.jpg)
ស្នាក់ការកណ្ដាលធនាគារអេស៊ីលីដា តាមបណ្ដោយផ្លូវព្រះមុន្នីវង្ស។ ហុង មិនា
ភ្នំពេញៈ អេស៊ីលីដា ភីអិលស៊ី ដែលជាធនាគារពាណិជ្ជក្នុងស្រុកបានប្រកាសពីការសហការជាមួយ វ៉េសស្ទឺន យូញៀន (WU) ដែលជាក្រុមហ៊ុនផ្ទេរប្រាក់ឆ្លងប្រទេសលំដាប់ពិភពលោក ដើម្បីដាក់ឱ្យដំណើរការសេវាផ្ទេរប្រាក់ឆ្លងប្រទេសតាមរយៈ អេស៊ីលីដា ម៉ូបាល ទៅកាន់បណ្តាញប្រតិបត្តិការជាង ២០០ ប្រទេសលើពិភពលោក។
កិច្ចព្រមព្រៀងភាពជាដៃគូនេះ ត្រូវបានធ្វើឡើងកាលពីថ្ងៃទី ២២ ខែមិថុនា ដោយអតិថិជនដែលប្រើប្រាស់អេស៊ីលីដាម៉ូបាល អាចធ្វើប្រតិបត្តិការផ្ទេរប្រាក់ដល់ក្រុមគ្រួសារនៅក្រៅប្រទេសបានគ្រប់ពេលវេលា។
លោក អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានឱ្យដឹងថា កិច្ចសហប្រតិបត្តិការរវាងធនាគារ អេស៊ីលីដា និងក្រុមហ៊ុន WU ផ្តល់នូវមធ្យោបាយយ៉ាងឆាប់រហ័ស មានភាពងាយស្រួល ប្រកបដោយទំនុកចិត្តក្នុងការផ្ទេរប្រាក់ទៅក្រៅប្រទេសតាមរយៈអេស៊ីលីដាម៉ូបាល។
លោកបន្ថែមថា៖ «កិច្ចសហប្រតិបត្តិការនេះ គឺមានសារៈសំខាន់ ដោយផ្សារភា្ជប់អតិថិជនទៅនឹងឱកាស ដើម្បីផ្តល់ដំណោះស្រាយក្នុងការចាត់ចែងសាច់ប្រាក់របស់ពួកគាត់តាមមធ្យោបាយដែលអតិថិជនមានតម្រូវការប្រើប្រាស់»។
លោក Jeffrey Navarro ប្រធានប្រចាំប្រទេសហ្វីលីពីន ម៉ាឡេស៊ី ប្រ៊ុយណេ និងឥណ្ឌូចិន របស់ WU បានឱ្យដឹងថា តាមរយៈកិច្ចសហប្រតិបត្តិការនេះ ក្រុមហ៊ុន WU នឹងបន្តបង្កើនសមត្ថភាពឌីជីថលដើម្បីទទួលបានអតិថិជនកាន់តែច្រើន និងធ្វើឱ្យពួកគាត់ភ្ជាប់ទំនាក់ទំនងទៅសេដ្ឋកិច្ចឌីជីថល៕ LA
