ភ្នំពេញៈ ប្រទេសអាស៊ានចំនួន ៤ បានទិញអង្ករពីកម្ពុជាចំនួនជាង ២,៥ ម៉ឺនតោន ក្នុងរយៈពេល ៥ ខែ ដើមឆ្នាំ ២០២២ កើនជាង ១៧ ភាគរយ បើធៀបនឹងរយៈពេលដូចគ្នាឆ្នាំ ២០២១ ដោយក្នុងនោះប្រទេសម៉ាឡេស៊ី បានគ្រប់គ្រងចំណែកទីផ្សារប្រមាណ ៦០ ភាគរយ។ នេះបើតាមរបាយការណ៍អំពីស្ថានភាពនាំចេញអង្ករកម្ពុជាប្រចាំខែឧសភា ឆ្នាំ ២០២២ របស់ក្រសួងកសិកម្ម រុក្ខាប្រមាញ់ និងនេសាទ។
ស្ថិតិនាំចេញអង្ករបានឱ្យដឹងថា ចាប់ពីខែមករា ដល់ខែឧសភា ឆ្នាំ ២០២២ ការនាំចេញអង្ករទៅបណ្តាប្រទេសជាសមាជិកអាស៊ានមាន ២៥ ៦៩១ តោន កើនឡើង ១៧,៥៩ ភាគរយ បើធៀបនឹងរយៈពេលដូចគ្នាឆ្នាំ ២០២១ ដោយក្នុងនោះប្រទេសម៉ាឡេស៊ី ចំនួន ១៥ ១២០ តោន, ប្រ៊ុយណេ ៨ ០២២ តោន, សិង្ហបុរី ១ ៥៤៩ តោន និងវៀតណាម ១ ០០០ តោន។
លោក ចាន់ សុខឃាំង ប្រធានក្រុមហ៊ុននាំចេញអង្ករទៅទីផ្សារអន្តរជាតិ Signature of Asia Co Ltd., បានប្រាប់ ភ្នំពេញ ប៉ុស្តិ៍ កាលពីថ្ងៃទី ១២ ខែមិថុនាថា អាស៊ាន គឺជាទីផ្សារអាទិភាពទី៣ សម្រាប់ទីផ្សារនាំចេញអង្ករកម្ពុជា បន្ទាប់ពីប្រទេសចិន សហគមន៍អឺរ៉ុប។ បច្ចុប្បន្ននៅក្នុងចំណោមប្រទេសទាំង ១១ ក្នុងតំបន់អាស៊ាន (ប្រទេសទីម័រ) គឺមាន ៥-៦ ប្រទេសដែលអាចមានសមត្ថភាពបំពេញតម្រូវការក្នុងស្រុក និងនាំចេញបាន ចំណែកប្រទេសនៅសល់ គឺសុទ្ធតែជាទីផ្សារដែលកម្ពុជាកំណត់ធ្វើគោលដៅនាំចេញអង្ករ។
លោកបញ្ជាក់ថា៖ «បើទោះបីទីផ្សារនាំចេញអង្ករទៅប្រទេសក្នុងតំបន់អាស៊ានមិនធំដូចទីផ្សារចិន និងសហភាពអឺរ៉ុប ប៉ុន្តែប្រជាជននៅតំបន់អាស៊ានសុទ្ធតែមានទម្លាប់បរិភោគបាយជាអាហារប្រចាំថ្ងៃ ហេតុនេះទំហំនៃតម្រូវការប្រើប្រាស់ គឺមានចំនួនច្រើន ហើយមានប្រភេទអង្ករ និងរសជាតិប្រហាក់ប្រហែលគ្នាផងដែរ។ ចំណុចនេះខ្ញុំអាចនិយាយថា អង្ករដែលតំបន់អាស៊ាននិយមបរិភោគ គឺមិនដូចនឹងប្រភេទអង្ករដែលនិយមបរិភោគនៅប្រទេសកូរ៉េ និងជប៉ុន ជាដើម»។
ទោះយ៉ាងណា សម្រាប់ការនាំចេញអង្ករនៅពេលនេះ លោក សុខឃាំង បានអះអាងថា នៅតែជួបបញ្ហាកង្វះទូកុងតឺន័រដដែល បើទោះបីជាមិនមានលក្ខណៈធ្ងន់ធ្ងរដូចកាលពីអំឡុងការផ្ទុះឡើងនៃជំងឺកូវីដ ១៩ កាលពីឆ្នាំ ២០២០ និងឆ្នាំ ២០២១។
លោក សុង សារ៉ន ប្រធានសហព័ន្ធស្រូវអង្ករកម្ពុជាឱ្យដឹងដែរថា អាស៊ាន គឺជាទីផ្សារដ៏មានសក្ដានុពលរបស់កម្ពុជា ដោយបច្ចុប្បន្នទីផ្សារប្រទេសអាស៊ានបានទិញអង្ករក្រអូបពីកម្ពុជាក្នុងរង្វង់ ១៥ ភាគរយ នៃការនាំចេញសរុបរបស់កម្ពុជា។ សហព័ន្ធស្រូវអង្ករកម្ពុជាបាននិងកំពុងផ្សព្វផ្សាយអំពីគុណភាព និងជម្រើសសុវត្ថិភាពក្នុងការបរិភោគអង្ករកម្ពុជាដល់ប្រទេសដែលជាសមាជិកអាស៊ាន ខណៈបច្ចុប្បន្នប្រទេសក្នុងតំបន់ដែលទិញអង្ករពីកម្ពុជាមាន ៤ គឺម៉ាឡេស៊ី ប្រ៊ុយណេ វៀតណាម និងសិង្ហបុរី។
លោកលើកឡើងថា៖ «ក្រៅពីប្រទេសទាំង ៤ យើងក៏ស្វែងរកឱកាសទីផ្សារនៅក្នុងប្រទេសហ្វីលីពីន ផងដែរ»។
យោងតាមក្រសួងកសិកម្ម នៅក្នុងរយៈពេល ៥ ខែ ដើមឆ្នាំ ២០២២ កម្ពុជាបាននាំចេញអង្ករគ្រប់ប្រភេទចំនួន ២៨៣ ៦៧៥ តោន ក្នុងនោះប្រទេសចិន ១៤៩ ៤៤៧ តោន ស្មើ ២៣,៦៨ ភាគរយនៃចំណែកទីផ្សារនាំចេញទាំងអស់, សហភាពអឺរ៉ុប ៨១ ៩៣១ តោន ស្មើ ២៨,៨៨ ភាគរយ, សមាជិកអាស៊ាន ២៥ ៦៩១ តោន ស្មើ ៩,០៦ ភាគរយ, និងទិសដៅផ្សេងៗទៀត (២២ ប្រទេស) ចំនួន ២៦ ៦០៦ តោន ស្មើនឹង ៩,៣៨ ភាគរយ៕ LA