.jpg)
ភ្នំពេញៈ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានបង្ហាញក្តីសង្ឃឹមថា គណៈប្រតិភូការិយាល័យសេដ្ឋកិច្ចពាណិជ្ជកម្មហុងកុង ( HKETO) នឹងពិចារណាលើការអភិវឌ្ឍគម្រោងសំខាន់ៗមួយចំនួននៅកម្ពុជា ដែលជាគម្រោងដ៏ធំមួយមានទឹកប្រាក់ប្រមាណ ៥០ ពាន់លានដុល្លារ។
ការលើកឡើងនេះត្រូវបានធ្វើឡើងក្នុងជំនួបពិភាក្សារវាងរដ្ឋមន្ត្រីក្រសួងសាធារណការ និងដឹកជញ្ជូនកម្ពុជាលោក ស៊ុន ចាន់ថុល ជាមួយក្រុមគណៈប្រតិភូការិយាល័យសេដ្ឋកិច្ច និងពាណិជ្ជកម្មហុងកុង ប្រចាំទីក្រុងបាងកក ប្រទេសថៃ (HKETO) ដែលដឹកនាំដោយលោក Sheung Yuen Lee កាលពីថ្ងៃទី ១៦ ខែមិថុនា ឆ្នាំ ២០២២។
ជំនួបនេះធ្វើឡើងក្នុងគោលបំណង ដើម្បីស្វែងយល់ឱ្យបានច្បាស់អំពីការអភិវឌ្ឍហេដ្ឋារចនាសម្ព័ន្ធរបស់ប្រទេសកម្ពុជា ក៏ដូចជាដើម្បីវាយតម្លៃអំពីកាលានុវត្តភាពពាណិជ្ជកម្ម និងការវិនិយោគឱ្យបានទូលំទូលាយនៅកម្ពុជាផងដែរ។
ជាកិច្ចចាប់ផ្តើម លោក ស៊ុន ចាន់ថុល បានលើកឡើងអំពីអត្ថប្រយោជន៍ដែលកម្ពុជាទទួលបានពីគំនិតផ្ដួចផ្ដើមខ្សែក្រវាត់ និងផ្លូវ (Belt and Road Initiative) ដែលមានគម្រោងសាងសង់ហេដ្ឋារចនាសម្ព័ន្ធជាច្រើនក្នុងនោះរួមមានការកសាងផ្លូវល្បឿនលឿនរាជធានីភ្នំពេញ-ក្រុងព្រះសីហនុ ដែលជាផ្លូវល្បឿនលឿនលើកដំបូងបង្អស់របស់កម្ពុជាផងដែរ។
បន្ថែមពីលើនេះ លោកក៏បានលើកឡើងពីគម្រោងវិនិយោគសំខាន់ៗសម្រេចបានរបស់រាជរដ្ឋាភិបាលលើការអភិវឌ្ឍហេដ្ឋារចនាសម្ព័ន្ធរូបវន្តនានាដែលមានដូចជា បណ្ដាញផ្លូវ ចំនួន ៣៧ ខ្សែដែលទើបបានកសាង និងបញ្ចប់ជាស្ថាពរនៅក្រុងព្រះសីហនុ គម្រោងសាងសង់ផ្លូវ ៣៨ ខ្សែនៅក្រុងសៀមរាប ខេត្តសៀមរាបជាដើម និងការរៀបចំផែនការមេភ័ស្តុភារកម្មកម្ពុជា។
លោកបានថ្លែងថា៖ «ខ្ញុំសង្ឃឹមថា គណៈប្រតិភូការិយាល័យសេដ្ឋកិច្ចពាណិជ្ជកម្មហុងកុងនឹងពិចារណាលើការអភិវឌ្ឍគម្រោងសំខាន់ៗប្រមាណ ៣៣០ គម្រោង ត្រូវការទុនវិនិយោគប្រមាណ ៥០ ពាន់លានដុល្លារក្នុងរយៈពេល ១០ ឆ្នាំ ដែលបានលើកឡើងនៅក្នុងផែនការមេភ័ស្តុភារកម្ម ដើម្បីចូលរួមចំណែកក្នុងការបង្កើនឧត្តមភាពប្រកួតប្រជែងវិស័យភ័ស្តុភារកម្ម និងការដឹកជញ្ជូនរបស់កម្ពុជា»។
ក្នុងឱកាសនោះ លោក Sheung Yuen Lee នាយកការិយាល័យ HKETO ក៏បានលើកឡើងអំពីសកម្មភាពការងារ បទពិសោធ និងការអនុវត្តល្អរបស់ក្រុមការងារខ្លួនទាក់ទងនឹងជំនាញ គ្រប់គ្រងកំពង់ផែលំដាប់ថ្នាក់ពិភពលោក និងសក្ដានុពលសំខាន់ជាច្រើន និងបានបង្ហាញចំណាប់អារម្មណ៍ចំពោះការផ្លាស់ប្តូរប្រកបដោយភាពវិជ្ជមាន និងការរីកចម្រើនលើវិស័យហេដ្ឋារចនាសម្ព័ន្ធរបស់កម្ពុជាផងដែរ៕
