ភ្នំពេញៈ ការគ្រប់គ្រងប្រកបដោយប្រសិទ្ធភាពលើការឆ្លង និងរីករាលដាលជំងឺកូវីដ ១៩ នៅកម្ពុជា បានធ្វើឱ្យចំនួនភ្ញៀវទេសចរផ្ទៃក្នុងដែលចេញដើរលេងកម្សាន្តក្នុងប្រទេសនៅថ្ងៃចុងសប្តាហ៍រយៈពេល ២-៣ ខែចុងក្រោយនេះ មានចំនួនជាមធ្យមជាង ១ លាននាក់ ក្នុង ១ ខែ ដែលនេះជាចំនួនដ៏ច្រើនបើធៀបនឹងរយៈពេលដូចគ្នាក្នុងឆ្នាំ ២០២១។ នេះបើតាមទិន្នន័យរបស់ក្រសួងទេសចរណ៍។
ទិន្នន័យភ្ញៀវទេសចរផ្ទៃក្នុងប្រចាំសប្តាហ៍ដែលចេញផ្សាយដោយក្រសួងទេសចរណ៍ និងត្រូវបានដកស្រង់ដោយ ភ្នំពេញ ប៉ុស្តិ៍ បង្ហាញថា នៅថ្ងៃចុងសប្តាហ៍ទី១ និងទី២ ក្នុងខែមិថុនា ឆ្នាំ ២០២២ មានភ្ញៀវទេសចរផ្ទៃក្នុងចេញដើរកម្សាន្តសរុប ៦២១ ៥៩៨ នាក់ ខណៈកាលពីខែឧសភា មានជាង ១,២ លាននាក់ (១ ២៤៩ ២៦៣ នាក់), និងខែមេសា មានចំនួនជាង ៦ លាននាក់ (ភ្ញៀវដើរកម្សាន្តក្នុងឱកាសពិធីបុណ្យចូលឆ្នាំខ្មែរ មានជាង ៥,១៧ លាននាក់)។
សម្រាប់ត្រីមាសទី១ ឆ្នាំ ២០២២ ភ្ញៀវទេសចរផ្ទៃក្នុង មានប្រមាណ ២,៨ លាននាក់ កើនឡើង ៤៨ ភាគរយ បើធៀបនឹងរយៈពេលដូចគ្នាឆ្នាំ ២០២១។ នេះបើយោងតាម លោក ថោង ខុន រដ្ឋមន្ដ្រីក្រសួងទេសចរណ៍។
លោក ហូ វណ្ឌី ប្រធានក្រុមហ៊ុនទេសចរណ៍ វើលដ៏អិចប្រេស និងជាទីប្រឹក្សាសមាគមទីភ្នាក់ងារទេសចរណ៍កម្ពុជា បានប្រាប់ ភ្នំពេញ ប៉ុស្តិ៍ កាលពីថ្ងៃទី ១៥ ខែមិថុនាថា ចំនួនភ្ញៀវទេសចរផ្ទៃក្នុងដែលចេញដើរកម្សាន្តតាមរមណីយដ្ឋាននានាក្នុងប្រទេសពិតជាកើនឡើងច្រើនចាប់ពីពាក់កណ្តាលខែមីនាមក ដែលជាពេលរដ្ឋាភិបាលប្រកាសបើកដំណើរការប្រទេសពេញលេញលើគ្រប់វិស័យ។
លោកបន្ថែមថា ចំនួននេះនឹងបន្តកើនខ្ពស់ថែមទៀត ព្រោះចរន្តដើរលេងកម្សាន្តនៅក្នុងស្រុកកំពុងកើនឡើង បន្ទាប់ពីអាក់ខានដោយសារឥទ្ធិពលនៃការឆ្លងរាលដាលជំងឺកូវីដ ១៩ នារយៈពេលប្រមាណ ២ ឆ្នាំកន្លងមក។
លោកបញ្ជាក់ថា៖ «ខ្ញុំសង្កេតឃើញកំណើនភ្ញៀវចេញដើរកម្សាន្តនៅថ្ងៃចុងសប្តាហ៍ កើនឡើងកាន់តែខ្ពស់បន្ទាប់ពីពិធីបុណ្យចូលឆ្នាំខ្មែរ ព្រោះអំឡុងពេលនោះ គឺមិនមានការផ្ទុះឡើងនៃជំងឺកូវីដ ១៩ នៅក្នុងសហគមន៍គួរឱ្យកត់សម្គាល់ទេ។ ផ្តើមចេញពីចំណុចនេះ ខ្ញុំឃើញនៅតាមរមណីយដ្ឋាននីមួយៗ ពិសេសរមណីយដ្ឋានបែបធម្មជាតិ គឺមានភ្ញៀវទៅកម្សាន្តច្រើនរៀងរាល់ចុងសប្តាហ៍»។
បើតាមលោក វណ្ឌី បច្ចុប្បន្ននេះនិន្នាការដើរលេងកម្សាន្តនៅតាមតំបន់ទេសចរណ៍ធម្មជាតិក្នុងស្រុកកំពុងមានសម្ទុះខ្លាំង ខណៈតំបន់វប្បធម៌ហាក់នៅទ្រឹង។ តំបន់ទេសចរណ៍ធម្មជាតិ ទទួលការពេញនិយមច្រើន ដោយសារងាយស្រួលធ្វើដំណើរ(មានច្រើនទីតាំង), មានខ្យល់អាកាសល្អ, សម្បូរកន្លែងលក់ម្ហូបអាហារ ជាពិសេសអាចមានកន្លែងបោះតង់ស្នាក់នៅផងដែរ។
រដ្ឋមន្ត្រីក្រសួងទេសចរណ៍ លោក ថោង ខុន នាពេលថ្មីៗនេះបានលើកឡើងថា ចរន្តភ្ញៀវទេសចរដ៏ច្រើននេះ បានបង្កើតជាផលប្រយោជន៍សេដ្ឋកិច្ចដ៏ច្រើនទាំងនៅថ្នាក់ជាតិ និងនៅតាមមូលដ្ឋាន។ ការងើបឡើងវិញនៃវិស័យទេសចរណ៍ផ្ទៃក្នុង បានឆាប់រហ័ស គឺកើតចេញពីការដាក់ចេញនូវយុទ្ធសាស្រ្តថ្មីៗជាបន្តបន្ទាប់របស់រដ្ឋាភិបាល ជាពិសេសការជឿជាក់លើភាពស៊ាំសហគមន៍តាមរយៈការទទួលបានវ៉ាក់សាំងប្រឆាំងនឹងជំងឺកូវីដ ១៩ ដែលបង្កើតជាទំនុកចិត្តសម្រាប់ភ្ញៀវទេសចរ និងបងប្អូនប្រជាពលរដ្ឋក្នុងការដើរកម្សាន្តពាសពេញផ្ទៃប្រទេស។
រាជរដ្ឋាភិបាលកម្ពុជា តាមរយៈក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី ១៧ ខែឧសភា ទើបបានប្រកាសដាក់ឱ្យដំណើរការជាផ្លូវការ «គម្រោងសហហិរញ្ញប្បទានស្ដារវិស័យទេសចរណ៍» ក្នុងកញ្ចប់ថវិកាចំនួន ១៥០ លានដុល្លារ ដែលជាបដិភាគរវាងរាជរដ្ឋាភិបាល និងគ្រឹះស្ថានហិរញ្ញវត្ថុចូលរួម (PFIs)មួយចំនួន។ គម្រោងនេះ គឺសម្រាប់ផ្តល់ឥណទានទៅឱ្យសហគ្រាសក្នុងវិស័យទេសចរណ៍ដែលរងផលប៉ះពាល់ពីវិបត្តិនៃជំងឺកូវីដ ១៩ ក្នុងអត្រាការប្រាក់សម្បទាន ដើម្បីជួយស្តារវិស័យទេសចរណ៍នៅកម្ពុជាឱ្យងើបឡើងវិញពីវិបត្តិដែលបណ្តាលមកពីឥទ្ធិពលនៃជំងឺកូវីដ១៩។
លោក ថោង ខុន រដ្ឋមន្រ្ដីក្រសួងទេសចរណ៍ បានឱ្យដឹងថា ក្រសួងទេសចរណ៍ជឿជាក់ថា ការដាក់ឱ្យអនុវត្តន៍គម្រោងសហហិរញ្ញប្បទាន ស្ដារវិស័យទេសចរណ៍ ចំនួន ១៥០ លានដុល្លារនេះ នឹងអាចជួយស្ដារអាជីវកម្មខ្នាតតូច និងមធ្យម ដែលកំពុងខ្វះខាតហិរញ្ញប្បទាន ក្នុងការជួសជុលទីតាំង ឬគុណភាពសេវាកម្មក្នុងវិស័យទេសចរណ៍ឡើងវិញយ៉ាងមានប្រសិទ្ធភាព។
តាមការព្យាករក្នុងឆ្នាំ ២០២២ នេះនឹងមានភ្ញៀវទេសចរផ្ទៃក្នុងដើរកម្សាន្ដទូទាំងប្រទេសប្រមាណជាង ១០ លាននាក់ កើនជាង ១០០ ភាគរយ បើធៀបឆ្នាំ ២០២១ ដែលមានចំនួន ៤,៦៦ លាននាក់។ នេះបើតាមក្រសួងទេសចរណ៍៕