.jpg)
មជ្ឈមណ្ឌលពាណិជ្ជកម្មឯកជនកម្ពុជា ត្រូវបានបើកដំណើរការនៅទីក្រុង Atsugi នៃខេត្ត Kanagawa ប្រទេសជប៉ុន កាលពីថ្ងៃទី ២០ មិថុនា។ រូបថត ក្រសួងពាណិជ្ជកម្ម
ភ្នំពេញៈ អ្នកជំនួញ និងអ្នកសេដ្ឋកិច្ចបានលើកឡើងថា មជ្ឈមណ្ឌលពាណិជ្ជកម្មឯកជនកម្ពុជា (Cambodia Private Commercial Center) នៅទីក្រុង Atsugi នៃខេត្ត Kanagawa ប្រទេសជប៉ុនដែលបើកដំណើរការកាលពីសប្តាហ៍មុន នឹងចូលរួមចំណែកយ៉ាងច្រើនក្នុងការជួយផ្សព្វផ្សាយក៏ដូចជាទាក់ទាញវិនិយោគិនបរទេស ពិសេសពីប្រទេសជប៉ុនឱ្យចូលមកបណ្តាក់ទុននៅកម្ពុជាកាន់តែច្រើន។
មជ្ឈមណ្ឌលពាណិជ្ជកម្មឯកជនកម្ពុជានៅទីក្រុង Atsugi នៃខេត្ត Kanagawa ប្រទេសជប៉ុនត្រូវបានសម្ពោធជាផ្លូវការកាលពីថ្ងៃទី ១៨ ខែមិថុនា ឆ្នាំ ២០២២ ដោយមានការចូលរួមពីលោក ទុយ រី ឯកអគ្គរាជទូតកម្ពុជាប្រចាំប្រទេសជប៉ុន និងមានការចូលរួមពីថ្នាក់ដឹកនាំប្រទេសជប៉ុនជាច្រើនរូប។
លោកស្រី កែវ មុំ ម្ចាស់សហគ្រាសផលិតនំស្រួយលីលីដែលកំពុងចាប់ដៃគូវិនិយោគជាមួយក្រុមហ៊ុនជប៉ុន Kameda Sei-ka Co., Ltd បានប្រាប់ភ្នំពេញ-ប៉ុស្តិ៍ក្នុងថ្ងៃទី ២១ ខែមិថុនា ថា មជ្ឈមណ្ឌលពាណិជ្ជកម្មឯកជនកម្ពុជានឹងក្លាយជាកន្លែងដាក់តាំង និងផ្សព្វផ្សាយផលិតផលខ្មែរទៅប្រជាជន និងវិនិយោគិនជប៉ុន ក៏ដូចជាទាក់ទាញអ្នកវិនិយោគជប៉ុនឱ្យចូលមកបណ្តាក់ទុននៅកម្ពុជា។
លោកស្រីបន្តថា បើកម្ពុជាអាចទាក់ទាញអ្នកវិនិយោគជប៉ុនឱ្យមកបញ្ជាទិញទំនិញ ឬចូលមកវិនិយោគនៅកម្ពុជាកាន់តែច្រើន គឺជារឿងល្អណាស់ ព្រោះប្រជាជនជប៉ុនអាចចាត់ទុកថា អតិថិជនមានប្រាក់ចំណូលច្រើន មានភាពស្មោះត្រង់ គោរពច្បាប់ និងស្តង់ដាគុណភាពច្បាស់លាស់។ បច្ចុប្បន្នជប៉ុនក៏ជាទីផ្សារធំ និងមានកំណើនជាវិជ្ជមានសម្រាប់ផលិតផលកម្ពុជាផងដែរ។
លោកស្រីប្រាប់ថា៖ «ជប៉ុន គឺជាអតិថិជន និងជាវិនិយោគិនដែលមានភាពស្មោះត្រង់ និងមានកម្រិតស្តង់ដាខ្ពស់ ដូច្នេះបើកម្ពុជា និងជប៉ុនអាចមានទំនាក់ទំនងកាន់តែល្អ វានឹងផ្តល់ផលប្រយោជន៍ច្រើនសម្រាប់ជួយជំរុញកំណើនសេដ្ឋកិច្ចជាតិ»។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បាននិយាយថា ការបើកមជ្ឈមណ្ឌលពាណិជ្ជកម្មឯកជននៅប្រទេសជប៉ុន គឺជាយន្តការ ឬបែបបទពាណិជ្ជកម្មអន្តរជាតិក្នុងការផ្សព្វផ្សាយ និងពន្យល់ឱ្យអ្នកវិនិយោគបរទេសយល់ដឹងពីសក្តានុពល និងភាពអំណោយផលសម្រាប់ការចូលមកបណ្តាក់ទុននៅក្នុងប្រទេសកម្ពុជា។ តាមរយៈមជ្ឈមណ្ឌលនេះ កម្ពុជាមិនត្រឹមតែអាចទាក់ទាញចំណាប់អារម្មណ៍អ្នកវិនិយោគជប៉ុនឱ្យស្គាល់ផលិតផលរបស់កម្ពុជាប៉ុណ្ណោះទេ ប៉ុន្តែថែមទាំងអាចទាក់ទាញទេសចរជប៉ុនឱ្យស្គាល់ប្រទេសកម្ពុជាកាន់តែច្រើនទៀតផង។
លោកអះអាងថា៖ «បើទោះបីមជ្ឈមណ្ឌលនេះជារបស់ផ្នែកឯកជន ប៉ុន្តែការបើកមជ្ឈមណ្ឌលនេះ គឺមានន័យថា ផលិតផលកម្ពុជាជាច្រើននឹងត្រូវដាក់តាំងបង្ហាញនៅទីនោះ ដែលសកម្មភាពនេះនឹងជួយឱ្យផលិតផលកម្ពុជាត្រូវបានគេស្គាល់កាន់តែច្រើននៅក្នុងប្រទេសជប៉ុន»។
ទោះយ៉ាងណា លោក វណ្ណៈ បញ្ជាក់ថា ដោយសារប្រទេសជប៉ុនមានតម្រូវការគុណភាពកម្រិតខ្ពស់ ដូច្នេះ ដើម្បីទទួលបានចំណែកទីផ្សារនៅទីនោះ គឺគ្រប់ផលិតផលត្រូវតែផលិតឱ្យមានគុណភាពខ្ពស់។
ឯកអគ្គរាជទូតកម្ពុជាប្រចាំនៅប្រទេសជប៉ុន លោក ទុយ រី បាននិយាយថា នេះគឺជាសមិទ្ធផលថ្មីសន្លាងដែលបានពីការរួមសហការរបស់វិស័យឯកជននៅជប៉ុន និងស្ថាប័នជំនាញនៅកម្ពុជា ដោយមានស្ថានទូតកម្ពុជាប្រចាំប្រទេសជប៉ុនជាស្ពានសម្របសម្រួល។
លោកថ្លែងថា៖ «មជ្ឈមណ្ឌលនេះ គឺជាស្ពាន និងជាទីកន្លែងសម្រាប់ពាណិជ្ជករ វិនិយោគិន-ជប៉ុន និងសាធារណជនទូទៅមកទំនាក់ទំនងដោយផ្ទាល់ពិនិត្យផលិតផលសក្តានុពលកម្ពុជា ដែលមានតាំងបង្ហាញ សាកសួរព័ត៌មានច្បាប់បញ្ញត្តិ និងស្រាយចម្ងល់នានា ដើម្បីមានមូលដ្ឋានសម្រេចធ្វើពាណិជ្ជកម្មវិនិយោគរវាងកម្ពុជា-ជប៉ុន»។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជាឱ្យដឹងថា ពាណិជ្ជកម្មទ្វេភាគីរវាងកម្ពុជា និងជប៉ុនក្នុងរយៈពេល ៥ ខែដំបូង ឆ្នាំ ២០២២ មានទឹកប្រាក់សរុប ៧៧៨,៨៦ លានដុល្លារ កើនឡើង ១២,៣ ភាគរយ បើធៀបនឹងរយៈពេលដូចគ្នាឆ្នាំ ២០២១៕ LA
