.jpg)
ពិធីសម្ពោធម៉ាកសមូហភាព «SKO» សម្រាប់អង្ករក្រអូប និងម៉ាកសមូហភាព «DSMK» អង្ករដំណើបកាលពីថ្ងៃម្សិលមិញ។ ហេង ជីវ័ន
ភ្នំពេញៈ ប្រទេសកម្ពុជា បានដាក់សម្ពោធជាផ្លូវការនូវម៉ាកសមូហភាពអង្ករក្រអូប SKO និងអង្ករដំណើប DSMK ក្នុងគោលបំណងបង្កើនទំនុកចិត្តដល់អ្នកនាំចេញ និងជំរុញកំណើនការនាំចេញអង្ករកម្ពុជាទៅកាន់ទីផ្សារពិភពលោក។
ក្នុងពិធីសម្ពោធម៉ាកសមូហភាពអង្ករក្រអូប SKO និងអង្ករដំណើប DSMK លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបាននិយាយថា ការរៀបចំឱ្យមានការចុះបញ្ជីម៉ាកសមូហភាពលើអង្ករទាំង ២ គឺបង្ហាញពីការរីកចម្រើនមួយផ្នែកទៀតនៃការអភិវឌ្ឍវិស័យស្រូវអង្ករកម្ពុជាចាប់តាំងពីការរៀបចំគ្រាប់ពូជស្រូវរហូតដល់ទីផ្សារ ខណៈពូជស្រូវសែនក្រអូបបាននិងកំពុងដើរតួនាទីយ៉ាងសំខាន់នៅក្នុងការនាំចេញ។
ក្រសួងពាណិជ្ជកម្មមិនត្រឹមតែគិតគូរទៅលើការនាំចេញតែ ១ ជ្រុងប៉ុណ្ណោះទេ តែក្រសួងក៏បានខិតខំជួយកសិករខ្នាតតូចឱ្យរៀបចំខ្លួនឱ្យបានកាន់តែប្រសើរឡើង ជាពិសេសការជួយជំរុញទីផ្សារសម្រាប់កសិករខ្នាតតូច រួមទាំងកិច្ចសន្យាកសិកម្មរវាងកសិករខ្នាតតូច, រោងម៉ាស៊ីនកិនស្រូវ តាមរយៈគម្រោង Aim និង IFAD។
លោកបញ្ជាក់ថា៖ «ទោះបីស្ថានភាពពិភពលោកកំពុងប្រឈមដោយសារជំងឺកូវីដ ១៩, សង្គ្រាមរវាងប្រទេសរុស្ស៊ី និងអ៊ុយក្រែនដែលនាំឱ្យជី ថ្នាំពុលកសិកម្ម និងឥន្ធនៈកើនឡើងក៏ពិតមែន តែខ្ញុំជឿថា ស្ថានភាពដ៏លំបាកនេះនឹងអាចដោះស្រាយបាន ហើយការនាំចេញអង្ករយើងនឹងកើនឡើងថែមទៀត ស្របជាមួយការងារដែលកំពុងធ្វើនេះគឺការកសាងទំនុកចិត្តជូនអ្នកប្រើប្រាស់តាមរយៈម៉ាកសមូហភាពអង្ករ SKO និង DSMK»។
លោក ងិន ឆាយ អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទបាននិយាយថា បច្ចុប្បន្ននេះពូជស្រូវសែន-ក្រអូប០១ បាននិងកំពុងសាយភាយនៅទូទាំងប្រទេសកម្ពុជា ដោយពូជស្រូវនេះផ្តល់នូវទិន្នផលខ្ពស់មានក្លិនក្រអូប គុណភាពអង្ករល្អ និងបាយទន់ឆ្ងាញ់ ពិសេសជាពូជដែលមានប្រភេទអង្ករមានតម្លៃល្អ និងមានតម្រូវការខ្ពស់នៅលើទីផ្សារអន្តរជាតិ។
លោកថ្លែងថា៖ «តាមរយៈកម្មវិធីអភិវឌ្ឍន៍ម៉ាកសមូហភាពនេះ ខ្ញុំសង្ឃឹម និងជឿជាក់មួយកម្រិតទៀតថា វានឹងជួយជំរុញឱ្យមានភាពកាន់តែច្បាស់លាស់សម្រាប់ទីផ្សារអង្ករនៅកម្ពុជា។ ប្រភេទពូជស្រូវសែនក្រអូប ០១ យើងមានម៉ាក SKO និងអង្ករដំណើបយើងមានម៉ាក DSMK។ ម៉ាកសមូហភាពនេះនឹងជួយតម្រង់ទិសដល់កសិករក្នុងការដាំដុះ ដែលឆ្លើយតបទៅនឹងតម្រូវការទីផ្សារសម្រាប់អ្នកនាំចេញ ជាពិសេសសហព័ន្ធស្រូវអង្ករកម្ពុជាយកទៅផ្សព្វផ្សាយ ដើម្បីទាក់ទាញអ្នកទិញនៅលើទីផ្សារអន្តរជាតិ។
ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា លោក ហ៊ុន ឡាក់ បានឱ្យដឹងថា ម៉ាកទាំង ២ នេះគឺត្រូវបានផ្តល់អាទិភាពខ្ពស់ និងផ្តល់ការអនុម័តជាម៉ាកសមូហភាពលឿនបំផុត មិនធ្លាប់មានក្នុងការចុះបញ្ជីនៅកម្ពុជា។
លោកបន្ថែមថា ការរៀបចំឱ្យមានម៉ាកសមូហភាពនៅពេលនេះ គឺជារឿងចាំបាច់បំផុតសម្រាប់ការកសាងទំនុកចិត្តដល់អតិថិជន និងការកសាងភាពច្បាស់លាស់មួយសម្រាប់ប្រជាកសិករផងដែរ ព្រោះបច្ចុប្បន្ន កសិករមួយចំនួនប្រឈមនឹងការលំបាកក្នុងការលក់ស្រូវរបស់ខ្លួន នៅពេលប្រមូលផលដោយសារការដាំដុះ មិនមានប្រភពព័ត៌មាននៃតម្រូវការទីផ្សារច្បាស់លាស់ ហើយអ្នកនាំចេញក៏មិនមានព័ត៌មានឱ្យជាក់លាក់ពីកសិករដែរ។
លោកអះអាងថា៖ «ការរៀបចំឱ្យមានម៉ាកអង្ករនេះឡើងនឹងផ្តល់ផលឱ្យយើងក្នុងរយៈពេលមធ្យម និងវែង ដែលតម្រូវឱ្យយើងធ្វើការកាន់តែច្រើនជាងមុន និងជួយកាត់បន្ថយនូវគម្លាតព័ត៌មាននៃតម្រូវការទីផ្សារ និងការផលិតរវាងអ្នកនាំចេញរោងម៉ាស៊ីន និងប្រជាកសិករ។ យើងសង្ឃឹម និងជឿថា តាមរយៈម៉ាកសមូហភាពថ្មីនេះនឹងជួយជំរុញការនាំចេញឱ្យកាន់តែច្រើនឡើងថែមទៀត»។
លោក សួន ឈឿន កសិករមកពីសហគមន៍កសិកម្មអភិវឌ្ឍន៍ស្រុកនៃស្រុកព្រៃឈរ ខេត្តកំពង់ចាមបានប្រាប់ភ្នំពេញប៉ុស្តិ៍ថា កន្លងមកសហគមន៍របស់លោកបានដាំដុះប្រភេទពូជស្រូវ សែនក្រអូប ០១ នេះដែរ ប៉ុន្តែដោយមិនទាន់បានចុះបញ្ជី និងមិនមានពូជស្រូវសុទ្ធច្បាស់លាស់។
លោកបាននិយាយថា៖ «បន្ទាប់ពីពូជស្រូវប្រភេទសែនក្រអូប ០១ ដែលផលិតបានអង្ករ SKO បានចុះបញ្ជីម៉ាកសមូហភាពរួចហើយនោះ ពេលត្រឡប់ទៅវិញ ខ្ញុំនឹងជំរុញក្រុមកសិករឱ្យងាកមកដាំពូជនេះវិញ ដែលជាប្រភេទពូជល្អ និងមានការទទួលស្គាល់ជាអន្តរជាតិ»។
របាយការណ៍ពីសហព័ន្ធស្រូវអង្ករ-កម្ពុជាបង្ហាញថា ត្រឹមសប្តាហ៍ទី ៣ ខែមិថុនា ឆ្នាំ ២០២២ កម្ពុជាបាននាំចេញអង្ករគ្រប់ប្រភេទទៅទីផ្សារអន្តរជាតិ តាមរយៈក្រុមហ៊ុនចំនួន ៥៣ ក្នុងបរិមាណ ៣១ ម៉ឺនតោន កើន ២១,៧៣ ភាគរយបើធៀបនឹងរយៈពេលដូចគ្នាឆ្នាំ ២០២១។ ក្នុងបរិមាណនាំចេញនេះគិតជាទឹកប្រាក់ជាង ១៩១ លានដុល្លារ។
ក្នុងនោះ អង្ករក្រអូបប្រណីតចំនួន ៤១,៦២ ភាគរយ អង្ករសែនក្រអូប ២២,៤២ ភាគរយ អង្ករស ៣៣,១២ ភាគរយ អង្ករចំហុយ ១,៤២ ភាគរយ និងអង្ករសរីរាង្គ ១,៤២ ភាគរយ។ ការព្យាកររបស់សហព័ន្ធ ការនាំចេញអង្ករឆ្នាំ ២០២២ អាចនឹងមានក្នុងរង្វង់ ៧០ ទៅ ៧៥ ម៉ឺនតោន ដែលកើនជាង ១០ ម៉ឺនតោនធៀបនឹងរយៈពេលដូចគ្នាក្នុងឆ្នាំ ២០២១៕ LA
