ភ្នំពេញៈ កម្ពុជារំពឹងថាអាចនឹងនាំចេញមៀនប៉ៃលិនជាផ្លូវការទៅកាន់ប្រទេសចិន នៅក្នុងខែកញ្ញាខាងមុខនេះ ដែលជារដូវប្រមូលផល ក្រោយពេលពិធីសារ ស្តីពីលក្ខខណ្ឌតម្រូវភូតគាមអនាម័យ សម្រាប់ការនាំចេញផ្លែមៀនស្រស់កម្ពុជាទៅចិនបានចុះហត្ថលេខារួចរាល់នៅខែមីនា ឆ្នាំ ២០២២។
លោក កែ មុន្ធីវុធ ប្រធាននាយកដ្ឋានការពារដំណាំអនាម័យ និងភូតគាមអនាម័យនៃអគ្គនាយកដ្ឋានកសិកម្មបានឱ្យដឹងថា សម្រាប់ការចាប់ផ្តើមនាំចេញផ្លែមៀនស្រស់ជាលើកដំបូងទៅកាន់ទីផ្សារប្រទេសចិននារដូវប្រមូលផលខាងមុខនេះនឹងមានក្រុមហ៊ុនចំនួន ០៧ និងកសិដ្ឋានចំនួន ៦៤ ដែលបានត្រៀមលក្ខណៈរួចជាស្រេចសម្រាប់ធ្វើការនាំចេញផ្លែមៀនស្រស់ពីកម្ពុជាទៅកាន់ប្រទេសចិន បន្ទាប់ពីទទួលបានការអនុម័តពីនាយកដ្ឋានអនាម័យនិងភូតគាមអនាម័យនៃអគ្គរដ្ឋបាលគយចិន។ ក្រោយពីនោះ បងប្អូនម្ចាស់ចម្ការមៀន និងរោងចក្រវេចខ្ចប់ដទៃទៀតក៏អាចទំនាក់ទំនងដាក់ពាក្យស្នើសុំចុះបញ្ជីនៅអគ្គនាយកដ្ឋានកសិកម្មជាបន្តបន្ទាប់ ប្រសិនមានចំណាប់អារម្មណ៍ចូលរួមនៅក្នុងដំណើរការជំរុញការនាំចេញផ្លែមៀនស្រស់ទៅកាន់ទីផ្សារប្រទេសចិន។
លោកបានគូសបញ្ជាក់ថា៖ «មកទល់ពេលនេះ អគ្គនាយកដ្ឋានកសិកម្មបានទទួលពាក្យស្នើសុំចុះបញ្ជីចម្ការមៀនចំនួន ៦៤ និងរោងចក្រវេចខ្ចប់ចំនួន ៧ ហើយអគ្គនាយកដ្ឋានក៏បានពិនិត្យវាយតម្លៃចម្ការ និងរោងចក្រវេចខ្ចប់ទាំងនេះ និងផ្ញើជូនបញ្ជីចម្ការមៀន និងរោងចក្រវេចខ្ចប់ទៅអគ្គរដ្ឋបាលគយចិន ដើម្បីទទួលបានការអនុញ្ញាតនាំចេញ»។
បើតាមលោក មុន្នីវុធ រោងចក្រវេចខ្ចប់ចំនួន ៧ និងកសិដ្ឋានចំនួន ៦៤ បានត្រៀមលក្ខណៈរួចជាស្រេច សម្រាប់ធ្វើការនាំចេញផ្លែមៀនស្រស់ពីកម្ពុជាទៅចិន បន្ទាប់ពីទទួលបានការអនុម័តពីនាយកដ្ឋានអនាម័យ និងភូតគាមអនាម័យនៃអគ្គរដ្ឋបាលគយចិន។ ដោយឡែកចំពោះបរិមាណនាំចេញអាស្រ័យតាមសមត្ថភាពកែច្នៃរបស់រោងចក្រវេចខ្ចប់ និងផែនការបញ្ជាទិញជាក់ស្តែងពីទីផ្សារចិន។
លោក សួស ស៊ីយ៉ាត ប្រធានសហគមន៍កសិកម្មផលិតផលមៀនប៉ៃលិនបានប្រាប់ឱ្យដឹងថា កសិករបានត្រៀមខ្លួនរួចជាស្រេច រង់ចាំតែការសម្រេចរបស់ក្រសួងកសិកម្មថាឱ្យនាំចេញពេលណា នោះកសិករនឹងអាចប្រមូលបានតាមការកំណត់របស់អ្នកបញ្ជាទិញ។
បើតាមលោកប្រធានសមាគម បច្ចុប្បន្នការដាំដុះមៀនប៉ៃលិនកំពុងតែជួបបញ្ហាប្រឈមខ្លះទាក់ទងនឹងកង្វះខាតប្រព័ន្ធធារាសាស្ត្រ ស្រោចស្រព និងមានកសិករមួយចំនួនធំ មិនទាន់អនុវត្តតាមការណែនាំរបស់ក្រសួងកសិកម្ម ឱ្យអនុវត្តការដាំដុះតាម GAP នៅឡើយ។
លោកបានគូសបញ្ជាក់ថា៖ «យើងមានការព្រួយបារម្ភខ្លះដែរ ព្រោះមកទល់នឹងបច្ចុប្បន្ននេះ កសិករដាំដុះមៀនប៉ៃលិនមិនទាន់បានទៅចុះបញ្ជី ដើម្បីរៀនសូត្រពីការអនុវត្តកសិកម្មល្អបានច្រើននៅឡើយទេ។ ដូចនេះ យើងបារម្ភថា ផ្លែមៀនយើងលូតលាស់មិនបានល្អ ឬក៏កសិករយើងដាំដុះមៀនមិនត្រូវតាមស្តង់ដាដែលអ្នកបញ្ជាទិញចង់បាន»៕