សៀមរាប៖ ក្រុមហ៊ុន អង្គរ​វ៉ា​យ​ដ៏​ឡាយ​ហ្វ៍ និង អឹ​ឃ្វា​រៀម បាន​ចំណាយ​ថិ​វ​កា ១៨ លាន​ដុល្លារ បង្កើត​សួនសត្វ​មួយ នៅ​ខេត្តសៀមរាប​ដើម្បី​អប់រំ​ផ្សព្វផ្សាយ​ពី​ការអភិរក្ស​សត្វ​ និងទាក់ទាញ​ភ្ញៀវទេសចរ​ជាតិ-អន្តរជាតិ គ្រោង​នឹង​បើក​ដំណើរការ​នៅ​ខែតុលា​ខាងមុខនេះ។

បច្ចុប្បន្ន ក្រុមហ៊ុន​នេះ កំពុង​សាងសង់​ហេដ្ឋារចនាសម្ព័ន្ធ​ចាំបាច់ សម្រាប់​វា​រី​សត្វ និង​ថែរក្សា​សត្វព្រៃ​លើ​ផ្ទៃដី​ចំនួន ៦ ហិកតា ក្នុងចំណោម​ផ្ទៃដី​សរុប​ទំហំ ២២ ហិកតា ដែលមាន​ទីតាំង​ស្ថិតនៅក្នុង ភូមិ​ក្បូន ឃុំ​ខ្ចាស់ ស្រុក​សូទ្រនិគម ខេត្តសៀមរាប។ លោក ម៉េង ហៀ​ង នាយក​ចាត់ការ​ទូទៅ​នៃ​ក្រុមហ៊ុន​អង្គរ​វ៉ា​យ​ដ៏​ឡាយ​ហ្វ៍ និង អឹ​ឃ្វា​រៀម បានឱ្យដឹងថា ក្នុង​ឆ្នាំ ២០២១ ក្រុមហ៊ុន​បាន​សាងសង់​ហេដ្ឋារចនាសម្ព័ន្ធ​សម្រាប់​ដាក់តាំង និង​ថែរក្សា​វា​រី​សត្វ (ប្រភេទ​ត្រី​ទឹកសាប ត្រី​ទឹកប្រៃ និង​ពពួក​អណ្តើក​ជាដើម) និង​ពពួកសត្វ​នៅលើ គោក​សម្រេចបាន​ប្រមាណ ៧០%។

លោក​បាន​បន្តថា បច្ចុប្បន្ន ដំណើរការ​សាងសង់​កំពុង​ប្រព្រឹត្តទៅ​យ៉ាងសកម្ម ជាពិសេស​ហេដ្ឋារចនាសម្ព័ន្ធ​សម្រាប់​ប្រភេទ​សត្វព្រៃធំៗដូចជា សត្វ​ខ្លា ដំរី ខ្លាឃ្មុំ​តូច ត្រី​ទឹកសាប និង​ត្រី​ទឹកប្រៃ និង​ក៏មាន​ត្រី​នាំ​មកពី​ទន្លេ​អា​ម៉ា​ហ្សូ​ន​ផងដែរ។ សួនសត្វ​ក៏បាន​សាងសង់​អគារ​បន្ទប់ពិសោធន៍ និង​ព្យាបាល​សត្វព្រៃ។ គម្រោង​បាន​ចំណាយ​ប្រមាណ​ជា ១៨លាន​ដុល្លារ​សម្រាប់ធ្វើ​ការវិនិយោគ ហើយ​គ្រោង​នឹង​បើ​សម្ពោធ​ឱ្យ​​ដំណើរការ​ជា​ផ្លូវការ​នៅ​ខែតុលា​ខាងមុខ។

លោ​ក​បាន​បញ្ជាក់ថា៖ «ក្រុមហ៊ុន​មានបំណង​ស្នើសុំ​គោលការណ៍​នាំចូល​ប្រភេទ​សត្វព្រៃ​ចំនួន ០៨ ប្រភេទ ស្នើ​នឹង ៦១ ក្បាល ដែលមាន​ដូចជា ដំរី​អាស៊ី Asian elephant Elephas maximus ៨ ក្បាល,ខ្លាធំ Sumatran tiger Panthera tigris sumatrae ៨ ក្បាល,ខ្លាឃ្មុំ​តូច Sun bear Ursus malayanus ៥ ក្បាល,ភេ​តូច Oriental small-clawed otter Aonyx cinereus ១០ ក្បាល,ស្កា​តូច Small asian mongoose Herpestes javanicus ១០ ក្បាល,កាំ​ប្រ​ម៉ា East asian porcupine Hystrix brachyura ១០ ក្បាល,ពស់ថ្លាន់​ធំ Reticulated python Python reticulatus ៥ ក្បាល,ពស់ខ្សែគោ​ក្រហម​ត្នោត Oriental whip snake Ahaetulla prasina ៥ ក្បាល»។

លោក វេ​ង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ​បាន​ថ្លែងថា គម្រោង​សួនសត្វ​នេះ ពិត​ជាមាន​សារៈសំខាន់​ណាស់ ហើយក៏​ចាត់ទុកជា​គម្រោង​ដំបូង​គេ​ក្នុង​ខេត្តសៀមរាប ដែលជា​ខេត្ត​ប៉ូល​សេដ្ឋកិច្ចជាតិ​សម្រាប់​វិស័យ​ទេសចរណ៍។

លោក​បាន​បន្ថែមថា សួនសត្វ មិន​គ្រាន់តែ​ជា​ចំណី​ចក្ខុ​ប៉ុណ្ណោះ​ទេ ប៉ុន្តែ​ថែមទាំង​ជា​កន្លែង​ថែរក្សា ការពារ​ប្រភេទ​សត្វព្រៃ និង​មច្ឆជាតិ​កម្ពុជា​ដែល​ជិត​ផុត​ពូជ និង​ខ្លះ​មាន​ដោយ​កម្រ។ ម្យ៉ាងទៀត ជា​កន្លែង​ផ្សព្វផ្សាយ អប់រំ និង​យល់ដឹងបាន​ស៊ីជម្រៅ​អំពី​គ្រប់​ប្រភេទ​សត្វ​ដល់​យុវជន​កម្ពុជា​ជំនាន់​ក្រោយ និង​បម្រើ​វិស័យ​ទេសចរណ៍​នាពេល​អនាគត​ដ៏​ខ្លី។

លោក​បាន​បញ្ជាក់ថា៖ «យើង​បាន​គាំទ្រ និង​លើកទឹកចិត្ត​ឱ្យ​​ក្រុមការងារ​ជំនាញ​ដែល​កំពុង​បន្ត​សាងសង់​ហេដ្ឋារចនាសម្ព័ន្ធ​នៅ​សេសសល់ ឱ្យ​បាន​ទាន់ពេល ដើម្បី​ឱ្យ​គម្រោង​បើកសម្ពោធ​ដំណើរការបាន​ជោគជ័យ។ សួនសត្វ ត្រូវ​សហការ​ជាមួយ​រដ្ឋបាល​ព្រៃឈើ និង​រដ្ឋបាល​ជលផល​ដើម្បី​ពិនិត្យ​លើ​ការងារ​អភិរក្ស​សត្វ ការថែរក្សា និង​បង្កាត់​ពូជ​ផងដែរ»។

លោក ហូ វណ្ឌី ទីប្រឹក្សា​សមាគម​ទីភ្នាក់ងារ​ទេសចរណ៍​កម្ពុជា បាន​ប្រាប់​ភ្នំពេញ​ប៉ុស្តិ៍ថា វិស័យ​ទេសចរណ៍កម្ពុជា គឺ​ផ្តោតលើ​វប្បធម៌​និង​ធម្មជាតិ ហើយ​ការជ្រើសរើស​យក​ខេត្តសៀមរាប ជាទី​តាំង​បង្កើត​សួនសត្វ គឺជា​ជម្រើស​មួយ​ដ៏​ល្អ​សម្រាប់​អ្នកវិនិយោគ និង​ជាការ​រួមចំណែក​ទាក់ទាញ​ទេសចរទៅកាន់​ខេត្តសៀមរាប​ផងដែរ។

លោក​បានបញ្ជាក់​យ៉ាង​ដូច្នេះ​ថា៖«គម្រោង​សួនសត្វ​នេះ នឹង​ក្លាយជា ទីកន្លែង​មួយ​ដ៏​ទាក់ទាញ និង​ស្រូបយក​ភ្ញៀវទេសចរ​ពី​គ្រប់​ទិស​ទៅកាន់​ខេត្ត​​សៀមរាប​បន្ថែមទៀត ជាពិសេស​ក្រោយ​កម្ពុជា និង​ប្រទេស​ជិតខាង​បាន​បើក​ដំណើរការ​ទេសចរណ៍​ឡើងវិញ»៕