.jpg)
ផលិតផលខ្មែរដាក់លក់ក្នុងពិព័រណ៍ផលិតផលខ្មែរកាលពីថ្ងៃទី ១៦ ខែ មិថុនាក្នុងខេត្តសៀមរាប។ សហការី
សៀមរាបៈ ក្រសួងពាណិជ្ជកម្មបានរៀបចំពិព័រណ៍ផលិតផលខ្មែរ បន្លែ និងផ្លែឈើលើកទី ១៥ និងបើកយុទ្ធនាការទិញផលិតផលខ្មែររដូវកាលទី ៧ រយៈពេល ៤ ថ្ងៃនៅក្រុងសៀមរាប ខេត្តសៀមរាប។
ពិធីសម្ពោធពិព័រណ៍ផលិតផលខ្មែរ បន្លែ និងផ្លែឈើ លើកទី ១៥ និងយុទ្ធនាការទិញផលិតផលខ្មែររដូវកាលទី ៧ នេះបានប្រព្រឹត្តទៅកាលពីរសៀលថ្ងៃទី ១៦ ខែមិថុនា ឆ្នាំ ២០២២ នៅក្រុងសៀមរាប ខេត្តសៀមរាប ក្រោមអធិបតីភាព លោក ឈួន ដារ៉ា រដ្ឋលេខាធិការក្រសួងពាណិជ្ជកម្ម និងលោក នាក់ ណេរ៉ុន អភិបាលរងខេត្តសៀមរាប រួមទាំងភ្ញៀវជាតិ និងអន្តរជាតិ ផលិតករ ពាណិជ្ជករ កសិករ និស្សិត សរុបប្រមាណ ៣០០ នាក់។
ថ្លែងក្នុងពិធីសម្ពោធពិព័រណ៍នោះលោក ឈួន ដារ៉ា បានលើកឡើងថា យុទ្ធនាការទិញផលិតផលខ្មែរ គឺជាសំឡេងជួងពញ្ញាក់ស្មារតីប្រជាជនកម្ពុជាទូទៅឱ្យងាកមកចូលរួមគាំទ្រ និងប្រើប្រាស់ផលិតផលក្នុងស្រុកដែលកសិករកម្ពុជា ផលិតបាននៅតាមមូលដ្ឋានជំនួសទំនិញនាំចូលពីបរទេសជាជំហានៗ ជាពិសេសបានជួយពង្រឹងចង្វាក់ផលិតកម្មក្នុងស្រុក បង្កើតឱកាសការងារកាន់តែច្រើននៅតាមសហគមន៍ ផ្ដល់ចំណេះដឹង ចំណេះធ្វើ និងបទពិសោធន៍ល្អៗ ដល់ផលិតករកម្ពុជាសំដៅធ្វើយ៉ាងណាជំរុញពួកគាត់ផលិតនូវទំនិញ និងសេវា ដែលមានគុណភាព មានសុវត្ថិភាព មានអនាម័យល្អ មានតម្លៃសមរម្យ និងជាទីទុកចិត្តសម្រាប់អ្នកប្រើប្រាស់។
លោកបានថ្លែងថា៖ «ជាលទ្ធផលឃើញថា ការរៀបចំយុទ្ធនាការទិញផលិតផលខ្មែរក្នុងក្របខ័ណ្ឌទូទាំងប្រទេសពីរដូវកាលមួយទៅរដូវកាលមួយ ធ្វើឱ្យការគាំទ្រ និងការប្រើប្រាស់ផលិតផលក្នុងស្រុកមាននិន្នាការកើនឡើងជាបន្តបន្ទាប់។ ម្យ៉ាងទៀត ក៏បានធ្វើឱ្យផលិតផលខ្មែរចាប់ផ្តើមរីកដុះដាល និងមានវត្តមានលើទីផ្សារកាន់តែច្រើនឡើងទាំងទីផ្សារធម្មតា ផ្សារទំនើប ទីផ្សារក្នុងអាកាសយានដ្ឋាន និងនៅបរទេស ព្រមទាំងអាចចូលរួមប្រកួតប្រជែងជាមួយទំនិញនាំចូលពីបរទេស ដែលបាននិងកំពុងធ្វើចរាចរក្នុងទីផ្សារកម្ពុជា ខណៈដែលកម្ពុជាកំពុងអនុវត្តន៍នូវរបបទីផ្សារសេរី»។
ព្រឹត្តិការណ៍នេះ ត្រូវធ្វើឡើងរយៈពេល ៤ ថ្ងៃ ចាប់ពីថ្ងៃទី ១៦-១៩ ខែមិថុនា ឆ្នាំ ២០២២ នាក្រុងសៀមរាប ដោយមានការដាក់តាំងបង្ហាញ និងលក់ផលិតផលខ្មែរ បន្លែ និងផ្លែឈើ និងផលិតផលរបស់សហគមន៍ផលិតផលភូមិ ១ ផលិតផល ១ មកពីរាជធានី-ខេត្តចំនួន ១៤។ ក្នុងឱកាសនេះផងដែរ គណៈកម្មការរៀបចំពិព័រណ៍បានជ្រើសរើសមុខម្ហូបល្បីៗរបស់ស្រុកទាំង ១២ នៃខេត្តសៀមរាប និងមានការប្រកួតចម្អិនម្ហូបខ្មែរដោយក្រុមការងារចុងភៅក្នុងខេត្តសៀមរាប ដើម្បីជូនភ្ញៀវទស្សនាផងដែរ។
នៅក្នុងពិធីសម្ពោធពិព័រណ៍នេះក៏មានរៀបចំពិធីចុះហត្ថលេខាអនុស្សរណៈយោគយល់គ្នា និងកិច្ចសន្យាពាណិជ្ជកម្ម ចំនួន ៥ លើកិច្ចការជំរុញពាណិជ្ជកម្ម និងការស្វែងរកទីផ្សារជូនកសិករ ផលិតករ និងពិធីប្រគល់លិខិតថ្លែងអំណរគុណជូនពាណិជ្ជករដែលបានសហការជាមួយក្រសួងពាណិជ្ជកម្ម ក្នុងការផ្គត់ផ្គង់ទំនិញក្នុងតំបន់ក្រហមអំឡុងពេលបិទខ្ទប់រាជធានីភ្នំពេញដោយវិបត្តិកូវីដ ១៩ និងពាណិជ្ជករកម្ពុជា ដែលបានសហការជាមួយក្រសួងក្នុងការរៀបចំ និងចូលរួមពិព័រណ៍ពិភពលោកឆ្នាំ ២០២០ ឌុយបៃសហភាពអារ៉ាប់រួមដោយជោគជ័យ៕
