The Phnom Penh Post Search

Search form




Logo of Phnom Penh Post newspaper Phnom Penh Post - GDT ស្នើ​អ្នកពាក់ព័ន្ធ​ពង្រឹង​អភិបាលកិច្ច និង​រដ្ឋបាល​កិច្ច​ល្អ ដើម្បី​ឱ្យ​ចំណូល​ពន្ធ​កើនឡើង

GDT ស្នើ​អ្នកពាក់ព័ន្ធ​ពង្រឹង​អភិបាលកិច្ច និង​រដ្ឋបាល​កិច្ច​ល្អ ដើម្បី​ឱ្យ​ចំណូល​ពន្ធ​កើនឡើង

Content image - Phnom Penh Post
អគ្គនាយកដ្ឋាន​ពន្ធដារ (GDT)។ ហុង មិនា

GDT ស្នើ​អ្នកពាក់ព័ន្ធ​ពង្រឹង​អភិបាលកិច្ច និង​រដ្ឋបាល​កិច្ច​ល្អ ដើម្បី​ឱ្យ​ចំណូល​ពន្ធ​កើនឡើង

ភ្នំពេញៈ អគ្គនាយកដ្ឋាន​ពន្ធដារ (GDT) ​បាន​ប្រាប់​មន្ត្រី​ពាក់ព័ន្ធ​ឱ្យ​ពង្រឹង​អភិបាលកិច្ច និង​រដ្ឋបាលកិច្ច​ល្អ​របស់​ស្ថាប័នរដ្ឋ ដើម្បី​ធានា​បានការ​គ្រប់គ្រង​ប្រមូល​ពន្ធ​គ្រប់​ប្រភេទ​ប្រកប​ដោយ​តម្លាភាព ជាពិសេស​ទប់ស្កាត់​ការ​គេចវេះ និង​ក្លែងបន្លំ​ពន្ធ​នានា​ដែល​នាំឱ្យ​បាត់បង់​ចំណូល​ថវិកាជាតិ​។

តាម​សេចក្តី​ប្រកាស​ព័ត៌មាន​របស់​អគ្គនាយកដ្ឋាន​ពន្ធដារ​ក្នុង​ថ្ងៃទី​ ៩ ខែមិថុនា បញ្ជាក់ថា កន្លងមក​អគ្គនាយកដ្ឋាន​ពន្ធដារ​បានដាក់​ចេញ​នូវ​វិធាន​ការងារ​ប្រកប​ដោយ​ស្មារតី​បុរេសកម្ម និង​ពង្រឹង​ជានិច្ច​នូវ​រដ្ឋបាលកិច្ច​ល្អ តាមរយៈ​ការពង្រឹង​ការផ្តល់សេវា​ល្អ​ជូន​ប្រជាពលរដ្ឋ និង​ការដាក់ចេញ​ឱ្យប្រើប្រាស់​នូវ​ប្រព័ន្ធ និង​កម្មវិធី​បច្ចេកវិទ្យា​ព័ត៌មាន​ជា​បន្តបន្ទាប់​ ដើម្បី​ពង្រឹង​ការប្រមូល​ចំណូល​ពន្ធ​។ តាមរយៈ​ប្រព័ន្ធ​បច្ចេកវិទ្យា​ព័ត៌មាន​នេះ GDT បាន​រកឃើញ​ករណី​ជនទុច្ចរិត​មួយចំនួន​តូច​បាន​ប្រើប្រាស់​ឯកសារ ឬ​ត្រា​ក្លែងបន្លំ​ដែល​ធ្វើឱ្យ​ខាតបង់​ចំណូល​ពន្ធ​ប្រថាប់ត្រា និង​ពន្ធ​ពាក់ព័ន្ធ​ផ្សេងៗ​ទៀត​។

សេចក្តី​ប្រកាស​ព័ត៌មាន​សរសេរ​ថា​៖ «​ក្នុងន័យនេះ ការចូលរួម​របស់​គ្រប់​ស្ថាប័ន​ពាក់ព័ន្ធ​ក្នុង​ការ​ប្រើប្រាស់​កម្មវិធី​ត្រួតពិនិត្យ និង​តាមដាន​ឯកសារ ​(GDT Check & Track) ​គឺ​មានន័យថា ចូលរួម​ទប់ស្កាត់​ការ​ក្លែងបន្លំ​ឯកសារ ការគេចវេះ និង​ក្លែងបន្លំ​ពន្ធ​»​។

លោក គង់ វិបុល អគ្គនាយក​នៃ​អគ្គនាយកដ្ឋាន​ពន្ធដារ​បាន​ថ្លែង​ក្នុង​សិក្ខា​សាលា​ផ្សព្វផ្សាយ​ស្តីពី ​«​នីតិវិធី​នៃ​ការប្រកាស​បង់ពន្ធ​ប្រថាប់ត្រា​លើ​ការផ្ទេរ​កម្មសិទ្ធិ ឬ​សិទ្ធិ​កាន់កាប់​អចលនទ្រព្យ និង​ការប្រើប្រាស់​កម្មវិធី​ត្រួតពិនិត្យ និង​តាមដាន​ឯកសារ​ (GDT Check & Track)»​ កាលពី​ថ្ងៃទី​ ៨ ខែមិថុនា​ថា កម្មវិធី​ត្រួតពិនិត្យ និង​តាមដាន​ឯកសារ​ត្រូវបាន​បង្កើតឡើង​ក្នុង​គោលបំណង​ជួយ​សម្រួល​ដល់​អ្នក​ជាប់​ពន្ធ និង​អ្នកប្រើប្រាស់​ទាំងអស់​ក្នុងការ​តាមដាន​ស្ថានភាព​ឯកសារ​ដែល​បានដាក់​ចូលមក​រដ្ឋបាល​សារពើពន្ធ ត្រួតពិនិត្យ​ភាពត្រឹមត្រូវ​នៃ​ឯកសារ​ដែល​បានចេញ​ដោយ​រដ្ឋបាល​សារពើពន្ធ ពិនិត្យ​ឯកសារ​ប្រថាប់ត្រា​អចលនទ្រព្យ ពិនិត្យ​លតាបត្រ​ពន្ធ​មធ្យោបាយ ត្រួតពិនិត្យ​ឯកសារ​នានា ពិនិត្យ​បណ្ណ​សម្គាល់​ខ្លួន​មន្ត្រីរាជការ​ពន្ធដារ ត្រួតពិនិត្យ​បង្កាន់ដៃ​បង់ប្រាក់​ពន្ធ និង​កម្មវិធី​ផ្សេងៗ​។

លោក​បន្ថែមថា កម្មវិធី​នេះ​ត្រូវបាន​ដាក់ឱ្យ​ប្រើ​លើ​ទូរស័ព្ទដៃ​ឆ្លាតវៃ ដែល​ដំណើរការ​ទាំង​នៅលើ​ប្រព័ន្ធ​ប្រតិបត្តិការ iOS និង Android​។ ដូច្នេះ​ការចូលរួម​ប្រើ​កម្មវិធី​នេះ គឺ​មានន័យថា​ចូលរួម​ទប់ស្កាត់​ការ​ក្លែងបន្លំ​ឯកសារ ការ​គេចវេះ និង​ក្លែងបន្លំ​ពន្ធ ដែល​អាចជា​ហានិភ័យ និង​បង្កបញ្ហា​ស្មុគស្មាញ​ដល់​អ្នកទទួល​កម្មសិទ្ធិ​អចលនទ្រព្យ និង​ការខាតបង់​ចំណូល​ពន្ធ​ប្រថាប់ត្រា និង​ពន្ធ​ពាក់ព័ន្ធ​ដល់​ថវិកាជាតិ​។

លោក គី សេរីវឌ្ឍន៍ អ្នកជំនាញ​សេដ្ឋកិច្ច​នៃ​រាជបណ្ឌិត្យ​សភា​កម្ពុជា​បាន​ប្រាប់​ភ្នំពេញ​ប៉ុស្តិ៍​នៅ​ថ្ងៃទី​ ៩ ខែមិថុនា​ថា ការប្រមូល​ពន្ធ​មាន​ការ​ធ្លុះធ្លាយ និង​កេង​បន្លំ​នេះ​មិនមែន​ទើប​កើតឡើង​នៅពេលនេះ​ទេ គឺ​កើតមាន​ជាច្រើន​ឆ្នាំ​មកហើយ​។ ដូច្នេះ​ការដាក់ចេញ​របស់​អគ្គនាយកដ្ឋាន​ពន្ធដារ​ក្នុងការ​លុបបំបាត់​ការគេចវេះ និង​ក្លែងបន្លំ​ពន្ធ​នៅពេល​នេះ​ពិតជា​ល្អ​។ លោក​បន្តថា ការពិន័យ​ចំពោះ​អ្នក​ធ្វើអំពើ​ទុច្ចរិត​កេង​បន្លំ​ពន្ធដារ​នេះ​ឱ្យបាន​ធ្ងន់ធ្ងរ គឺជា​កត្តា​មួយ​ដែល​អាចរួមចំណែក​ដល់​ការទប់ស្កាត់​អំពើ​នេះ​បាន​។

លោក​ថ្លែងថា​៖ «​ចំពោះ​ការ​លេចធ្លាយ​ពន្ធ និង​ការកេងបន្លំ​ពន្ធ​នេះ អ្នក​ដែល​រងគ្រោះ គឺ​ប្រជាពលរដ្ឋ​ដែលជា​អ្នក​បង់ពន្ធ ជាពិសេស​ពន្ធ​ប្រថាប់ត្រា​ដែល​ពាក់ព័ន្ធ​ជាមួយ​នឹង​ការទិញ​លក់​ដីធ្លី និង​អចលនទ្រព្យ​ផ្សេងទៀត​។ អ៊ីចឹង​! ពន្ធ​ប្រថាប់ត្រា​នេះ អ្នក​ដែល​ខាតបង់​គឺ​ប្រជាពលរដ្ឋ​ដែល​គាត់​បង់​ទៅឱ្យ​រដ្ឋ​ហើយ​រដ្ឋាភិបាល​ក៏​បាត់បង់​ចំណូល​ហើយ​លេច​ធ្លាយ​ទៅក្នុង​ហៅ​ប៉ៅ​របស់​ជនទុច្ចរិត​ទៅវិញ​»៕ LA

អត្ថបទគួរចាប់អារម្មណ៍