ក្រុមហ៊ុន Donaco International Ltd ជាប្រតិបត្តិករកាស៊ីណូដែលមានមូលដ្ឋាននៅទីក្រុងស៊ីដនី បានចាប់ផ្តើមដំណើរការឡើងវិញពេញលេញនូវទីតាំងកាស៊ីណូ Star Vegas របស់ខ្លួននៅក្រុងប៉ោយប៉ែត ខេត្តបន្ទាយមានជ័យ បន្ទាប់ពីច្រកព្រំដែនទាំងអស់រវាងប្រទេសកម្ពុជា និងថៃ បានដំណើរការឡើងវិញទាំងស្រុង។
យោងតាមឯកសាររបស់ក្រុមហ៊ុនកាលពីថ្ងៃទី ១៧ ខែមិថុនា កាស៊ីណូ Star Vegas Resort & Club បានបើកដំណើរការឡើងវិញកាលពីថ្ងៃទី ១៨ ខែ មិថុនា ឆ្នាំ ២០២២។ ក្រុមហ៊ុន Donacoបានបញ្ជាក់ថា រដ្ឋាភិបាលកម្ពុជា និងអាជ្ញាធរមូលដ្ឋានពាក់ព័ន្ធបានលុបចោលការបិទបណ្តោះអាសន្ននៃប្រតិបត្តិការកាស៊ីណូនៅខេត្តបន្ទាយមានជ័យ ដែលជាទីតាំងកាស៊ីណូ Star Vegas។
ក្រុមហ៊ុននេះបានឱ្យដឹងថា ការកើនឡើងបន្តិចម្តងៗនៃប្រតិបត្តិការពេញលេញនឹងអាចឱ្យក្រុមហ៊ុន Donaco បន្តយុទ្ធសាស្ត្រគ្រប់គ្រងការចំណាយប្រកបដោយការប្រុងប្រយ័ត្ន ដែលខ្លួន បានអនុវត្តអាជីវកម្មដោយពេញលេញដើម្បីឆ្លើយតបទៅនឹងផលប៉ះពាល់ដោយសារតែការរីករាលដាលជំងឺកូវីដ ១៩។
លោក PorntatAmatavivadhana ជាប្រធានមិនមែនប្រតិបត្តិ បានលើកឡើងថា៖ «យើងមានសេចក្តីសោមនស្សរីករាយ ដែលបានបើកដំណើរការ កាស៊ីណូ Star Vegas ឡើងវិញ និងការត្រឡប់ទៅរកប្រតិបត្តិការពេញលេញ បន្ទាប់ពីការរំខានរយៈពេលយូរដោយសាររតែការរីករាលដាលជំងឺកូវីដ។ ព្រំដែនកម្ពុជា-ថៃក៏បានបើកឡើងវិញផងដែរ ដែលជាធម្មតា ជាកន្លែងដែលអតិថិជនរបស់កាស៊ីណូStar Vegas ភាគច្រើនមានប្រភពមកពីប្រទេសថៃ»។
លោកលើកឡើងថា៖ «ទន្ទឹមនឹងលក្ខខណ្ឌម៉ាក្រូសេដ្ឋកិច្ចអំណោយផល យើងនឹងរក្សាការផ្តោតការយកចិត្តទុកដាក់របស់យើងលើការគ្រប់គ្រងប្រកបដោយភាពប្រុងប្រយ័ត្ននៃការចំណាយសាជីវកម្ម និង ប្រតិបត្តិការ។ ជាការពិតណាស់ វានឹងត្រូវការពេលវេលាខ្លះៗ មុនពេលប្រតិបត្តិការត្រឡប់ទៅដូចពីមុន ប៉ុន្តែកត្តាខាងក្រៅទាំងនេះ គឺជាការលើកទឹកចិត្តយ៉ាងខ្លាំងសម្រាប់អាជីវកម្មរបស់យើង»។
លោក អ៊ូក សោភ័ណ្ឌឯកអគ្គរាជទូតកម្ពុជាប្រចាំប្រទេសថៃ បានប្រាប់ភ្នំពេញប៉ុស្តិ៍ថា ជាមួយនឹងការបើកឡើងវិញនូវគ្រប់ច្រកព្រំដែនរវាងប្រទេសទាំង២ នឹងជំរុញសកម្មភាពសេដ្ឋកិច្ចឆ្លងកាត់ព្រំដែន ជាពិសេសលំហូរពាណិជ្ជកម្ម និងការវិនិយោគ។
លោកបានថ្លែងថា៖«ការបើកព្រំដែនឡើងវិញ គឺជាសញ្ញាវិជ្ជមានមួយរបស់ប្រទេសទាំង២ក្នុងការធ្វើឱ្យប្រសើរឡើងនូវពាណិជ្ជកម្ម ទេសចរណ៍ និងការវិនិយោគទ្វេភាគីរបស់យើង»។ លោកបន្ថែមថា ក្រុមហ៊ុនមួយចំនួននៅប្រទេសថៃ នៅពេលនេះចាប់អារម្មណ៍យ៉ាងខ្លាំងក្នុងការពង្រីកអាជីវកម្មរបស់ពួកគេនៅក្នុងប្រទេសកម្ពុជា។
កាលពីឆ្នាំ ២០២១ ភ្ញៀវទេសចរដែលធ្វើដំណើរពីប្រទេសថៃមកកម្ពុជាមានចំនួនសរុប ៨១ ៨៤៤នាក់ ដែលជាចំនួនខ្ពស់បំផុតក្នុងចំណោម១០ប្រទេស បន្ទាប់មកគឺប្រទេសចិនមានចំនួន៤៥ ៧៧៥នាក់ និងវៀតណាមមានចំនួន ២២ ១២០ នាក់។ នេះបើយោងតាមក្រសួងទេសចរណ៍។
ចំនួនភ្ញៀវទេសចរបរទេសដែលមកទស្សនាកម្ពុជាបានធ្លាក់ចុះ ៨៤,៩៦ ភាគរយពី ១ ៣០៦ ១៤៣ នាក់ កាលពីឆ្នាំ ២០២០ មកត្រឹម ១៩៦ ៤៩៥ នាក់ កាលពីឆ្នាំ ២០២១ ដែលចំនួនចុងក្រោយនេះតំណាងឱ្យការធ្លាក់ចុះជិត ៩៧,០៣ ភាគរយ ពីចំនួន ៦ ៦១០ ៥៩២ នាក់កាលពីឆ្នាំ ២០១៩៕LA