ភ្នំពេញៈ ក្រុមហ៊ុនថៃ Aviation Maintenance ចង់បើកសាលាបង្រៀនអាកាសយានិក (Pilot) និងជំនាញជួសជុល និងថែទាំយន្តហោះ (Engineer maintenance) នៅកម្ពុជា ខណៈវិស័យអាកាសចរណ៍កម្ពុជា កំពុងមានកង្វះខាតជំនាញមួយនេះ។
លោក ហឿន សំនៀង នាយកវិទ្យាស្ថានតេជោសែនសាធារណការ និងដឹកជញ្ជូន បានប្រាប់ ភ្នំពេញ ប៉ុស្តិ៍ថា លោកបានជួបជាមួយនឹងក្រុមហ៊ុន Aviation Maintenance Expert Enterprise Co,.Ltd និងក្រុមហ៊ុន Private Jet (JFT Jet) កាលពីថ្ងៃទី ១៣ មិថុនា ដោយបានពិភាក្សាអំពីផែនការនៃការបើកដំណើរការនេះ ប៉ុន្តែវាគ្រាន់តែជាការពិភាក្សាបឋម និងជាការសិក្សាដំបូងដោយមិនទាន់ទទួលបានលទ្ធផលទេ។
លោកបន្ថែមថា បើកសាលាបង្រៀនអាកាសយានិក និងជំនាញជួសជុល និងថែទាំយន្តហោះនេះ ជាគម្រោងរបស់ខាងក្រុមហ៊ុនថៃ Aviation Maintenance ដោយក្រុមហ៊ុននេះ បានស្នើសុំជួបវិទ្យាស្ថានដើម្បីពិភាក្សាកិច្ចការងារនេះ ខណៈក្រុមហ៊ុន Private Jet (JFT Jet) គឺជាក្រុមហ៊ុនក្នុងស្រុក ដែលប្រតិបត្តិការអាជីវកម្មលើផ្នែកនេះ ដូច្នេះក្រុមហ៊ុនមានព័ត៌មានអំពីតម្រូវការទីផ្សារចំពោះអ្នកជំនាញនៅក្នុងផ្នែកអាកាសយានិក, ជួសជុល និងថែទាំយន្តហោះ។
លោកបានបញ្ជាក់ថា៖ «រាជរដ្ឋាភិបាលយើងលើកទឹកចិត្តឱ្យក្រុមហ៊ុនមាន Private Jet ដោយខ្លួនឯង ដែលធ្វើឱ្យទីផ្សារផ្នែកនេះមានការផុលផុសទើបក្រុមហ៊ុន Private Jet (JFT Jet) បានធ្វើការជាមួយក្រុមហ៊ុននៅថៃ និងស្ថានទូតថៃ ដើម្បីចាប់ផ្តើមសិក្សាលទ្ធភាព ស្តីពីកិច្ចសហប្រតិបត្តិការជាមួយវិទ្យាស្ថាន ឬដៃគូផ្សេងៗទៀត ដើម្បីធ្វើការងារនេះ»។
លោកបន្តថា ប្រសិនគម្រោងបើកសាលាបង្រៀនអាកាសយានិក និងជំនាញជួសជុល និងថែទាំយន្តហោះ អាចដំណើរការបាននាពេលអនាគតពិតមែននោះ វាជាឱកាសថ្មីមួយទៀតសម្រាប់កម្ពុជាក្នុងការបង្ហាញពិភពលោកថា វិស័យដឹកជញ្ជូនគមនាគមន៍កម្ពុជាមានការរីកចម្រើន។
លោកស្រី ខែក ខេមរ៉ាត អគ្គនាយិកាក្រុមហ៊ុនPrivate Jet ( JFT Jet) បានប្រាប់ថា ការចាប់អារម្មណ៍របស់ក្រុមហ៊ុន Aviation Maintenance នេះ គឺដោយសារតែក្រុមហ៊ុនបានមើលឃើញកាលានុវត្តភាពលើវិស័យអាកាសចរណ៍នេះ បន្ទាប់ពីប្រទេសថៃ និងកម្ពុជា បានបើកដំណើរការសេដ្ឋកិច្ចពេញលេញឡើងវិញដូចគ្នា។
លោកស្រីបន្តថា បច្ចុប្បន្ននេះក្រុមហ៊ុន Aviation Maintenance កំពុងសិក្សាពីលទ្ធភាពនៅក្នុងការបើកជំនាញនេះ នៅឡើយ ហើយក្រុមហ៊ុនមួយនេះ គ្រោងនឹងជួបជាមួយខាងអាកាសចរស៊ីវិលបន្តទៀត ដើម្បីពិភាក្សាលើការបើកសាលាបណ្តុះបណ្តាលនេះ។
លោកស្រីបញ្ជាក់ថា៖ «ទាំងខាងថៃ និងកម្ពុជា កំពុងសិក្សាដូចគ្នាលើលទ្ធភាព និងស្វែងរកចំណុចរួម មុននឹងអាចដំណើរការសាលាបណ្តុះបណ្តាលនេះបាន។ វិទ្យាស្ថានជាតិតេជោជាស្ថាប័នមួយដែលធំជាងគេ និងមានការបណ្តុះបណ្តាលលើជំនាញវិស្វករ និងជំនាញសំខាន់ៗមួយចំនួន ដូច្នេះស្ថាប័ននេះ មានភាពស័ក្តិសមក្នុងការបើកជំនាញដែលពួកយើងចង់បណ្តុះបណ្តាល»។
លោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិលបានឱ្យដឹងដែរថា កន្លងមកកម្ពុជាមានសាលាបណ្តុះបណ្តាលផ្នែកអាកាសយានិក និងជំនាញជួសជុលថែទាំយន្តហោះនេះមួយហើយ គឺសាកលវិទ្យាល័យអាកាសចរណ៍ឡាម៉ី និងមានក្រុមហ៊ុនមួយចំនួនទៀតដែលបានមកសិក្សាដើម្បីបណ្តុះបណ្តាលជំនាញនេះបន្ថែមដែរ ប៉ុន្តែបានស្ងាត់ទៅវិញដោយសារវិបត្តិនៃជំងឺកូវីដ ១៩។
លោកបានបន្ថែមថា អាកាសចរស៊ីវិលស្វាគមន៍ចំពោះការវិនិយោគបើកសាលាបណ្តុះបណ្តាលជំនាញអាកាសចរណ៍ដើម្បីឱ្យមានការប្រកួតប្រជែងលើសេវា និងតម្លៃ ទោះបីកម្ពុជាមានសក្តានុពលតិចលើវិស័យនេះក៏ដោយ ប៉ុន្តែមិនមែនមានន័យថា ទីផ្សារផ្នែកនេះមិនមានដំណើរការនោះទេ។
លោកបញ្ជាក់ថា៖ «ឧស្សាហកម្មអាកាសចរណ៍នៅតូចនៅឡើយ។ នៅស្រុកគេ ក្រុមហ៊ុនអាកាសចរណ៍មួយអាចមានយន្តហោះពី ៥០ ទៅ ៦០ គ្រឿង ខណៈកម្ពុជាយើងមានត្រឹមតែ ៣ ទៅ ៤ គ្រឿងប៉ុណ្ណោះ ប៉ុន្តែមិនមានន័យថា ទីផ្សារនេះមិនដំណើរការទេ ព្រោះយើងអាចទាក់ទាញភ្ញៀវពីក្រៅប្រទេសមករៀននៅស្រុកយើងបានផងដែរ»។
បើតាមអ្នកនាំពាក្យអាកាសចរស៊ីវិល និស្សិតម្នាក់ដែលសិក្សាផ្នែកអាកាសយានិកចាប់ពីថ្នាក់មូលដ្ឋានរហូតដល់ Online Training និងត្រូវបន្តការសិក្សានៅក្រៅប្រទេសថែមទៀត ត្រូវចំណាយប្រមាណ ១០ ម៉ឺនដុល្លារ៕ LA