.jpg)
ការនាំចេញត្រីប្រាពីកម្ពុជាទៅកាន់ទីផ្សារចិន អាចនឹងពន្យារពេលដល់ខែកក្កដា។ ហេង ជីវ័ន
ភ្នំពេញ៖ គម្រោងនាំចេញត្រីប្រាសាកល្បងបរិមាណ២០តោន ទៅកាន់ប្រទេសចិននៅខែមិថុនានេះ អាចនឹងត្រូវពន្យារពេលដល់ខែកក្កដា ខណៈដែលរដ្ឋបាលជលផល និងកសិដ្ឋានចិញ្ចឹមត្រីប្រា កំពុងរង់ចាំដំណឹងពីខាងក្រុមហ៊ុននាំចេញ ដែលជាក្រុមហ៊ុនតែមួយគត់ ដែលទទួលបានសិទ្ធិក្នុងការនាំត្រីប្រាទៅចិន។
លោក ឈួន ចំណាន ប្រធាននាយកដ្ឋានបច្ចេកវិទ្យា កែច្នៃ នៃរដ្ឋបាលជលផល បានប្រាប់ភ្នំពេញប៉ុស្តិ៍នៅថ្ងៃទី ២០ ខែមិថុនា នេះថា ខាងក្រុមហ៊ុនកំពុងខ្វះខាតសំភារះមួយចំនួនដែលគាំទ្រលើការកែច្នៃ និងនាំចេញ ដូច្នេះការនាំចេញអាចនឹងពន្យាពេលដល់ចុងខែកក្កដា ឬដើមខែសីហា។
លោកបានបន្ថែមថា ខាងស្ថានទូតកម្ពុជា ប្រចាំប្រទេសចិន និងរដ្ឋបាលជលផលនៃក្រសួងកសិកម្ម គ្រោងនឹងរៀបចំពិធីសម្ពោធការនាំចេញសាកល្បងនេះ ដោយមានការឯកភាពគ្នារួចរាល់ហើយ នៅឡើយចាំតែការសម្រេចពីភាគីរោងចក្រកែច្នៃប៉ុណ្ណោះ ថានាំចេញបានពេលពិតប្រាកដ។
លោកបានបញ្ជាក់ថា៖ «ចំណុចសំខាន់ដែលយើងចង់បញ្ជាក់ គឺការនាំចេញត្រីប្រាទៅកាន់ប្រទេសចិន មិនមានការផ្អាកនោះទេ គ្រាន់តែអាចពន្យារពេលបន្តិច អាចថាដោយសារតែភាគីខាងក្រុមហ៊ុននាំចេញរៀបចំមិនទាន់បានរួចរាល់ក៏ថាបាន។ដូចនេះយើងនឹងព្យាយាមទាក់ទងទៅក្រុមហ៊ុនបន្ថែមទៀត ដើម្បីដោះស្រាយបញ្ហានេះ។ ម្យ៉ាងវិញទៀត ភាគីចិនគេក៏ត្រៀមរួចរាល់ក្នុងទទួលយកត្រីប្រា នៅពេលយើងនាំចេញផងដែរ»។
បើតាមលោក ចំណាន បច្ចុប្បន្នរដ្ឋបាលជលផល បាននិងកំពុងជួយដល់ក្រុមហ៊ុនក្នុងស្រុកមួយដែលមានឈ្មោះថា គីមជូ អាហរ័ណ នីហរ័ណនិងដឹកជញ្ជូនអន្តរជាតិ ដែលមានបទពិសោធលើការនាំចេញទៅកាន់ប្រទេសចិន ដើម្បីឱ្យក្រុមហ៊ុននេះទទួលបានសិទ្ធិក្នុងការនាំចេញត្រីប្រាទៅកាន់ប្រទេសចិនដែរ។
លោកថ្លែងបញ្ជាក់ថា៖ «ក្រុមហ៊ុនក្នុងស្រុកភាគច្រើនមិនសូវចាប់អារម្មណ៍ក្នុងការនាំចេញត្រីប្រាទៅកាន់ប្រទេសចិននោះទេ ដោយសារតែបែបបទនីតិវិធីរដ្ឋបាលគយចិនមានលក្ខណៈតឹងរ៉ឹងណាស់។ ដូច្នេះ មានក្រុមហ៊ុនក្នុងស្រុកមួយ ដែលគេចាប់អារម្មណ៍បែបនេះ ខាងរដ្ឋបាលជលផលយើងនឹងប្រឹងប្រែងដល់ក្រុមហ៊ុននេះ ធ្វើយ៉ាងណាឱ្យទទួលបានសិទ្ធិក្នុងការនាំចេញត្រីប្រាទៅចិននេះ។ មានក្រុមហ៊ុននាំចេញកាន់តែច្រើន យើងក៏អាចនាំចេញត្រីប្រាយើង ក្នុងបរិមាណច្រើនដែរ»។
លោក អ៊ុំ ចាន់ចំណាន ប្រធានផ្នែករដ្ឋបាលនៃកសិដ្ឋានចិញ្ចឹមត្រីប្រា យន់ សុវណ្ណារិទ្ធ ដែលមានទីតាំងនៅខណ្ឌព្រែកព្នៅ រាជធានីភ្នំពេញ និងជាកសិដ្ឋានមួយដែលទទួលបានសិទ្ធិក្នុងការចិញ្ចឹមផ្គត់ផ្គង់នាំចេញទៅចិនដែរនោះ បានប្រាប់ថា កសិដ្ឋានរបស់លោក ក៏ដូចជាកសិដ្ឋាន ២ ផ្សេងទៀត បានត្រៀមខ្លួនរួចជាស្រេចហើយ និងកំពុងតែទន្ទឹងរង់ចាំដំណឹងពីខាងក្រុមហ៊ុននាំចេញផងដែរ ព្រោះថាក្រោយពេលចរចាតម្លៃរួច ខាងក្រុមហ៊ុននេះ មិនទាន់ឆ្លើយតប ឬស្រុះស្រួលលើបញ្ហាតម្លៃនៅឡើយទេ។
លោកបានបញ្ជាក់ថា៖ «យើងមិនទាន់ឃើញខាងក្រុមហ៊ុនទាក់ទងវិញទេ ដោយកាលពីប្រជុំចរចាតម្លៃគ្នានោះ យើងស្នើសុំតម្លៃ៥៥០០រៀល ក្នុងមួយគីឡូក្រាម តែក្រុមហ៊ុនលើកឡើងថាថ្លៃ និងសុំពេលពិចារណាសិន។ តាំងពីពេលនោះមក ខាងក្រុមហ៊ុនមិនទាន់បានទាក់ទងមកទេ ប៉ុន្តែខាងកសិដ្ឋានខ្ញុំក៏មិនមានការព្រួយបារម្ភដែរ ដោយសារយើងមានទីផ្សារក្នុងស្រុកស្រាប់ហើយ គ្រាន់តែតម្លៃបានទាប។ កសិដ្ឋានយើងអាចផ្គត់ផ្គង់ទីផ្សារក្នុងស្រុកបានពី ១០០០ ទៅ ២០០០ តោនក្នុងមួយឆ្នាំ»។
លោកបានបន្តថា សព្វថ្ងៃនេះ ទំនិញគ្រប់មុខ និងការដឹកជញ្ជូនមានការឡើងថ្លៃខ្លាំងណាស់ ដូចនេះខាងកសិដ្ឋានចង់បានតម្លៃមួយដែលសមស្រប អាចទូទាត់ការចំណាយបាន និងអាចចំណេញបានខ្លះដែរ៕
វីដេអូ៖
