The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋាភិបាល​អនុម័ត​គម្រោង​វិនិយោគ ៤ មាន​ទឹក​ប្រាក់​ជិត ១៦ លាន​ដុល្លារ

រដ្ឋាភិបាល​អនុម័ត​គម្រោង​វិនិយោគ ៤ មាន​ទឹក​ប្រាក់​ជិត ១៦ លាន​ដុល្លារ

Content image - Phnom Penh Post

រដ្ឋាភិបាល​អនុម័ត​គម្រោង​វិនិយោគ ៤ មាន​ទឹក​ប្រាក់​ជិត ១៦ លាន​ដុល្លារ

ភ្នំពេញៈ គម្រោង​វិនិយោគ​ក្នុង​វិស័យ​វាយនភណ្ឌ​ចំនួន ០៤ ដែល​មាន​ទុន​វិនិយោគ​សរុប​ជិត ១៦ លាន​ដុល្លារ បង្កើត​ការងារ​បាន​ជាង ៥ ៧០០ កន្លែង ត្រូវ​បាន​ក្រុម​ប្រឹក្សាអភិវឌ្ឍន៍​កម្ពុជា (CDC) អនុញ្ញាត​ឱ្យ​វិនិយោគ​នៅ​ក្នុង​សប្តាហ៍​ដំបូង​ នៃ​ខែ​មិថុនា​នេះ។

យោង​តាម CDC គម្រោង​វិនិយោគ​ទាំង ០៣ នេះ​រួម​មាន គម្រោង​បង្កើត​រោងចក្រ​ផលិត​ស្បែក​ជើង​របស់​ក្រុម OCEAN FAST (CAMBODIA) FOOTWEAR FACTORY CO., LTD. នៅ​ស្រុក​ពញាឮ ខេត្ត​កណ្តាល មាន​ទុន​វិនិយោគ​ប្រមាណ ៦ លាន​ដុល្លារ​អាមេរិក និង​អាច​បង្កើត​ការងារ​បាន​ចំនួន ១ ៩១៤ កន្លែង, គម្រោង​បង្កើត​រោងចក្រ​ផលិត​កាបូប​គ្រប់​ប្រភេទ​របស់ CASE SI TRAVEL PRODUCTS CO., LTD នៅ​ស្រុក​គងពិសី ខេត្ត​កំពង់ស្ពឺ ទុន​វិនិយោគ​ប្រមាណ ៤,១ លាន​ដុល្លារ​អាមេរិក និង​អាច​បង្កើត​ការងារ​បាន​ចំនួន ១.០២៤ កន្លែង, គម្រោង​បង្កើត​រោងចក្រ​កាត់​ដេរ​សម្លៀក​បំពាក់​របស់ SYHJ GARMENT (CAMBODIA) CO., LTD. នៅ​ស្រុក​អង្គស្នួល ខេត្ត​កណ្តាល មាន​ទុន​វិនិយោគ​ប្រមាណ ៣,៤ លាន​ដុល្លារ​អាមេរិក និង​អាច​បង្កើត​ការងារ​បាន​ចំនួន ១ ៩៥៨ កន្លែង និង​គម្រោង​បង្កើត​រោងចក្រ​ផលិត​កាបូប​គ្រប់​ប្រភេទ​របស់​ក្រុមហ៊ុន SUNRISE OUTDOORS (CAMBODIA) CO., LTD នៅ​ខេត្ត​តាកែវ មាន​ទុនវិនិយោគ​ប្រមាណ ២,៣ លាន​ដុល្លារ​អាមេរិក និង​អាច​បង្កើត​ការងារ​បាន​ចំនួន ៨៥៧ កន្លែង។

អនុប្រធាន​សភាពាណិជ្ជកម្ម​កម្ពុជា លោក លឹម ហេង បាន​និយាយ​ថា ការ​ចុះ​បញ្ជី​ក្រុមហ៊ុន​ថ្មីៗ​មាន​ការ​កើន​ឡើង ហើយ​ក្រុមហ៊ុន​ដែល​ឈរ​លំដាប់​ជួរ​មុខ​នៅ​តែ​ជា​ក្រុមហ៊ុន​មក​ពី​ប្រទេស​ចិន ដោយ​ភាគ​ច្រើន​វិនិយោគ​ទៅ​លើ​វិស័យ​វាយនភណ្ឌ​កាត់​ដេរ​សម្លៀក​បំពាក់ កាបូប និង​ស្បែក​ជើង។

លោក​បាន​បញ្ជាក់​ថា៖ «សភា​ពាណិជ្ជកម្ម​នឹង​បន្ត​ប្រឹងប្រែង​សហការ​ជាមួយ​រាជ​រដ្ឋាភិបាល ក្នុង​ការ​កៀរគរ​អ្នក​វិនិយោគ​បន្ថែម​ទៀត​មក​កម្ពុជា ជា​ពិសេស​ជំរុញ​ឱ្យ​មាន​ការ​វិនិយោគ​លើ​វិស័យ​សំខាន់ បន្ទាប់​ពី​កម្ពុជា​មាន​លក្ខខណ្ឌ​អំណោយ​ផល​ជាច្រើន​សម្រាប់​ទាក់ទាញ​ការ​វិនិយោគ​មក​ពី​បណ្តា​ប្រទេស​ទាំង​នោះ»។

លោក កាំង ម៉ូនីកា អគ្គលេខាធិការលេខាធិការ​រង​នៃ​សមាគម​រោងចក្រ​កាត់​ដេរ​សម្លៀក​បំពាក់​នៅ​កម្ពុជា (GMAC) បាន​ឱ្យ​ដឹង​ថា កំណើន​នៃ​រោងចក្រ​កាត់​ដេរ​សម្លៀក​បំពាក់​នឹង​បន្ត​ជំរុញ​កំណើន​នៃ​ការ​នាំចេញ​វិស័យ​នេះ។

លោក​បាន​បញ្ជាក់​ថា៖ «តាម​ធម្មតា​រោងចក្រ​កាន់​តែ​ច្រើន​មាន​ន័យ​ថា ការ​នាំចេញ​ក៏​កាន់​តែ​ច្រើន​ដែរ។ បើ​សិន​ជា​មិន​មាន​ព្រឹត្តិការណ៍​រំខាន​ធ្ងន់ធ្ងរ​ណា​មួយ ដែល​រំខាន​ដល់​សេដ្ឋកិច្ច​ពិភព​លោក​នោះ​ទេ កម្ពុជា​នៅ​តែ​អាច​រក្សា​នូវ​កំណើន​ការ​នាំចេញ​របស់​ខ្លួន ឬ​ជំរុញ​ឱ្យ​មាន​ប្រសើរ​ឡើង​លើ​ការ​ប្រកួត​ប្រជែង​ក្នុង​វិស័យ​នេះ»៕

អត្ថបទគួរចាប់អារម្មណ៍