The Phnom Penh Post Search

Search form




Logo of Phnom Penh Post newspaper Phnom Penh Post - គម្រោង​សាងសង់​កំណាត់​ផ្លូវ​ជាតិ​លេខ ៥ សម្រេច​បាន ៨០%

គម្រោង​សាងសង់​កំណាត់​ផ្លូវ​ជាតិ​លេខ ៥ សម្រេច​បាន ៨០%

Content image - Phnom Penh Post

គម្រោង​សាងសង់​កំណាត់​ផ្លូវ​ជាតិ​លេខ ៥ សម្រេច​បាន ៨០%

ពោធិ៍សាត់៖ កំណាត់​ផ្លូវ​ជាតិ​លេខ ៥ ភាគខាងត្បូង (ព្រែកក្តាម-ធ្លាម្អម) គិត​រហូត​មក​ទល់​ពេល​នេះ​សម្រេច​បាន ៨០% ហើយ គ្រោង​នឹង​បញ្ចប់​នៅ​ចុង​ឆ្នាំ ២០២៣។

កាល​ពី​ថ្ងៃទី ២៣ ខែ មិថុនា ឆ្នាំ ២០២២ លោក ស៊ុន ចាន់ថុល រដ្ឋមន្ត្រី​ក្រសួង​សាធារណការ និង​ដឹក​ជញ្ជូន ចុះ​ពិនិត្យ​វឌ្ឍនភាព​ការងារ​សាងសង់​គម្រោង​ធ្វើ​ឱ្យ​ប្រសើរ​ឡើង​វិញ​កំណាត់​ផ្លូវ​ជាតិ​លេខ ៥ ភាគ​ខាងត្បូង (ព្រែកក្តាម-ធ្លាម្អម) ដោយ​មាន​ការ​ចូលរួម​ពី​ថ្នាក់​ដឹកនាំ​ក្រសួង អាជ្ញាធរដែនដី តំណាង​ក្រុមហ៊ុន​សាងសង់ តំណាង​ក្រុមហ៊ុន​ទីប្រឹក្សា​បច្ចេកទេស​មន្ត្រី​ជំនាញ និង​ភាគី​ពាក់ព័ន្ធ​ផង​ដែរ។

គម្រោង​ធ្វើ​ឱ្យ​ប្រសើរ​ឡើង​វិញ​កំណាត់​ផ្លូវ​ជាតិ​លេខ ៥ ភាគ​ខាង​ត្បូង​នេះ បាន​បើក​ការដ្ឋាន​សាងសង់​នៅ​ថ្ងៃទី ២១ ខែ​ ឧសភា ឆ្នាំ ២០១៨ គ្រោង​ចំណាយ​ពេល​សាងសង់​ចំនួន ៤៨ ខែ និង​ត្រួត​ពិនិត្យ​បច្ចេកទេស​ដោយ​ក្រុមហ៊ុន​ទីប្រឹក្សា​បច្ចេកទេស Katahira & Engineer International Joint Venture with Oriental Consultant Global គិត​រហូត​មក​ទល់​ពេល​នេះ​សម្រេច​បាន ៨០% ហើយ និង​គ្រោង​បញ្ចប់​នៅ​ចុង​ឆ្នាំ ២០២៣។

គម្រោង​នេះ មាន​ប្រវែង​សរុប​ចំនួន ៣៦៦ គីឡូម៉ែត្រ ស្ថិត​ក្នុង​ខេត្ត​កំពង់ឆ្នាំង ពោធិ៍សាត់ បាត់ដំបង និង​បន្ទាយមានជ័យ ជា​គម្រោង​ក្រោម​កម្ចី​ឥណទាន សម្បទាន​ពី​រដ្ឋាភិបាល​ជប៉ុន តាមរយៈ​ទីភ្នាក់ងារ​សហប្រតិបត្តិការ​អន្តរជាតិ​ជប៉ុន​ប្រចាំ​កម្ពុជា គ្រោង​ចំណាយ​ថវិកា​ប្រមាណ ៥០០ លាន​ដុល្លារ​សហរដ្ឋអាមេរិក ការងារ​ស្ថាបនា​ត្រូវ​បាន​បែងចែក​ជា​ ៣ ផ្នែក ធំៗ​រួមមាន៖ ភាគ​ខាង​ជើង ភាគ​ខាង​ត្បូង និង​ភាគ​កណ្តាល ដោយ​ក្នុង​នោះ៖ មាន​ការ​ពង្រីក​កំណាត់​ផ្លូវ​ជាតិ​មាន​ស្រាប់​ពី ២ គន្លង ទៅ ៤ គន្លង ទទឹង ២៣ ម៉ែត្រ មាន​ប្រវែង​សរុប ៣០៤ គីឡូម៉ែត្រ ក្រាល​ជំនួស​ដោយ​បេតុងកៅស៊ូ (AC) និង​មាន​សួរ​ច្បារ​កណ្តាល។

គម្រោង​នេះ មាន​ការ​សាងសង់​ផ្លូវ​វាង​ក្រុង​សរុប​មាន​ចំនួន ៥ ខ្សែ មាន​ប្រវែង​សរុប ៦២ គីឡូម៉ែត្រ មាន ៤ គន្លង ទទឹង ២៣ ម៉ែត្រ និង​សួរ​ច្បារ​កណ្តាល មាន​ការ​ពង្រីក​ស្ពាន​ចាស់ និង​សាងសង់​ស្ពាន​ថ្មី ដែល​ស្ថិត​នៅ​ក្នុង​កំណាត់​ផ្លូវ​ជាតិ​លេខ ៥ មាន​ចំនួន​សរុប ៨០ កន្លែង។ ដោយ​ឡែក​គម្រោង​ធ្វើ​ឱ្យ​ប្រសើរ​ឡើង​វិញ​កំណាត់​ផ្លូវជាតិ​លេខ ៥ ភាគ​ខាង​ត្បូង​នេះ មាន​ប្រវែង ១៣៥,២៥ គីឡូម៉ែត្រ ត្រូវ​បាន​បែងចែក​ជា​ ៣ កញ្ចប់​ការងារ ចាប់​ផ្តើម​សាងសង់​ចេញ​ពី​ចាប់​ពី​ព្រែកក្តាម (ខេត្ត​កណ្តាល) ដល់​ធ្លាម្អម (ខេត្ត​ពោធិ៍សាត់) គ្រោង​ចំណាយ​ថវិកា​ប្រមាណ ២៤៦,៣៥ លាន​ដុល្លារ​អាមេរិក។

លោក​រដ្ឋមន្រ្តី​ក៏​បាន​អំពាវនាវ​សូម​សុំ​ឱ្យ​បងប្អូន​ប្រជាពលរដ្ឋ​ដែល​រស់នៅ​តាម​ដង​ផ្លូវ​សុំ​កុំ​លើក​ដី​ផ្ទះ​ខ្ពស់​ជាង​ផ្លូវ​ ធ្វើ​ឱ្យ​ទឹក​ហូរ​លើ​ផ្លូវ នាំ​ឱ្យ​ផ្លូវ​ឆាប់ខូច កុំ​យក​ផ្លូវ​ធ្វើ​ជា​កន្លែង​ទីផ្សារ កន្លែង​លក់​ដូរ បង្ក​ឱ្យ​មាន​ការ​កកស្ទះ និង​គ្រោះ​ថ្នាក់​ចរាចរណ៍ និង​មិន​ត្រូវ​ដឹក​ទំនិញ​លើស​ទម្ងន់​កម្រិត​កំណត់​ដោយ​ច្បាប់​ជា​ដើម៕

អត្ថបទគួរចាប់អារម្មណ៍