.jpg)
ហេង ជីវ័ន
ភ្នំពេញៈ គម្រោងវិនិយោគនៅក្នុងតំបន់សេដ្ឋកិច្ចចំនួន ៣ និងក្រៅតំបន់សេដ្ឋកិច្ចពិសេសចំនួន ១ ដែលមានទុនវិនិយោគសរុប ២៣,៨ លានដុល្លារ និងបង្កើតការងារបាន ២ ៣៧៦ កន្លែងត្រូវបានក្រុមប្រឹក្សាអភិវឌ្ឍន៍កម្ពុជា(CDC) អនុម័តនាដើមសប្តាហ៍នេះ។
យោងតាមការប្រកាសព័ត៌មានរបស់ CDC កាលពីថ្ងៃទី ១៣ ខែមិថុនា គម្រោងវិនិយោគចំនួន ៣ ដែលមានទីតាំងនៅក្នុងតំបន់សេដ្ឋកិច្ចពិសេសក្រុងព្រះសីហនុ ត្រូវបាន CDC អនុម័តដែលរួមមាន គម្រោងបង្កើតរោងចក្រផលិតកាវ ថ្នាំលាប ទឹកថ្នាំ របស់ក្រុមហ៊ុន Amto Chemical Technology Co., Ltd មានទុនវិនិយោគ ១,៧ លានដុល្លារបង្កើតការងារបាន ១៥០ នាក់,គម្រោងបង្កើតរោងចក្រផលិតក្តារប៉ាកេ និងក្តារបន្ទះ របស់ក្រុមហ៊ុន Kai Feng Wood Products (Cambodia) Co., Ltd. មានទុនវិនិយោគ ៦,៦ លានដុល្លារបង្កើតការងារបាន ៣០០ នាក់, និងគម្រោងបង្កើតរោងចក្រផលិតកាបូប របស់ក្រុមហ៊ុន Mei An Leatherware (Cambodia) Company Limitedមានទុនវិនិយោគ ១០,៥ លានដុល្លារ បង្កើតការងារបាន ១ ០០០ នាក់។
ចំណែក ១ ទៀត គឺគម្រោងវិនិយោគរោងចក្រកាត់ដេរសម្លៀកបំពាក់របស់ក្រុមហ៊ុន Golden Sun Fashion Apparel Co., Ltdដែលមានទីតាំងនៅសង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគ ៥ លានដុល្លារ និងអាចបង្កើតការងារបាន ៩២៦ កន្លែង។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ភ្នំពេញប៉ុស្តិ៍ថា កម្ពុជាកំពុងទទួលបានកំណើនគម្រោងវិនិយោគថ្មីៗជាបន្តបន្ទាប់ ដែលគម្រោងថ្មីៗទាំងនោះ គឺមានលក្ខណៈចម្រុះគ្រប់វិស័យ ដោយខុសប្លែកកាលពីប៉ុន្មានឆ្នាំកន្លងមក ដែលមានសុទ្ធតែជាគម្រោងវិនិយោគលើវិស័យវាយនភណ្ឌ។ កំណើនចំនួនគម្រោងវិនិយោគនេះគឺអាចមកពីហេតុផលមួយចំនួនមានដូចជា ភាគល្អប្រសើរនៃស្ថានភាពនយោបាយ, មានសុខសន្តិភាពល្អ, មានច្បាប់វិនិយោគអំណោយផល, មានប្រទេសជាដៃគូពាណិជ្ជកម្មច្រើន, ការទទួលបានភាពអនុគ្រោះផ្នែកពន្ធគយពីប្រទេសជាច្រើន, និងជាពិសេសកម្ពុជាកំពុងសម្រេចបានជាបន្តបន្ទាប់នូវកិច្ចព្រមព្រៀងពាណិជ្ជកម្មសេរីជាលក្ខណៈទ្វេភាគី និងពហុភាគី។
លោកបានបន្ថែមថា៖ «នៅពេលដែលលក្ខខណ្ឌផ្ទៃក្នុងរបស់ប្រទេសមួយមានភាពអំណោយផលសម្រាប់ការបណ្តាក់ទុនដោយរាប់ទាំងប្រព័ន្ធច្បាប់ កម្លាំងពលកម្ម និងទីតាំងភូមិសាស្ត្រ ព្រមទាំងមានទីផ្សារទទួលទិញច្រើននោះ គឺប្រាកដណាស់អ្នកវិនិយោគនឹងនាំគ្នាបែបឆ្ពោះទៅកាន់ទីនោះ»។
បន្ថែមពីលើនេះ លោក លឹម ហេង ក៏បានលើកឡើងពីការខិតខំរបស់ផ្នែកឯកជនតាមរយៈសភាពាណិជ្ជកម្មកម្ពុជា ដែលបានប្រឹងប្រែងផ្សព្វផ្សាយពីសក្តានុពលវិនិយោគនៅក្នុងប្រទេសកម្ពុជាទៅកាន់ប្រទេសនានាលើពិភពលោក។ ជាក់ស្តែងកាលពីចុងខែឧសភា កន្លងមក សភាពាណិជ្ជកម្មកម្ពុជាទើបបានបើកការិយាល័យតំណាងរបស់ខ្លួននៅទីក្រុងតូរ៉ុនតូ ប្រទេសកាណាដា ដែលការិយាល័យតំណាងនេះ នឹងដើរតួនាទីយ៉ាងសំខាន់នៅក្នុងការសម្របសម្រួលពាណិជ្ជកម្មរវាងកម្ពុជា និងកាណាដា ក៏ដូចជាជួយជំរុញ និងទាក់ទាញវិនិយោគិនកាណាដាមកវិនិយោគនៅប្រទេសកម្ពុជាឱ្យកាន់តែច្រើន។
បើតាមលោក លឹម ហេង នៅជំហានបន្ទាប់ សភាពាណិជ្ជកម្មកម្ពុជាក៏នឹងបើកការិយាល័យតំណាងនៅប្រទេសជប៉ុនផងដែរ។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បាននិយាយថា កំណើនចំនួនគម្រោងវិនិយោគថ្មីៗ ដែល CDC អនុម័ត គឺមិនត្រឹមតែបង្ហាញពីជំនឿចិត្តរបស់វិនិយោគិនក្នុងការបណ្តាក់ទុននៅកម្ពុជាប៉ុណ្ណោះទេ ប៉ុន្តែក៏នឹងជួយធ្វើឱ្យជញ្ជីងពាណិជ្ជកម្មអន្តរជាតិរបស់កម្ពុជាកាត់បន្ថយឱនភាពផងដែរ។
លោកបានកត់សម្គាល់ថា ការបណ្តក់ទុននៅពេលនេះគឺមានលក្ខណពិសេសជាងពេលមុនៗផងដែរ ដោយការវិនិយោគមានលក្ខណៈចម្រុះលើគ្រប់វិស័យ និងមានខ្លះជាឧស្សាហកម្មកម្រិតមធ្យមផងដែរ ដោយខុសពីមុនដែលស្ទើរទាំងអស់ជាឧស្សាហកម្មធុនស្រាល ជាពិសេសនៅក្នុងវិស័យវាយនភណ្ឌ។
លោកបញ្ជាក់ថា៖«នៅពេលប្រទេសមួយទទួលបានការបណ្តាក់ទុនលើគ្រប់វិស័យវានឹងធ្វើឱ្យសេដ្ឋកិច្ចប្រទេសនោះកាន់តែមានភាពរឹងមាំ ដោយចៀសផុតពីការនាំចេញតែផលិតផលដដែលៗ និងទីផ្សារនាំចេញមានកម្រិត»។
លោកលើកឡើងទៀតថា ការបង្កើតរោងចក្រ/សហគ្រាសផលិតក្នុងស្រុក ក៏ជួយកាត់បន្ថយការធ្វើចំណាកស្រុកទៅធ្វើការនៅបរទេសមានមួយចំណែកផងដែរ៕
