ភ្នំពេញៈ អគ្គលេខាធិការសមាគមរោងចក្រកាត់ដេរនៅកម្ពុជា (GMAC) លោក ខេន លូ បានប្រាប់ថា ឧស្សាហកម្មកាត់ដេរព្រះរាជាណាចក្រកម្ពុជានឹងឈានទៅមុខ ១ កម្រិតទៀត និងមានការប្រកួតប្រជែងកាន់តែខ្លាំងនៅទូទាំងពិភពលោក ប្រសិនបើភាគីពាក់ព័ន្ធចូលរួមអនុវត្តយ៉ាងពេញលេញលើយុទ្ធសាស្ត្រអភិវឌ្ឍន៍វិស័យកាត់ដេរ ស្បែកជើង និងទំនិញធ្វើដំណើរ (GFT) កម្ពុជាឆ្នាំ ២០២២-២០២៧ ដែលបានដាក់ឱ្យដំណើរការពេលថ្មីៗនេះ។
ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី ២១ ខែមីនា បានដាក់ឱ្យដំណើរការជាផ្លូវការនូវ GTF ដោយសង្ឃឹមថា នឹងកំណត់គោលដៅអភិវឌ្ឍន៍រួម បង្កើតភាពឯករាជ្យ និងអភិវឌ្ឍនិរន្តរភាព និងបរិយាប័ន្ននៃវិស័យនេះ។
ចក្ខុវិស័យដ៏សំខាន់បំផុតសម្រាប់យុទ្ធសាស្ត្រនេះគឺ «ដើម្បីអភិវឌ្ឍវិស័យ GTF នៅកម្ពុជាឱ្យកាន់តែមាននិរន្តរភាពបរិស្ថាន ភាពធន់ ដោយផ្តោតលើផលិតផលដែលមានតម្លៃខ្ពស់តែ ១ គត់ និងប្រកួតប្រជែងខ្ពស់ព្រមទាំងជាមូលដ្ឋាន ដើម្បីគាំទ្រការធ្វើពិពិធកម្មសេដ្ឋកិច្ចនៅកម្ពុជាត្រឹមឆ្នាំ ២០២៧»។
លោក ខេន លូ បានប្រាប់ ភ្នំពេញ ប៉ុស្តិ៍ នៅថ្ងៃទី ១៤ ខែមិថុនាថា GMAC បានកំពុងចូលរួមក្នុងការអភិវឌ្ឍ GTF ក្នុងការលើកកម្ពស់ជំនាញ ខ្សែចង្វាក់តម្លៃ ក៏ដូចជាការទាក់ទាញវិនិយោគទៅក្នុងឧស្សាហកម្មនេះ។
លោកបន្តថា៖ «ពួកយើងបានចូលរួមយ៉ាងខ្លាំងក្លាជាមួយនឹងការអភិវឌ្ឍយុទ្ធសាស្ត្រនេះ។ ធាតុជាច្រើននៃយុទ្ធសាស្ត្រនេះបានចាប់ផ្តើមអនុវត្ត (ដូចជាការបង្កើនជំនាញ ការផ្លាស់ប្តូរខ្សែចង្វាក់តម្លៃ ការទាក់ទាញការវិនិយោគ ដោយផ្ដោតលើថាមពលកកើតឡើងវិញ និងការកែលម្អភ័ស្តុភារកម្ម...)។ បើយើងអនុវត្តឱ្យបានពេញលេញយុទ្ធសាស្ត្រនេះប្រាកដណាស់នឹងធ្វើឱ្យវិស័យរបស់យើងកាន់តែមានការប្រកួតប្រជែងនៅទូទាំងពិភពលោក»។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងក្នុងឱកាសដាក់ឱ្យដំណើរការនៃយុទ្ធសាស្ត្រ GFT ថា នេះជាយុទ្ធសាស្ត្រដំបូងដែល «ជំរុញកំណើននៃវិស័យកាត់ដេរ ទាំងក្នុងរយៈពេលខ្លី និងរយៈពេលមធ្យម ដល់រយៈពេលវែង»។
លោកបានបន្តថា ក្នុងអំឡុងពេលនេះ «វិស័យកាត់ដេរនឹងបន្តក្លាយជាចន្ទល់សេដ្ឋកិច្ចដ៏មានសក្ដានុពលមួយតាមរយៈការពង្រីក និងពង្រឹងមូលដ្ឋានឧស្សាហកម្មនៅក្នុងស្រុកសម្រាប់ការនាំចេញ និងធ្វើឱ្យប្រសើរឡើងលើខ្សែចង្វាក់តម្លៃក្នុងតំបន់ និងលើពិភពលោក»។
បើយោងតាមលោក ខែន លូ ការនាំចេញសម្លៀកបំពាក់ វាយនភណ្ឌ និងស្បែកជើងបានកើនឡើងប្រហែល ២៥ ភាគរយ កាលពីត្រីមាសទី១ ឆ្នាំ ២០២២ នេះ ដែលមានទឹកប្រាក់ជាង ៣ ពាន់លានដុល្លារ បើធៀបនឹងរយៈពេលដូចគ្នាកាលពីឆ្នាំមុន។ ក្នុងចំណោមនោះ ផលិតផលសម្លៀកបំពាក់បានកើនឡើងប្រហែល ២០ ភាគរយ និងទំនិញធ្វើដំណើរកើនឡើង ៤៨ ភាគរយ។ ទីផ្សារនាំចេញដ៏ធំបំផុត គឺអាមេរិកមានប្រហែល ៤៣ភាគរយ។
អង្គការពាណិជ្ជកម្មក្រៅប្រទេសរបស់ជប៉ុន (JETRO) បានចេញផ្សាយការស្ទង់មតិ JETRO ឆ្នាំ ២០២១ ស្តីពីលក្ខខណ្ឌអាជីវកម្មរបស់ក្រុមហ៊ុនជប៉ុនដែលកំពុងប្រតិបត្តិការនៅក្រៅប្រទេស កាលពីថ្ងៃទី ៧ ខែ ធ្នូ ឆ្នាំ ២០២១ ថា ក្នុងចំណោមក្រុមហ៊ុនជាច្រើននៅកម្ពុជា គឺមានតែ ៣៩ ភាគរយប៉ុណ្ណោះ ដែលរកបានប្រាក់ចំណេញកាលពីឆ្នាំ ២០២១ ដោយសារតម្លៃផលិតកម្មខ្ពស់៕ LA