ភ្នំពេញ៖ វិស័យឯកជន បានស្នើសុំរាជរដ្ឋាភិបាលកម្ពុជា តាមរយៈក្រសួងសេដ្ឋកិច្ច និងហិរញ្ញវត្ថុ ឱ្យបន្តការអនុគ្រោះពន្ធ ដល់វិស័យទេសចរណ៍ រហូតដល់ដាច់ឆ្នាំ ២០២២ ខណៈដែលវិស័យនេះ មិនទាន់មានលំនឹងនៅឡើយ និងសុពលភាពនៃការលើកពន្ធលើវិស័យនេះនៅត្រឹមឆមាសទី១ ឆ្នាំ ២០២២ នេះ។
លោក ឌិន សុមេធារិទ្ធ ប្រធានសមាគមសណ្ឋាគារបានប្រាប់ឱ្យដឹងថា នៅក្នុងវេទិការាជរដ្ឋាភិបាល-វិស័យឯកជន កាលពីថ្ងៃទី១១ មិថុនា វិស័យឯកជន គឺជាកម្រិតនៃកិច្ចប្រជុំក្រុមការងារបច្ចេកទេស ដើម្បីលើកពីបុព្វហេតុ ដែលជំរុញឱ្យវិស័យឯកជនស្នើសុំឱ្យមានការលើកលែងពន្ធរហូតដល់ដំណាច់ឆ្នាំ ២០២២ នេះ។
លោកបានបន្ថែមថា សមាគមសណ្ឋាគារ បានផ្តួចផ្តើមលើការស្នើសុំនេះ ដោយសារតែបានឃើញថា វិស័យឯកជន ផ្នែកទេសចរណ៍មិនទាន់បានរឹងមាំនៅឡើយទេ។
លោកបានបញ្ជាក់ថា៖ «ខ្ញុំបានពិភាក្សាជាមួយលោក លូ ម៉េង ដែលជាសហប្រធានក្រុមការងារវិស័យទេសចរណ៍ និងលោក ដាក អានូដ ដែលជាសហប្រធានខាងផ្នែកពន្ធដារ ដោយបានសរសេរលិខិតទៅសភាពាណិជ្ជកម្មមួយ និងក្រសួងសេដ្ឋកិច្ចមួយ ដោយក្នុងកិច្ចប្រជុំនោះខាងក្រសួងបានយល់ពីបញ្ហារបស់យើងហើយ នៅឡើយតែរង់ចាំការសម្រេចពីឯកឧត្តមឧបនាយករដ្ឋមន្ត្រីក្រសួងសេដ្ឋកិច្ចប៉ុណ្ណោះ»។
លោកបានបន្តថា ភ្ញៀវទេសចរ ដែលបានមកកម្ពុជា ចាប់តាំងពីដើមឆ្នាំ ២០២២ មានចំនួនច្រើនជាងឆ្នាំ ២០២១ មែន តែតិចជាងមុនពេលមានកូវីដ ១៩ ១០ ដង ដូចនេះសម្រាប់វិស័យសណ្ឋាគារនៅរងផលប៉ះពាល់ច្រើន ព្រោះថា ជាសណ្ឋាគារមួយទទួលបានភ្ញៀវប្រហែល ២០ ភាគរយប៉ុណ្ណោះ ធៀបនឹងចំនួនបន្ទប់ដែលមាន។
លោក ធួន ស៊ីណាន ប្រធានក្រុមប្រឹក្សាភិបាល ក្រុមហ៊ុន IMCT ខូអិលធីឌី និងជាប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATACC) បានប្រាប់ ភ្នំពេញ ប៉ុស្តិ៍ថា ថ្វីដ្បិតតែសេដ្ឋកិច្ចបានដំណើរការឡើងវិញក៏ពិតមែន ប៉ុន្តែសម្រាប់វិស័យទេសចរណ៍មិនទាន់មានភាពនឹងនរនៅឡើយទេ ព្រោះថា ចំពោះភាពអ៊ូអរនៅតំបន់ទេសចរណ៍សំខាន់ដូចជារាជធានីភ្នំពេញ និងសៀមរាបជាដើមមានតិចតួចប៉ុណ្ណោះ ហើយភាគច្រើនជាចរន្តពាណិជ្ជកម្ម ។
លោកបានបន្ថែមថា នេះជាពេលវេលា នៃការចាប់ផ្តើមដូចបើសិនត្រូវចំណាយលើការបង់ពន្ធនៅអំឡុងពេលនេះ វាហាក់បីដូចជាបន្ទុកមួយទៀតសម្រាប់វិស័យឯកជន ផ្នែកទេសចរណ៍នេះ។
លោកបានគូសបញ្ជាក់ថា៖ «រដ្ឋាភិបាលបានគិតគូរវែងឆ្ងាយណាស់ ក្នុងការជួយដល់វិស័យឯកជន ដែលទាក់ទងនឹងវិស័យទេសចរណ៍នេះ ដូចជាការផ្តល់កញ្ចប់ថវិកាសហហិរញ្ញប្បទានតាមរយៈធនាគារ SME ដោយមានអត្រាការប្រាក់ទាបជាដើម។ ប៉ុន្តែបើសិនជារដ្ឋាភិបាលពិចារណាក្នុងអនុគ្រោះលើពន្ធអាករបន្ថែម រហូតដល់ដំណាច់ឆ្នាំ ២០២២ ឬពាក់កណ្តាលឆ្នាំ២០២៣ទៀត កាន់តែជាការប្រសើរ ព្រោះថា វិស័យទេសចរណ៍បានរួមចំណែកច្រើនណាស់នៅក្នុងGTD របស់កម្ពុជា។ ដូចនេះ បើសិនជារដ្ឋាភិបាលទុកឱកាសឱ្យវិស័យឯកជនផ្នែកនេះ បន្តដំណើរទៅមុខទៀតបាន តាមរយៈការលើកលែងពន្ធនេះ នោះយើងជឿជាក់ថា អ្នកប្រកបអាជីវកម្មផ្នែកទេសចរណ៍នឹងបន្តឈរជើងបាន»។
លោកស្រី ឆាយ ស៊ីវ លីន ប្រធានសមាគមទីភ្នាក់ងារទេសចរណ៍កម្ពុជា បានឱ្យដឹងដែរថា កំណើននៃភ្ញៀវទេសចរ ដែលចូលមកកម្ពុជា គឺនៅមានកម្រិតនៅឡើយ ដូចនេះ បើសិនជារដ្ឋាភិបាលបន្តលើកលែងពន្ធដល់ដំណាច់ឆ្នាំនេះ នោះនឹងអាចជួយសម្រួលបានច្រើនដល់សណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ ដែលកំពុងតែជួបការលំបាកនៅក្នុងដំណាក់កាលនេះ។
លោកស្រីបានបន្តថា អាជីវកម្មទេសចរណ៍ភាគច្រើន ទាំងនៅខេត្តសៀមរាប ព្រះសីហនុ និងភ្នំពេញ ជាដើមព្យាយាមបើកទ្វារ តែមិនទាន់ទទួលបានចំណូលមួយដែលសមស្របសម្រាប់ទូទាត់ ចំពោះការចំណាយ និងការខាតបង់នាពេលកន្លងទៅបានទេ។
លោកស្រីបានលើកឡើងយ៉ាងដូច្នេះថា៖ «សូមឱ្យក្រសួងសេដ្ឋកិច្ច ក៏ដូចជារាជរដ្ឋាភិបាលពិចារណាសម្របសម្រួលលើកលែងពន្ធ សម្រាប់វិស័យទេសចរណ៍យើងដល់ដំណាច់ឆ្នាំ ២០២២ នេះ ដើម្បីឱ្យអាជីវកម្មទាំងអស់អាចប្រឹងប្រែងងើបឡើងវិញបើកទ្វារ ដើម្បីបង្ហាញដល់ភ្ញៀវទេសចរថា កម្ពុជាពិតជាបានឡើងវិញប្រកបដោយសុវត្ថិភាព និងភាពអ៊ូអរពិតប្រាកដមែន។ការលើកលែងពន្ធនេះ នឹងអាចជួយកាត់បន្ថយការចំណាយរបស់ម្ចាស់អាជីវកម្មមួយកម្រិតស្របពេលដែលស្ថានភាពនៃការបើកដំណើរការឡើងវិញមិនទាន់មានភាពប្រសើរឡើងខ្លាំង។ អាជីវកម្មភាគច្រើន បានបើកឡើងវិញប៉ុន្តែមិនសូវមានភ្ញៀវនោះទេ ដូចនេះបើសិនជាមិនមានការបន្ធូរបន្ថយលើបញ្ហាពន្ធនេះ អាជីវកម្មទាំងនោះអាចប្រឈមនឹងការបិទវិញ»។
ជុំវិញការស្នើលើកលែងពន្ធនេះ លោក តុប សុភក្រ អ្នកនាំពាក្យក្រសួងទេសចរណ៍ បានប្រាប់ថា បញ្ហាការបន្ធូរបន្ថយពន្ធ អាករនេះ មិនមែនសមត្ថកិច្ចខាងក្រសួងទេសចរណ៍ទេ។ប៉ុន្តែ សម្រាប់ឆ្នាំ ២០២២ នេះ ក្រសួងទេសចរណ៍ បានសម្រេចរួចមកហើយ ចំពោះគ្រប់មូលដ្ឋានសេវាកម្មទេសចរណ៍ ដែលបន្តសុពលភាពអាជ្ញាបណ្ណ គឺមិនតម្រូវឱ្យបង់កម្រៃសេវាទេ ដែលនេះជាការរួមចំណែកជួយដល់វិស័យឯកជនផ្នែកទេសចរណ៍ បានមួយកម្រិតដែរ។
លោកបានបញ្ជាក់ថា៖ «ក្រៅពីការលើកលែងការយកកម្រៃលើអាជ្ញារបណ្ណហើយ យើងឃើញថា រាជរដ្ឋាភិបាលក៏បានអនុញ្ញាតឱ្យមូលដ្ឋានអាជីវកម្មទេសចរណ៍អាចទទួលបានកម្ចីដែលមានការប្រាក់ទាប ពីធនាគារSME និងធនាគារក្នុងស្រុក ដែលជាដៃគូ ដែលជាថវិកាហិរញ្ញប្បទានប្រមាណ ១៥០ លានដុល្លារ សម្រាប់ការជួសជុលកែលម្អ និងពង្រឹងមូលដ្ឋានអាជីវកម្មរបស់ខ្លួនឡើងវិញ»។
កាលពីដើមខែកុម្ភៈ ឆ្នាំ ២០២២ ក្រសួងសេដ្ឋកិច្ច និងហិរញ្ញវត្ថុ និងក្រសួងទេសចរណ៍បានចេញប្រកាសអន្តរក្រសួងស្តីពីការអនុវត្តវិធានការគោលនយោបាយគន្លឹះសម្រាប់វិស័យទេសចរណ៍ ដោយបន្តលើកលែងការបង់ពន្ធប្រចាំខែគ្រប់ប្រភេទចំពោះសណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ ដែលបានចុះបញ្ជីជាមួយអគ្គនាយកដ្ឋានពន្ធដារ និងមានសកម្មភាពអាជីវកម្មនៅក្នុងរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកែប ខេត្តកំពត ក្រុងបាវិតនៃខេត្តស្វាយរៀង និងក្រុងប៉ោយប៉ែតនៃខេត្តបន្ទាយមានជ័យ សម្រាប់ឆមាសទី១ ឆ្នាំ ២០២២៕