.jpg)
វិភាគដោយ៖ លោក ញឹម កុសល ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ភីភី លីង ស៊ីឃ្យួរឹធី
កាលពីថ្ងៃចន្ទ មាសបានឡើងដល់តម្លៃខ្ពស់ ១ ៨៧៨,៨៤ ដុល្លារក្នុង ១ អោនស៍ និងបានធ្លាក់មកតម្លៃទាបបំផុតនៅថ្ងៃអង្គារ ១ ៨០៤,៩៣ ដុល្លារ ខណៈអ្នកវិនិយោគមាសបានកំពុងរង់ចាំមើលការសម្រេចនៃការដំឡើងអត្រាការប្រាក់ពីការប្រជុំរបស់ធនាគារកណ្តាលសហរដ្ឋអាមេរិក ដែលត្រូវបានប្រកាសកាលពីថ្ងៃព្រហស្បតិ៍ម៉ោង ១ ទៀបភ្លឺ។
យោងតាមការចុះផ្សាយរបស់ The Wall Street Journal របាយការណ៍ទិន្នន័យអតិផរណាដែលកំពុងកើនឡើងយ៉ាងខ្លាំង គឺជាចំណុចប្រឈមដល់សេដ្ឋកិច្ច ហើយទំនងជានាំឱ្យធនាគារកណ្តាលសហរដ្ឋអាមេរិកពិចារណាធ្វើការសម្រេចចិត្ដដ៏គួរឱ្យភ្ញាក់ផ្អើលដល់ទីផ្សារក្នុងការដំឡើងអត្រាការប្រាក់ ០,៧៥% ខ្ពស់ជាងការរំពឹងទុកក្នុងកិច្ចប្រជុំរបស់ពួកគេក្នុងសប្តាហ៍នេះ។ អត្រាអតិផរណាប្រចាំឆ្នាំសម្រាប់សហរដ្ឋអាមេរិក គឺ ៨,៦% សម្រាប់រយៈពេល ១២ ខែ ដែលបញ្ចប់នៅខែឧសភា ឆ្នាំ ២០២២។ វាជាការកើនឡើងប្រចាំឆ្នាំដ៏ខ្ពស់បំផុតចាប់តាំងពីខែធ្នូ ឆ្នាំ ១៩៨១។
មុនការប្រជុំរបស់ខ្លួននៅថ្ងៃទី ៤ ខែមិថុនា ធនាគារកណ្តាលសហរដ្ឋអាមេរិកបានផ្តល់សញ្ញាទៅកាន់ទីផ្សារថា ខ្លួនបានរៀបចំដំឡើងអត្រាការប្រាក់ ០,៥% ក្នុងកិច្ចប្រជុំចុងក្រោយនេះ និងគ្រោងប្រើអត្រា ០,៥% ម្តងទៀតនៅក្នុងកិច្ចប្រជុំនាខែកក្កដាខាងមុខ។ ធនាគារកណ្តាលអាមេរិកបានដំឡើងអត្រាការប្រាក់ ០,៥% កាលពីកិច្ចប្រជុំរបស់ខ្លួនពីខែមុន ដែលជាការដំឡើងខ្ពស់លើកដំបូងចាប់តាំងពីឆ្នាំ ២០០០ មក ដែលខុសពីការដំឡើងរាល់ដងត្រឹមតែ ០,២៥% តែប៉ុណ្ណោះ។
ប្រាក់ដុល្លារអាមេរិកនឹងមានតម្រូវការខ្ពស់ ប្រសិនបើអត្រាការប្រាក់របស់ខ្លួនកាន់តែខ្ពស់ និងជាឱកាសល្អសម្រាប់វិនិយោគិន ដែលមិនចង់ខ្វល់ពីហានិភ័យទីផ្សារខ្លាំង ហើយពួកគេអាចលក់មាសជាបណ្ដោះអាសន្ន និងយកប្រាក់មកដាក់សន្សំ ដើម្បីបានអត្រាការប្រាក់វិញ៕
