.jpg)
កម្មករលើកត្រីទីឡាព្យ៉ា ចេញពីក្នុងស្រះចិញ្ចឹម។ ហេង ជីវ័ន
ភ្នំពេញៈ គម្រោងនាំចេញត្រីទីឡាព្យ៉ា ពីកម្ពុជាទៅប្រទេសជប៉ុន នឹងត្រូវពន្យារពេលដល់ចុងខែកក្កដា ឆ្នាំ ២០២២ ដោយសារភាគីអ្នកទាំងសងខាងត្រូវបញ្ចប់នូវលក្ខខណ្ឌតម្រូវមួយចំនួនជាមុនសិន។ នេះបើតាមអ្នកគ្រប់គ្រងកសិដ្ឋាន Cambodia Fresh Farm ដែលជាក្រុមហ៊ុននាំចេញ។
នាយកប្រតិបត្តិនៃក្រុមហ៊ុន រ៉េនបូ អ៊ីនធើប្រាយ និងជាអ្នកគ្រប់គ្រងកសិដ្ឋាន Cambodia Fresh Farm លោក ចាវ សួស្តី បានប្រាប់ ភ្នំពេញ ប៉ុស្តិ៍ថា ផែនការនាំចេញត្រីទីឡាព្យ៉ាទៅកាន់ប្រទេសជប៉ុន នៅដើមឆ្នាំ ២០២២ នឹងត្រូវពន្យារពេលបន្តរហូតដល់ចុងខែកក្កដាវិញ ហើយការនាំចេញនោះទៀតសោត គឺមិនមែនជាត្រីស្រស់ដែលបង្កករួចទេ គឺក្រុមហ៊ុននឹងនាំចេញជាប្រភេទត្រីកែច្នៃរួចដូចជា ត្រីងៀត ត្រីឆ្អើរ អាម៉ុក ឬធ្វើជាត្រីខវិញ។
មូលហេតុដែលក្រុមហ៊ុនមិនអាចនាំចេញជាប្រភេទសាច់ត្រីស្រស់បានត្រូវបានលោក សួស្តី បញ្ជាក់ថា បច្ចុប្បន្នការនាំចេញប្រភេទទំនិញបង្កកជួបការលំបាក ព្រោះកង្វះទូត្រជាក់ដែលនាំឱ្យតម្លៃការដឹកជញ្ជូនខ្ពស់។
លោកបន្តថា ការដឹកជញ្ជូនដោយប្រើប្រាស់ទូត្រជាក់ត្រូវការចំណាយច្រើន ដោយការចំណាយនេះមិនអាចទូទាត់ប្រាក់ចំណេញដែលទទួលបាននោះទេ។ ដូចនេះក្នុងករណីកែច្នៃត្រីទាំងនេះទៅជាអាហារដែលមិនត្រូវការទូបង្កក នឹងកាត់បន្ថយការចំណាយបានច្រើន។
លោកបានប្រាប់ថា៖ «ការច្នៃត្រីទីឡាព្យ៉ា ទៅជាត្រីងៀត ត្រីឆ្អើរ អាម៉ុក ជាដើមនោះ គឺយើងនឹងធ្វើឡើងតាមរបៀបជប៉ុន។ យើងបានសាកល្បងច្នៃធ្វើជាអាម៉ុករួចហើយ គឺអាចទទួលយកបានចំពោះរសជាតិ និងគុណភាព។ បច្ចុប្បន្នយើងកំពុងតែស្រាវជ្រាវពីរបៀបធ្វើជាត្រីខបែបជប៉ុនទៀត ដើម្បីនាំចេញ។ បើយើងច្នៃរបៀបនេះបាន យើងមិនចាំបាច់ចំណាយថ្លៃទូបង្កកនោះទេ គឺយើងអាចប្រើទូកុងតឺន័រធម្មតាបាន»។
លោកបន្ថែមថា នៅខែកក្កដា អ្នកបញ្ជាទិញនៅជប៉ុន ដែលរួមមានសមាគមខ្មែរនៅជប៉ុន រួមទាំងហាង និងផ្សារនានានៅប្រទេសជប៉ុន នឹងផ្តល់ព័ត៌មានលម្អិតពីបរិមាណដែលពួកគេត្រូវការ។ សម្រាប់គម្រោងនាំចេញត្រីបង្កក អាចនឹងធ្វើឡើងនៅដំណាក់កាលបន្ទាប់ ក្រោយពីការនាំចេញត្រីកែច្នៃទទួលបានជោគជ័យ។
លោក ហាវ វិសិដ្ឋ អនុប្រធានរដ្ឋបាលជលផលបានឱ្យដឹងដែរថា រដ្ឋបាលជលផលបានជួយជ្រោមជ្រែងច្រើនដល់កសិដ្ឋាន Cambodia Fresh Farm ទាំងបច្ចេកទេស និងការប្រឹក្សាយោបល់ផ្នែកទីផ្សារ ដើម្បីធ្វើយ៉ាងណាឱ្យកសិដ្ឋាននេះ អាចនាំចេញត្រីទីឡាព្យ៉ាទៅកាន់ទីផ្សារប្រទេសជប៉ុន។
លោកបន្តថា កសិដ្ឋាននេះ មានលក្ខណសម្បត្តិគ្រប់គ្រាន់ហើយ ទាំងហេដ្ឋារចនាសម្ព័ន្ធ និងបច្ចេកទេស ដោយកសិដ្ឋានបានប្រើប្រាស់ឧបករណ៍កែច្នៃទំនើបនៅក្នុងដំណើរការចង្វាក់ផលិតកម្មរបស់ខ្លួន ដែលអាចឱ្យអ្នកបញ្ជាទិញមានទំនុកចិត្តក្នុងការបរិភោគ។
ទោះយ៉ាងណាលោកប្រាប់ថា ត្រីទីឡាព្យ៉ា ជាប្រភេទត្រីមានសក្តានុពលខ្លាំងនៅលើពិភពលោកមិនត្រឹមតែទីផ្សារជប៉ុននោះទេ ដោយត្រីប្រភេទនេះត្រូវគេប្រសិទ្ធនាមថា មាន់ក្នុងទឹក ដោយសារតែជាត្រីដែលគេចូលចិត្តបរិភោគជាប្រចាំ ដូចសាច់មាន់ដែរ។
លោកថ្លែងថា៖ «ទីឡាព្យ៉ា ជាត្រីដែលមានទីផ្សារធំនៅលើពិភពលោក។ បើយើងក្រឡេកមើលប្រទេសសមាជិកអាស៊ានដូចជា វៀតណាម ម៉ាឡេស៊ី និងថៃជាដើម បាននាំចេញត្រីទីឡាព្យ៉ាច្រើនដែរ។ យើងរំពឹងថា នៅពេលកសិដ្ឋាន Cambodia Fresh Farm នាំចេញត្រីនេះទៅជប៉ុនបានជោគជ័យហើយ យើងនឹងជំរុញឱ្យគាត់ប្រមូលទិញត្រីទីឡាព្យ៉ានេះ ពីកសិករផងដែរ ខណៈបច្ចុប្បន្នការចិញ្ចឹមត្រីនេះកំពុងមានការកើនឡើងជាលំដាប់»។
របាយការណ៍ពីក្រសួងកសិកម្ម បានបង្ហាញថា ឆ្នាំ ២០២១ ផលវារីវប្បកម្មសម្រេចបានប្រមាណ ៣៤៨ ពាន់តោន ថយចុះ ៥២ ពាន់តោន បើធៀបទៅនឹងឆ្នាំ ២០២០៕ LA
