​ភ្នំពេញៈ រដ្ឋាភិបាល​កម្ពុជា សម្រេច​បង្កើត​អនុគណៈ​ក​ម្មាធិ​ការវិនិយោគ​រាជធានី-ខេត្ត ជា​សេនាធិការ​ឱ្យ​រដ្ឋបាល​រាជធានី​-​ខេត្ត ដើម្បី​ជា​យន្តការ​ក្នុងការ​​ពិនិត្យ​សម្រេច​លើ​ការ​វិនិយោគឯកជន ដែលមាន​ទុនវិនិយោគ​សមមូល​នឹង ៥​ លាន​ដុល្លារ​ចុះ និង​ដោះស្រាយ​វិវាទ​ពាក់ព័ន្ធ​នឹង​គម្រោង​វិនិយោគ​។​

​លោក ហ៊ុន សែន នាយក​រដ្ឋ​មន្ត្រី​នៃ​កម្ពុជា​បានចេញ​អនុក្រឹត្យ​បង្កើត​អនុគណៈកម្មាធិកា​រវិ​និ​យោគ​រាជធានី​-​ខេត្ត​នេះ​ កាល​​ពីថ្ងៃ​ទី ​២០ ខែមិថុនា​ ដោយមាន ៨ ​ជំពូក និង ១៣​ មាត្រា ដែលមាន​អក្សរ​កាត់ (​អ​.​គ​.​វ​.​រ​.​ខ​.) គឺជា​សេនាធិការ​ឱ្យ​រដ្ឋបាល​រាជ​​ធានី​-​ខេត្ត ដែលមាន​សមាស​​ភាព​នៃ​អនុគណៈកម្មាធិការ​វិ​និ​យោគ​រាជធានី​-​ខេត្ត អភិបាល​នៃ​គណៈ​អភិបាល​រាជធានី​-​ខេត្ត​ទាំងអស់ គឺជា​ប្រធាន និង​អភិបាលរង​នៃ​គណៈ​អភិបាល​​រាជធានី​-​ខេត្ត ១ ​រូប ជា​អនុ​ប្រ​​ធាន និង​ប្រធាន​មន្ទីរ​ពាក់ព័ន្ធ​មួយចំនួន​ជា​សមាជិក ខណៈ​សមាសភាព​ជាក់ស្តែង​នឹងត្រូវ​កំណត់ដោយ​សេចក្តីសម្រេច​របស់​រដ្ឋ​បាល​រាជធានី​-​ខេត្ត​។​

​ក្នុង​អនុក្រឹត្យ​នេះ​បញ្ជាក់ថា អនុគណៈកម្មាធិការ​វិនិយោគ​រាជធានី​-​ខេត្ត មាន​តួនាទី និង​ភារកិច្ច​ពិនិត្យ និង​សម្រេច​លើ​ការចុះបញ្ជី ការផ្តល់​ការលើក​​ទឹកចិត្ត ការធានា​ការទិញ ការ​​លក់ ការរួមបញ្ចូល​គ្នា ការ​លុប និង​ការដោះស្រាយ​វិវាទ​នានា​ពាក់ព័ន្ធ​នឹង​គម្រោង​វិនិយោគឯកជន ដែលមាន​ទុនវិនិយោគ​សមមូល ៥​ លាន​ដុល្លារ​ចុះ​ក្នុង​ដែន​សមត្ថកិច្ច​របស់រ​ដ្ឋ​បាល​រាជធានី-ខេត្ត​សាមី​នីមួយៗ​។​

​អនុប្រធាន​សភាពាណិជ្ជកម្ម​​កម្ពុជា លោក លឹម ហេង បាន​ប្រាប់​ ភ្នំពេញ ​ប៉ុស្តិ៍​ថា សភា​ពា​​ណិ​ជ្ជ​កម្ម​កម្ពុជា បានស្នើ​សុំ​ការ​កែសម្រួល​ទំហំ​ទឹកប្រាក់​វិ​និ​យោគ​ដែល​អនុគណៈ​ក​ម្មា​ធិ​​ការវិនិយោគ​រាជធានី​-​ខេត្ត ​មាន​សិទ្ធិ​ក្នុងការ​អនុម័ត​នេះ​តាំងពី​ពេល​មានការ​កែសម្រួល​ច្បាប់​វិនិយោគ​ថ្មី​មកម្ល៉េះ ដោយពេល​នោះ​ខាង​វិស័យ​ឯកជន​ស្នើឱ្យ​ក្រុមប្រឹក្សា​អភិវឌ្ឍន៍​កម្ពុជា ​(CDC) ផ្តល់​សិទ្ធិ​ដល់ អ​.​គ​.​វ​.​រ​.​ខ​. អាច​អនុម័ត​លើ​គម្រោង​វិនិយោគ​ដែលមាន​ទុន​ចាប់ពី ១០ ​លាន​ដុល្លារ​ចុះ​។

លោក​បន្ថែមថា ការ​អនុញ្ញាតឱ្យ អ​.​គ​.​វ​.​រ​.​ខ​. អាច​អនុម័ត​លើ​គម្រោង​វិនិយោគ​ដែលមាន​ទុន​ពី ៥ លាន​ដុល្លារ ​ចុះ​នេះ​ក៏​ល្អប្រសើរ​ដែរ ខណៈ​ពីមុន​អ​.​គ​.​វ​.​រ​.​ខ​.​អាច​អនុម័ត​បាន​ត្រឹម ២​ លាន​ដុល្លារ​ប៉ុណ្ណោះ​។​

​លោក​និយាយថា​៖ «​ទំហំ​វិ​និ​យោគ​ពី​ក្រៅប្រទេស​មកកាន់​​តែ​ធំ ដូច្នេះ​ទាមទារ​ឱ្យមាន​ការ​​ធ្វើ​ប្រតិភូកម្ម​សិទ្ធិអំណាច​ទៅឱ្យ អ​.​គ​.​វ​.​រ​.​ខ​. កាន់តែ​ធំ ដើម្បីឱ្យ​ខេត្ត​ទាក់ទាញ​វិនិយោគ ក៏ដូចជា​ងាយ​អនុម័ត​គម្រោង​វិ​និ​យោគ​នៅ​ខេត្ត​នោះ​តែម្តង ដែល​រោងចក្រ​សហគ្រាស​ទាំងអស់​បង្ខិត​កាន់តែ​ជិត​វត្ថុធាតុដើម និង​អាច​ផ្តល់​ការងារ​ដល់​ពលរដ្ឋ​នៅតាម​បណ្តា​ខេត្ត ចៀសវាង​ការប្រមូលផ្តុំ​នៅ​ទីក្រុង​»​។​

​លោក​កត់សម្គាល់​ឃើញថា មួយរយៈ​ចុងក្រោយ​នេះ CDC បានអនុម័ត​គម្រោង​វិនិយោគ​មួយចំនួន​ដែល​មិនមែន​វិស័យ​កាត់ដេរ រួមមានវិស័យ​ឧស្សា​ហ​កម្ម​ធុន​ធ្ងន់ និង​ធុន​មធ្យម​ជា​បណ្តើរៗ ដូចជា​រោងចក្រ​ផលិត​សម្បក​កង់​យានយន្ត រោងចក្រ​ដំឡើងរថយន្ត និង​ផ្នែក​ធនធាន​រ៉ែ ដែល​នឹង​ក្លាយជា​ចន្ទល់​សេដ្ឋ​កិច្ច​មួយទៀត​នាំឱ្យ​កម្ពុជា​មិន​ពឹង​ផ្អែកលើ​វិស័យ​កាត់ដេរ​។​

​លោក ហុង វណ្ណៈ អ្នកជំនាញ​សេដ្ឋកិច្ច​នៃ​រាជបណ្ឌិត្យសភា​កម្ពុជាបាន​និយាយថា នេះ​ជា​យន្តការ​ការងារ​មួយ​របស់​រដ្ឋា​ភិ​​បាល ដើម្បី​អនុវត្ត​ការងារ​ឱ្យ​កាន់​តែមាន​ប្រសិទ្ធភាព ដោយបាន​ផ្តល់​អត្ថប្រយោជន៍ និង​កាលា​​នុ​វត្ត​ភាព​ច្រើន​សម្រាប់​វិ​យោគិន​ទាំង​ក្នុង និង​ក្រៅប្រទេស ក្នុងការ​អនុញ្ញាត​វិនិយោគ​នៅតាម​បណ្តា​រាជធានី​-​ខេត្ត​។​

​លោក​បន្ថែមថា យន្តការ​នេះ គឺជា​យន្តការ​មួយ​ល្អ​សម្រាប់​ឱ្យ​ថ្នាក់ដឹកនាំ​នៅ​រាជធានី​-​ខេត្ត បង្កើន​កិច្ចសហប្រតិបត្តិការ​ក្នុងការ​ទាក់ទាញ​អ្នកវិនិយោគ​ ដើម្បី​ជំរុញ​ការវិនិយោគ​នៅក្នុង​ដែន​សមត្ថកិច្ច​របស់ខ្លួន​។​

​លោក​បាន​បញ្ជាក់ថា​៖ «​ការ​ធ្វើ​ប្រតិភូកម្ម​សិទ្ធិអំណាច​ដល់​ថ្នាក់ក្រោម​ជាតិ​នេះ គឺជា​ការ​​ប្រកួតប្រជែង​សមត្ថភាព​មួយ​សម្រាប់​ថ្នាក់ដឹកនាំ​នៅតាម​រាជ​​ធានី-​ខេត្ត ដោយ​ខេត្ត​នីមួយៗ​នឹង​ដើរតួនាទី​កាន់តែ​សំខាន់ ក្នុងការ​រៀបចំ​ផែនការមេ​ឱ្យបាន​ច្បាស់លាស់​ជំរុញ​ការអភិវឌ្ឍ​នៅក្នុង​ខេត្ត​របស់ខ្លួន​»៕ LA