ភ្នំពេញៈ ​ក្រុម​ការងារ​សមាគម​ភ័ស្តុភារកម្ម​កម្ពុជា​ (CLA) ធ្វើ​ដំណើរ​ទៅ​កាន់​ប្រទេស​ឡាវ ដើម្បី​ស្វែងយល់​ពី​សក្តានុពល​លើ​ការ​តភ្ជាប់​ផ្លូវ​ដែក​ពី​ទីក្រុង​គុន​មីង ប្រទេស​ចិន មក​​​ប្រទេស​ឡាវ​ ដោយ​​រំពឹង​ថា កម្ពុជា​អាច​មាន​ការ​តភ្ជាប់​ផ្លូវ​ដែក​នេះ​ដែរ ដើម្បី​ចំណេញ​ពេលវេលា​ក្នុង​ការ​ដឹក​ជញ្ជូន​។

នៅ​ក្នុង​ដំណើរ​ទស្សនកិច្ច​ចំនួន ៣ ​ថ្ងៃ ចាប់​ពី​ថ្ងៃទី​ ២១-២៣​ ខែ​មិថុនា​នេះ ក្រៅ​ពី​សមាជិក​របស់​សមាគម​ភ័ស្តុភារកម្ម​កម្ពុជា​ក៏​មាន​ប្រតិភូ​នៃ​វិស័យ​ឡូជីស្ទិក​របស់​ប្រទេស​វៀតណាម និង​ឡាវ​ ចូលរួម​ក្នុង​ដំណើរ​ទស្សនកិច្ច​ដែរ ដើម្បី​ប្រជុំ​ពិភាក្សា​ពី​គម្រោង​ការ​ភ្ជាប់​ផ្លូវ​ដែក​ពី​ចិន មក​កាន់​បណ្តា​ប្រទេស​ជាប់​តំបន់​ទន្លេ​មេគង្គ។

មុន​នឹង​ចាកចេញ​ទៅ​​​ប្រទេស​ឡាវ កាល​ពី​ថ្ងៃទី​ ២១ ខែ​មិថុនា លោក ស៊ិន ចន្ធី ប្រធាន​សមាគម​ភ័ស្តុភារកម្ម​កម្ពុជា​បាន​ឱ្យ​ដឹង​ថា ការ​ធ្វើ​ដំណើរ​ទៅ​កាន់​ប្រទេស​ឡាវ​នេះ គឺ​ក្នុង​​បំណង​ដើម្បី​ស្វែងរក​បទពិសោធ​ថ្មី និង​សិក្សា​ឱ្យ​កាន់​តែ​លម្អិត​ថែម​ទៀត​ពី​ការ​តភ្ជាប់​ឡូជីស្ទិក​ពី​ចិន ទៅ​កាន់​ឡាវ ដែល​ជា​ការ​តភ្ជាប់​ផ្នែក​ដឹក​ជញ្ជូន​ដ៏​មាន​សក្តានុពល​ក្នុង​ពេល​បច្ចុប្បន្ន​។​

លោក​បន្ត​ថា ក្រៅ​ពី​ទៅ​ទស្សនកិច្ច​នៅ​ស្ថានីយ​រថភ្លើង​ក្រុម​ប្រតិភូ​ក៏​​នឹង​ទៅ​តំបន់​ឡូជីស្ទិក​ (Logistic park) និង​តំបន់​ព្រំដែន​ដើម្បី​សិក្សា​លម្អិត​ពី​ប្រព័ន្ធ​នៃ​ការ​តភ្ជាប់​ឡូជីស្ទិក​ពី​ប្រទេស​ឡាវ​ ឆ្លង​កាត់​ថៃ​ចូល​មក​កម្ពុជា​។​ ម្យ៉ាង​​ទៀត ដោយ​សមាគម​សិក្សា​ឃើញ​ថា ការ​ដឹក​​ជញ្ជូន​តាម​រថភ្លើង​ពី​ចិន​មក​កម្ពុជា​មាន​លក្ខណៈ​ប្រសើរ​ជាង​តាម​ផ្លូវ​ទឹក​ដោយ​ចំណេញ​ពេល​​ពី​ ១០-១៥ ​ថ្ងៃ មក​ត្រឹមតែ​ ៤​ ទៅ​ ៥ ​ថ្ងៃ សម្រាប់​ការ​ដឹក​ជញ្ជូន​តាម​ផ្លូវ​ដែក។

លោក​​បាន​បញ្ជាក់​ថា​៖ ​«​ប្រតិភូ​ទាំង​ ៣ ​ប្រទេស​កម្ពុជា ឡាវ វៀតណាម ក៏​នឹង​ពិភាក្សា​គ្នា​ជុំវិញ​​គម្រោង​តភ្ជាប់​​ផ្លូវ​រថភ្លើង​ឆ្លង​កាត់​អាស៊ាន ដែល​គម្រោង​នេះ​មាន​សារៈសំខាន់​ណាស់ បើ​សិន​ជា​ការ​អនុវត្ត​ប្រព្រឹត្ត​ទៅ​ដោយ​រលូន​ វា​នឹង​សម្រួល​ដល់​ការ​ដឹក​ជញ្ជូន​បាន​ច្រើន​។​ កន្លង​ទៅ​ក្រសួង​សេដ្ឋកិច្ច និង​សមាគម​តែងតែ​ពិភាក្សា​គ្នា​ ដើម្បី​រិះរក​មធ្យោបាយ​ធ្វើ​យ៉ាង​ណា​ឱ្យ​ការ​ដឹកជញ្ជូន មាន​តម្លៃ​ទាប និង​ចំណេញ​ពេលវេលា ហើយ​អាច​ប្រកួត​ប្រជែង​ជាមួយ​​នឹង​ប្រទេស​ជិត​ខាង​យើង​បាន​»។

ជុំវិញ​ប្រព័ន្ធ​ដឹក​ជញ្ជូន​តាម​ផ្លូវ​ដែក​នេះ លោក គង់ វិមាន នាយក​ខុទ្ទកាល័យ និង​ជា​អ្នក​នាំពាក្យ​ក្រសួង​សាធារណការ និង​ដឹក​ជញ្ជូន បាន​ប្រាប់​​ ភ្នំពេញ ​ប៉ុស្តិ៍​ថា បច្ចុប្បន្ន​ក្រសួង​​កំពុង​សហការ​ជាមួយ​ក្រុមហ៊ុន​ចិន​មួយ​ក្នុង​ការ​សិក្សា​លើ​ទីតាំង​ផ្លូវ​ចាស់​ដែល​មាន​​ស្រាប់​​ពី​ភ្នំពេញ​ទៅ​ប៉ោយប៉ែត ដើម្បី​ភ្ជាប់​បន្ត​ទៅ​​​ប្រទេស​ថៃ និង​ការ​សិក្សា​តាម​ផ្លូវ​ជុំវិញ​បឹង​ទន្លេសាប​តាម​ការ​ណែនាំ​របស់​ថ្នាក់​ដឹកនាំ​ដោយ​មក​ទល់​​នឹង​ពេលនេះ​ក្រសួង​មិន​ទាន់​ទទួល​បាន​របាយការណ៍​លម្អិត​ពី​គម្រោង​សិក្សា​នេះ​នៅ​ឡើយ​ទេ​។​ ចំណែក​ការ​តភ្ជាប់​ទៅ​ខាង​ប្រទេស​ឡាវ មាន​ត្រឹម​នៅ​ក្នុង​ផែនការ​ប៉ុណ្ណោះ មិន​ទាន់​មាន​ដំណើរការ​ច្បាស់លាស់​នៅ​ឡើយ​ទេ។

លោក វ៉ាស៊ឹម សុរិយា អនុរដ្ឋលេខាធិការ​ក្រសួង​សាធារណការ ​និង​ដឹក​ជញ្ជូន​បាន​ប្រាប់​ថា គម្រោង​តភ្ជាប់​ផ្លូវ​ដែក​ពី​កម្ពុជា​ទៅ​ប្រទេស​ឡាវ និង​ឆ្ពោះ​ទៅ​​​ប្រទេស​ចិន​នេះ​ គឺ​មាន​នៅ​ក្នុង​ផែនការ​តែ​មិន​ទាន់​ដឹង​ថា​ អាច​អនុវត្ត​បាន​​​ពេល​ណា​នោះ​ទេ​៕​ LA