯករាជភាពរបស់ធនាគារកណ្តាលទាំងអស់នេះអាចមានប្រសិទ្ធភាពក្នុងការជួយគ្រប់គ្រងឱ្យបាននូវក្តីរំពឹងទុកចំពោះកម្រិតអតិផរណា និងក៏ជួយកាត់បន្ថយបានដែរនូវបរិមាណវិធានការការរឹតបន្តឹងផ្នែកគោលនយោបាយ ដែលចាំបាច់សម្រាប់ធ្វើឱ្យមានឥទ្ធិពលសមតាមបំណងដែលចង់បានទៅលើអតិផរណា និងសកម្មភាពនានា»។
លោក Kenji Okamura នាយករងនៃមូលនិធិរូបិយវត្ថុអន្តរជាតិ (IMF) បានប្រាប់ ភ្នំពេញ ប៉ុស្តិ៍ នៅពេលថ្មីៗនេះថា សង្គ្រាមនៅប្រទេសអ៊ុយក្រែនកំពុងប៉ះពាល់ដល់កំណើនសេដ្ឋកិច្ចអាស៊ីតាមរយៈបណ្តាញសំខាន់ចំនួន ២ គឺតាមរយៈការកើនឡើងតម្លៃទំនិញប្រើប្រាស់ និងមួយទៀតតាមរយៈពាណិជ្ជកម្ម។ តំបន់នេះបានរងផលប៉ះពាល់ពាណិជ្ជកម្មជាមួយប្រទេសរុស្ស៊ីមានកម្រិតតិច ប៉ុន្តែទំនាក់ទំនងគួរឱ្យកត់សម្គាល់ជាមួយបណ្ដាប្រទេសផ្សេងទៀតនៅអឺរ៉ុប និងផលប៉ះពាល់ពីអឺរ៉ុបត្រូវតែកត់សម្គាល់។
លោកបានព្យាករថា សេដ្ឋកិច្ចរបស់ប្រទេសកម្ពុជានឹងមានកំណើនប្រហែល ៥ ភាគរយនៅឆ្នាំនេះ ហើយនឹងត្រឡប់មកជាបណ្តើរៗវិញក្នុងរង្វង់ពី ៦-៦,៥ ភាគរយក្នុងរយៈពេលមធ្យម។ អត្រាកំណើននេះគឺខ្ពស់គួរសម ទោះបីជាប្រទេសកំពុងអភិវឌ្ឍន៍ក៏ដោយ។
លោកបន្តថា៖ «រហូតមកដល់ពេលនេះ ការស្ទុះងើបឡើងវិញរបស់កម្ពុជា គឺត្រូវបានជំរុញជាចម្បងដោយតម្រូវរខាងក្រៅសម្រាប់ទំនិញផលិតកម្ម ជាពិសេសសម្លៀកបំពាក់ និងស្បែកជើង។ ចក្ខុវិស័យជារួមមានភាពវិជ្ជមាន ប៉ុន្តែយើងក៏ឃើញមានបញ្ហាប្រឈមមួយចំនួនដែរ»។
លោកផ្ដល់យោបល់ដល់កម្ពុជាថា បញ្ហាអាទិភាពកម្ពុជាត្រូវរក្សាការពារផ្នែកដែលងាយរងគ្រោះបំផុតរបស់ប្រជាជន។ ការគាំទ្រសង្គមចំគោលដៅ ដូចជាតាមរយៈកម្មវិធីផ្ទេរសាច់ប្រាក់ ដែលត្រូវបានបន្តរហូតខែមីនាអាចការពារជនក្រីក្របំផុតប្រឆាំងការកើនឡើងតម្លៃទំនិញប្រើប្រាស់សំខាន់ៗ។
លោក Okamura បន្ថែមថា វិធានការគាំទ្រផ្សេងៗទៀត ដូចជាវិធានការគាំទ្រឥណទាន និងការលើកលែងពន្ធ នឹងត្រូវធ្វើការវិនិច្ឆ័យដោយប្រុងប្រយ័ត្ន ដោយធ្វើឱ្យប្រាកដថាសេដ្ឋកិច្ចត្រូវបានគាំទ្រនៅកន្លែងដែលមានតម្រូវការ ប៉ុន្តែត្រូវប្រើប្រាស់ធនធានប្រកបដោយភាពវៃឆ្លាត៕ LA
