ភ្នំពេញៈ កម្ពុជាបានប្រើប្រាស់ថវិកាជាង ៣ ពាន់លានដុល្លារអាមេរិក នៅក្នុងការដោះស្រាយផលប៉ះពាល់ទាំងផ្នែកសង្គម និងសេដ្ឋកិច្ច ដែលបណ្តាលមកពីវិបត្តិជំងឺកូវីដ១៩ សំដៅធ្វើយ៉ាងណារក្សាបានលំនឹងសកម្មភាពសង្គមសេដ្ឋកិច្ចក្នុងរយៈពេលជាង ២ ឆ្នាំមកនេះ។
បើយោងតាមរបាយការណ៍ក្រសួងសេដ្ឋកិច្ច និងហិរញ្ញវត្ថុ ស្តីអំពីក្របខ័ណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈសម្រាប់ការរៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ ចេញផ្សាយកាលពីថ្ងៃទី ៣១ ឧសភា ជ័យជម្នះលើសមរភូមិប្រយុទ្ធប្រឆាំងនឹងជំងឺកូវីដ ១៩ គឺជាផ្លែផ្កានៃការដាក់ចេញនូវវិធានការឆ្លើយតបភ្លាមៗ និងបានទាន់ពេលវេលា ដោយរាជរដ្ឋាភិបាលរួមមាន វិធានការអន្តរាគមន៍សង្គម-សេដ្ឋកិច្ច ចំនួន ១០ ជុំ សំដៅដោះស្រាយបញ្ហាចំពោះមុខ, គាំទ្រសកម្មភាពធុរកិច្ចពាណិជ្ជកម្ម និងការគាំពារអាយុជីវិត និងទ្រទ្រង់ជីវភាពរស់នៅរបស់ប្រជាពលរដ្ឋ ក៏ដូចជាជំរុញកំណើន និងបង្កើនភាពធន់សេដ្ឋកិច្ច-សង្គម។
របាយការណ៍ដដែលបានឱ្យដឹងថា រដ្ឋាភិបាលបានប្រើប្រាស់ថវិកាប្រមាណ ៨២៤ លានដុល្លារ ក្នុងឆ្នាំ ២០២០ និង ១ ២៩១ លានដុល្លារ ក្នុងឆ្នាំ ២០២១ សម្រាប់ការអនុវត្តវិធានការអន្តរាគមន៍បន្ទាន់ៗក្នុងការដោះស្រាយផលប៉ះពាល់ទាំងផ្នែកសង្គម និងផ្នែកសេដ្ឋកិច្ច ដែលបណ្តាលមកពីវិបត្តិជំងឺកូវីដ ១៩ ហើយបានវិភាជថវិកាចំនួន ៩៨៩ លានដុល្លារបន្ថែមទៀតសម្រាប់បន្តអនុវត្តវិធានការអន្តរាគមន៍ក្នុងឆ្នាំ ២០២២ នេះ។
ក្រសួងសេដ្ឋកិច្ចលើកឡើងថា៖ «ភាពជោគជ័យនៃយុទ្ធនាការជាតិចាក់វ៉ាក់សាំងកូវីដ ១៩ និងការគ្រប់គ្រងស្ថានភាពជំងឺកូវីដ ១៩ បានល្អប្រសើរ ព្រមទាំងនិន្នាការធូរស្រាលនៃជំងឺកូវីដ ១៩ ជាសកល បានអនុញ្ញាតឱ្យកម្ពុជាអាចបិទបញ្ចប់នូវ «ព្រឹត្តិការណ៍សហគមន៍ ២០ កុម្ភៈ» ហើយបានបើកប្រទេស និងដំណើរការសកម្មភាពសង្គម-សេដ្ឋកិច្ចក្នុងស្រុកពេញលេញឡើងវិញចាប់តាំងពីចុងឆ្នាំ ២០២១ មក»។
លោក ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានប្រាប់ ភ្នំពេញ ប៉ុស្តិ៍ កាលពីថ្ងៃទី ២០ ខែមិថុនាថា ក្នុងរយៈពេលជាង ២ ឆ្នាំនៃការរីករាលដាលជំងឺកូវីដ ១៩ រហូតមកដល់ពេលនេះរាជរដ្ឋាភិបាលបានប្រើប្រាស់កញ្ចប់ថវិកាចំគោលដៅ និងមានប្រសិទ្ធភាពខ្ពស់ ជាពិសេសទាក់ទងនឹងការទិញវ៉ាក់សាំង ការប្រើប្រាស់ក្នុងការជួយស្តារសកម្មភាពសង្គម-សេដ្ឋកិច្ច តាមរយៈការផ្ទេរសាច់ប្រាក់ដោយផ្ទាល់ដល់ជនងាយរងគ្រោះ និងកម្មករនិយោជិតដែលបាត់បង់ការងារ, និងការចាក់ទុនទៅក្នុងធនាគារ SME និងធនាគារអភិវឌ្ឍន៍ជនបទ ដើម្បីជួយលើកស្ទួយសកម្មភាពសេដ្ឋកិច្ច។ ជាមួយគ្នានេះដែរថវិកាមួយចំនួនក៏បានប្រើទៅលើការកសាង និងធ្វើឱ្យប្រសើរឡើងនៃហេដ្ឋារចនាសម្ព័ន្ធ ដូចជានៅខេត្តព្រះសីហនុ និងសៀមរាប និងតាមតំបន់ឆ្នេរផងដែរ។
លោកថ្លែងថា៖ «ទាក់ទងនឹងកញ្ចប់ថវិកាដែលរដ្ឋាភិបាលបានប្រើប្រាស់ក្នុងរយៈពេលជាង ២ ឆ្នាំមកនេះ តាមខ្ញុំតាមដានអង្កេតមើលឃើញថា រដ្ឋាភិបាលបានប្រើប្រាស់ចំតម្រូវការ និងមានទាំងប្រសិទ្ធភាព និងប្រសិទ្ធផល មានន័យថា ការចំណាយរបស់រដ្ឋាភិបាលកម្ពុជា គឺទៅលើការទិញវ៉ាក់សាំងបានទាន់ពេលវេលា ដើម្បីចាក់ជូនប្រជាពលរដ្ឋដោយឥតគិតថ្លៃ ហេតុដូច្នេះហើយបានយើងឆាប់បើកប្រទេសពេញលេញបានលឿន។ ក្រៅពីនោះគឺរដ្ឋាភិបាលក៏បានប្រើប្រាស់ទៅលើជនងាយរងគ្រោះ និងកម្មករនិយោជិតដែលបាត់បង់ការងារជាដើម។ ការប្រើប្រាស់ថវិកា គឺចំគោលដៅតែម្តង ដែលបញ្ជាក់អំពីភាពជោគជ័យនៃការគ្រប់គ្រងកូវីដ ១៩ នេះ ព្រមទាំងធ្វើឱ្យកម្រិតនៃការរីករាលដាល ឬមរណភាពមានកម្រិតទាប។
ក្រសួងសុខាភិបាលបានប្រកាសរកមិនឃើញមានអ្នកឆ្លងជំងឺកូវីដ ១៩ ថ្មីក្នុងក្របខ័ណ្ឌទូទាំងប្រទេស គិតត្រឹមថ្ងៃទី ២០ ខែមិថុនា មានរយៈពេល ៤៤ ថ្ងៃហើយ។ នេះបើតាមសេចក្តីប្រកាសព័ត៌មានរបស់ក្រសួង។
តាមសេចក្តីប្រកាសបញ្ជាក់ថា គិតត្រឹមថ្ងៃទី ២០ មិថុនា ឆ្នាំ ២០២២ ចំនួនអ្នកឆ្លងកូវីដ ១៩ សរុបទូទាំងប្រទេសមានចំនួន ១៣៦ ២៦២ នាក់ អ្នកជាសះស្បើយ ១៣៣ ២០៦ នាក់ និងអ្នកស្លាប់ ៣ ០៥៦ នាក់ដដែល៕ LA
វីដេអូ៖