.jpg)
ទិដ្ឋភាពចម្ការសូឡានៅខេត្តពោធិ៍សាត់។ អាមេរិកលើកលែងពន្ធនាំចូលបន្ទះសូឡាពីប្រទេស ៤ រួមទាំងប្រទេសកម្ពុជាផងដែរ។ រូបថត SchneiTec Group
ភ្នំពេញៈ កម្ពុជារំពឹងអាចទាក់ទាញវិនិយោគិនបរទេសពីក្នុងតំបន់ និងពិភពលោក ជាពិសេសមកពីអាមេរិកឱ្យចូលមកបណ្តាក់ទុនលើការផលិតបន្ទះសូឡា ដើម្បីនាំទៅទីផ្សារអាមេរិក ក្រោយពេលប្រធានាធិបតីនៃប្រទេសនេះប្រកាសលើកលែងពន្ធគយអនុវត្តចំពោះបន្ទះសូឡាដែលនាំចូលពីប្រទេសចំនួន ៤ រួមទាំងកម្ពុជា ក្នុងរយៈពេល ២ ឆ្នាំ ដើម្បីជួយជំរុញផលិតកម្មនៅអាមេរិក។
សារព័ត៌មាន Neike បានរាយការណ៍ថា ការលើកលែងបង់ពន្ធគយនេះអនុវត្តចំពោះបន្ទះសូឡាដែលនាំចូលពីប្រទេសកម្ពុជា ម៉ាឡេស៊ី វៀតណាម និងថៃ ដោយត្រូវធ្វើឡើងក្នុងគោលបំណងដើម្បីធានាថា សហរដ្ឋអាមេរិកមានលទ្ធភាពទទួលបានការផ្គត់ផ្គង់ម៉ូឌុលថាមពលពន្លឺព្រះអាទិត្យគ្រប់គ្រាន់ ដើម្បីបំពេញតម្រូវការផលិតអគ្គិសនី ខណៈពេលដែលការផលិតក្នុងស្រុកកើនឡើង។ នេះបើតាមការចេញផ្សាយរបស់សេតវិមានកាលពីថ្ងៃចន្ទសប្តាហ៍នេះ។
លោក ហេង គុណលាង អគ្គនាយកនៃអគ្គនាយកដ្ឋានថាមពលបានប្រាប់ភ្នំពេញប៉ុស្តិ៍នៅថ្ងៃទី ៨ ខែមិថុនា ថា រាជរដ្ឋាភិបាលកម្ពុជាមានគោលនយោបាយលើកទឹកចិត្តចំពោះការផលិតផ្ទាំងសូឡា ក៏ដូចជាឧបករណ៍គ្រឿងបន្លាស់អគ្គិសនី ដើម្បីប្រើប្រាស់នៅក្នុងស្រុកផង និងអាចនាំចេញផង។
លោកបន្ថែមថា កម្ពុជាក៏ដូចជាបណ្តាប្រទេសដទៃទៀតដែរគឺកំពុងរួមគ្នាឆ្ពោះទៅកាន់ការកាត់បន្ថយផលប៉ះពាល់ផ្សេងៗដូចជា ការប្រែប្រួលអាកាសធាតុ និងជំរុញឱ្យមានការប្រើប្រាស់ថាមពលកកើតឡើងវិញឱ្យជាអតិបរមា។
លោកបញ្ជាក់ថា៖ «មិនថាតែអាមេរិកទេដែលជំរុញការប្រើប្រាស់ថាមពលបៃតង ឬថាមពលកកើតឡើងវិញ និងចូលរួមប្រយុទ្ធប្រឆាំងនឹងការប្រែប្រួលអាកាសធាតុ កម្ពុជាក៏ដូចគ្នាដែរ គឺនឹងបន្តជំរុញ និងលើកទឹកចិត្តដល់អ្នកផលិត និងអ្នកប្រើឱ្យងាកមកប្រើថាមពលប្រភេទនេះឱ្យបាន ៥០ ភាគរយនៅឆ្នាំ ២០៤០ នៃចំនួនប្រើប្រាស់សរុប ខណៈនៅឆ្នាំ ២០២១ ការប្រើប្រាស់ថាមពលសូឡាមានត្រឹម ១២ ភាគរយ»។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ថា ក្រសួងទទួលបានព័ត៌មានកាលពីល្ងាចថ្ងៃទី ៦ ខែមិថុនាថា លោកប្រធានាធិបតី Joe Biden បានចេញសេចក្តីប្រកាស និងអនុញ្ញាតពន្យារពេលបណ្តោះអាសន្នលើកលែងពន្ធនាំចូលលើ Solar Cells និង Modules ពីប្រទេសមួយចំនួននៅអាស៊ីអាគ្នេយ៍។ លោកបន្ថែមថា អនុលោមតាមសេចក្តីប្រកាសរបស់ប្រធានាធិបតីអាមេរិកក្រសួងពាណិជ្ជកម្មអាមេរិកនឹងចេញបទប្បញ្ញត្តិសម្រាប់លើកលែងពន្ធលើការនាំចូល Solar Cells និង Modules ពីកម្ពុជា ថៃ ម៉ាឡេស៊ី និងវៀតណាម។
អនុប្រធានសភាពាណិជ្ជកម្មកម្ពុជា លោក លឹម ហេង ក៏អបអរចំពោះដំណឹងការលើកលែងពន្ធនាំចូលលើ Solar Cells និង Modules ពីប្រទេសមួយចំនួននៅអាស៊ីអាគ្នេយ៍ រួមទាំងកម្ពុជា ដោយលោកយល់ថា ការលើកលែងពន្ធនឹងជំរុញការវិនិយោគបន្ទះសូឡានៅកម្ពុជាកាន់តែច្រើនថែមទៀត។
លោកនិយាយថា៖ «នេះជាសញ្ញាល្អមួយទៀត ដោយសារតែយើងមាន GSP ពីអាមេរិកហើយ ឥឡូវថែមទាំងទទួលបានការលើកលែងពន្ធចំពោះផលិតផលសូឡាទៀត ពិតជារឿងដ៏ល្អសម្រាប់ទំនាក់ទំនងពាណិជ្ជកម្មអាមេរិក និងកម្ពុជា។ កន្លងមកការផលិតបរិក្ខារអគ្គិសនី ក៏ដូចជា ផ្ទាំងសូឡានេះ គឺបានដំឡើងនៅកម្ពុជា និងបាននាំចេញច្រើន ស្របពេលអាមេរិកមានការដំឡើងពន្ធចំពោះការនាំចូលពីចិន បន្ទាប់ពីសង្គ្រាមពាណិជ្ជកម្មរវាងគ្នា។ បញ្ហានេះធ្វើឱ្យក្រុមហ៊ុនមួយចំនួនងាកមកបើករោងចក្រផ្សេងៗ ពិសេសបរិក្ខារអគ្គិសនី និងផលិតផលសូឡានេះ នៅកម្ពុជា»៕ LA
វីដេអូ៖
