ភ្នំពេញៈ អ្នកជំនាញនៅក្នុងវិស័យដឹកជញ្ជូន និងអ្នកសេដ្ឋកិច្ចបាននិយាយថា ផែនការមេរបស់រដ្ឋាភិបាលដែលមានទឹកប្រាក់រហូតដល់ ៥០ ពាន់លានដុល្លារលើការពង្រឹង និងពង្រីកហេដ្ឋារចនាសម្ព័ន្ធផ្លូវថ្នល់ និងការតភ្ជាប់ទៅគ្រប់ច្រកល្ហក ជាពិសេសច្រកទ្វារព្រំដែនអន្តរជាតិជាមួយប្រទេសជិតខាងនឹងផ្តល់ផលវិជ្ជមានជាច្រើនសម្រាប់កំណើនសេដ្ឋកិច្ចជាតិ តាមរយៈការបង្កើនឧត្តមភាពប្រកួតប្រជែង បន្ទាបតម្លៃដឹកជញ្ជូន និងទាក់ទាញវិនិយោគិនបរទេសឱ្យមកបណ្តាក់ទុននៅកម្ពុជា។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនក្នុងការពិភាក្សាជាមួយលោក Mikami Massahiro ឯកអគ្គរាជទូតជប៉ុនប្រចាំនៅកម្ពុជា កាលពីថ្ងៃទី ១៥ ខែមិថុនា នៅទីស្តីការក្រសួងសាធារណការ និងដឹកជញ្ជូនបាននិយាយថា កម្ពុជាកំពុងរៀបចំផែនការមេដែលមានទឹកប្រាក់ប្រមាណ ៥០ ពាន់លានដុល្លារលើការពង្រឹង និងពង្រីកហេដ្ឋារចនាសម្ព័ន្ធផ្លូវថ្នល់ និងការតភ្ជាប់ទៅកាន់ច្រកទ្វារព្រំដែនអន្តរជាតិជាមួយប្រទេសជិតខាង ដើម្បីធ្វើយ៉ាងណាបង្កើនឧត្តមភាពប្រកួតប្រជែងរបស់កម្ពុជា និងទាក់ទាញវិនិយោគិនពីក្រៅប្រទេសមកកម្ពុជា។
លោកថ្លែងថា៖ «រាជរដ្ឋាភិបាលកម្ពុជាកំពុងរៀបចំផែនការមេលើការកែសម្រួលផ្លូវថ្នល់ ការពង្រីក និងលើកកម្រិតគុណភាពផ្លូវ ២ គន្លងទៅ ៤ គន្លង ការបង្កើនការតភ្ជាប់ទៅគ្រប់ច្រកល្ហកសម្រួលដល់ការធ្វើដំណើរ និងការដឹកជញ្ជូនទំនិញបានឆាប់រហ័ស។ ផែនការមេភ័ស្តុភារកម្មដែលរួមមានគម្រោងប្រមាណ ៣៣០ គម្រោងត្រូវការទឹកប្រាក់ប្រមាណ ៥០ ពាន់លានដុល្លារ រួមទាំងការរៀបចំហេដ្ឋារចនាសម្ព័ន្ធរូបវន្តតាមច្រកព្រំដែនអន្តរជាតិជាមួយប្រទេសជិតខាងសំដៅជំរុញការដឹកជញ្ជូន និងការធ្វើចរាចរណ៍ឆ្លងកាត់មានភាពងាយស្រួលក្នុងគោលបំណងធ្វើយ៉ាងណាបង្កើនឧត្តមភាពប្រកួតប្រជែងរបស់កម្ពុជា ជាពិសេសកាត់បន្ថយចំណាយភ័ស្តុភារកម្ម និងដឹកជញ្ជូន និងទាក់ទាញវិនិយោគផងដែរ»។
លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជាបានប្រាប់ភ្នំពេញប៉ុស្តិ៍កាលពីថ្ងៃទី ១៦ ខែមិថុនា ថា លោកមិនដឹងថា ទឹកប្រាក់ ៥០ ពាន់លានដុល្លារនេះនឹងត្រូវក្រសួងយកទៅប្រើប្រាស់សម្រាប់ការវិនិយោគលើផ្នែកណាទេ ប៉ុន្តែការវិនិយោគនេះ គឺប្រាកដជាក្នុងគោលបំណងធ្វើឱ្យវិស័យដឹកជញ្ជូននៅកម្ពុជាកាន់តែល្អជាងមុន ដោយអាចបង្រួមរយៈពេលដឹកជញ្ជូន និងជួយធ្វើឱ្យតម្លៃដឹកជញ្ជូនទាបជាងមុន។
លោកបញ្ជាក់ថា៖ «វិស័យដឹកជញ្ជូន គឺប្រៀបបាននឹងដំណឹកនាំសម្រាប់លំហូរសកម្មភាពសេដ្ឋកិច្ច ព្រោះបើការដឹកជញ្ជូនដំណើរការល្អ ចរន្តសេដ្ឋកិច្ចក្នុងប្រទេសក៏ដើរល្អដូចគ្នា ហើយចំនួនវិនិយោគិនបរទេសចូលមកបណ្តាក់ទុនក៏កើនឡើងទៅតាមនោះដែរ»។
បន្ថែមពីលើនេះ លោក ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបានលើកឡើងថា ការវិនិយោគលើវិស័យឡូជីស្ទិក គឺមានភាពចាំបាច់ណាស់សម្រាប់កម្ពុជាក្នុងពេលនេះ ព្រោះនៅពេលផ្លូវថ្នល់ និងវិស័យឡូជីស្ទិក និងភ័ស្តុភារកម្មមានភាពប្រសើរ វានឹងផ្តល់ភាពវិជ្ជមានច្រើនដល់កំណើនសេដ្ឋកិច្ចកម្ពុជា ហើយក៏ជាផ្នែកមួយគាំទ្រដល់ការប្តេជ្ញារបស់រដ្ឋាភិបាលក្នុងការប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់នៅត្រឹមឆ្នាំ ២០៣០ ផងដែរ។
លោកថ្លែងថា៖ «ផែនការមេភ័ស្តុភារកម្មដែលមានទឹកប្រាក់ ៥០ ពាន់លានដុល្លារនេះ គឺពិតជាស័ក្តិសមសម្រាប់កម្ពុជានាពេលនេះ ដើម្បីដណ្តើមយកឧត្តមភាពផ្នែកសេវាកម្មឡូជីស្ទិក និងភ័ស្តុភារកម្ម»។ ការអភិវឌ្ឍនេះ ក៏នឹងជួយធ្វើឱ្យតម្លៃនៃការដឹកជញ្ជូន ការលើកដាក់ទំនិញ និងកន្លែងស្តុកទំនិញទាបជាងមុនផងដែរ»៕ LA