.jpg)
ភ្នំពេញៈ រដ្ឋបាលគយអាស៊ានជំរុញឱ្យប្រទេសសមាជិកអាស៊ានដទៃទៀត បញ្ចប់ការកសាងតារាងពន្ធគយអាស៊ានឆ្នាំ ២០២២ (AHTN 2022 ត្រឹមដំណាច់ឆ្នាំ ២០២២ នេះ និងបន្តសិក្សាលើលទ្ធភាពសម្រួលបែបបទគយលើការនាំចេញ នាំចូលទំនិញមានតម្លៃទាប។
នៅក្នុងកិច្ចប្រជុំរយៈពេល ២ ថ្ងៃចាប់ពីថ្ងៃទី ០៧ ដល់ថ្ងៃទី ៩ ខែមិថុនា ឆ្នាំ ២០២២ ស្តីពីអគ្គនាយកគយអាស៊ានលើកទី ៣១ របស់គណៈប្រតិភូអគ្គនាយកដ្ឋានគយនិងរដ្ឋាករកម្ពុជានៃក្រសួងសេដ្ឋកិច្ច និងហិរញ្ញវត្ថុ ជាមួយអគ្គនាយកនៃរដ្ឋបាលគយសិង្ហបុរី និងគណៈប្រតិភូគយនៃប្រទេសសមាជិកអាស៊ាន និងមន្ត្រីលេខាធិការដ្ឋានអាស៊ាន ដោយបានប្រារព្ធបើកក្រោមអធិបតីភាពរបស់ឯកឧត្តម Lawrence Wong ឧបនាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុសិង្ហបុរី។
កិច្ចប្រជុំនេះបានកត់សម្គាល់លើវឌ្ឍនភាពការងារសំខាន់ៗមួយចំនួន ដោយសមាជិកបានស្វាគមន៍ប្រតិបត្តិការផ្ទាល់នៃការផ្លាស់ប្តូរប្រតិវេទន៍គយអាស៊ាន (ACDD) ក្នុងចំណោមសមាជិករួមមាន៖ ព្រុយណេ, កម្ពុជា, ឥណ្ឌូនេស៊ី, ម៉ាឡេស៊ី, មីយ៉ាន់ម៉ា, ហ្វីលីពីន, សិង្ហបុរី និងថៃ ហើយប្រទេសសមាជិកសេសសល់នឹងចូលរួមប្រតិបត្តិការផ្ទាល់នេះត្រឹមឆ្នាំ ២០២២។
ចំពោះការបញ្ចប់ការកសាងតារាងពន្ធគយអាស៊ានឆ្នាំ ២០២២ (AHTN 2022) វិញ សម្រាប់ប្រទេសកម្ពុជា ឥណ្ឌូនេស៊ី និងថៃ បានដាក់ឱ្យអនុវត្តតាំងពីដើមឆ្នាំ ២០២២ ដោយឡែកប្រទេសសមាជិកដទៃទៀត អង្គប្រជុំបានជំរុញឱ្យបង្កើនកិច្ចខិតខំប្រឹងប្រែង ដើម្បីអាចអនុវត្តបានត្រឹមដំណាច់ឆ្នាំ ២០២២ នេះ។
ដោយឡែក នៅក្នុងប្រតិបត្តិការដឹកជញ្ជូនឆ្លងកាត់តាមប្រព័ន្ធឆ្លងកាត់គយអាស៊ាន (ACTS) វិញ ក្នុងចំណោមប្រទេសសមាជិកចូលរួមបានខិតខំប្រឹងប្រែង ដើម្បីជំរុញការប្រើប្រាស់ប្រព័ន្ធ ACTS ក៏ដូចជាគម្រោងសាកល្បងប្រើប្រាស់ប្រព័ន្ធ ACTS សម្រាប់ប្រតិបត្តិការឆ្លងកាត់រវាងប្រទេសកម្ពុជា និងវៀតណាម។ ម្យ៉ាងវិញទៀត កិច្ចប្រជុំនេះក៏មានការអនុម័តផែនការសកម្មភាពរួម ដើម្បីរៀបចំការទទួលស្គាល់ទៅវិញទៅមកលើកម្មវិធីប្រតិបត្តិករសេដ្ឋកិច្ចទទួលបានការអនុញ្ញាត (AAMRA) និងវឌ្ឍនភាពលើកិច្ចពិភាក្សាស្តីពីការដឹកជញ្ជូនទំនិញមានតម្លៃទាបរបស់អាស៊ាន (ALVSP) និងការសិក្សាលើលទ្ធភាពសម្រួលបែបបទគយលើការនាំចេញ នាំចូលទំនិញមានតម្លៃទាបផងដែរ។
អគ្គនាយកគយអាស៊ានក៏បានប្រជុំពិគ្រោះយោបល់ដោយឡែកពីគ្នាជាមួយគណៈប្រតិភូនៃអង្គការគយពិភពលោក, រដ្ឋបាលគយអូស្ត្រាលី, ចិន, ជប៉ុន, និងកូរ៉េ ដើម្បីពង្រឹងកិច្ចសហប្រតិបត្តិការពាក់ព័ន្ធនឹងការងារគយ និងពិគ្រោះយោបល់ជាមួយសមាគមធុរកិច្ចនៃវិស័យឯកជនសំខាន់ៗ រួមមាន៖ ១) ក្រុមប្រឹក្សាធុរកិច្ចអាស៊ាន ២) ក្រុមប្រឹក្សាធុរកិច្ចអាស៊ាន-អឺរ៉ុប និង ៣) ក្រុមប្រឹក្សាធុរកិច្ចអាស៊ាន-អាមេរិក ក្នុងគោលបំណងពង្រឹងទំនាក់ទំនង និងកិច្ចសហការរវាងរដ្ឋបាលគយអាស៊ាន និងវិស័យឯកជន ព្រមទាំងពិភាក្សា និងស្វែងរកដំណោះស្រាយបញ្ហាមួយចំនួន ដើម្បីលើកកម្ពស់កិច្ចសម្រួលពាណិជ្ជកម្ម និងធ្វើឱ្យកាន់តែប្រសើរឡើងនូវបរិយាកាសធុរកិច្ចក្នុងតំបន់។
សូមជម្រាបផងដែរថាកិច្ចប្រជុំអគ្គនាយកគយអាស៊ានលើកទី ៣២ នឹងត្រូវរៀបចំ និងដឹកនាំដោយរដ្ឋបាលគយនៃប្រទេសថៃក្នុងអំឡុងខែមិថុនា ឆ្នាំ ២០២៣៕
