The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​នឹង​មាន​ការ​ហោះហើរ​ត្រង់​ពី​ឥណ្ឌូនេស៊ី​ឆាប់ៗ​នេះ

កម្ពុជា​នឹង​មាន​ការ​ហោះហើរ​ត្រង់​ពី​ឥណ្ឌូនេស៊ី​ឆាប់ៗ​នេះ

Content image - Phnom Penh Post

កម្ពុជា​នឹង​មាន​ការ​ហោះហើរ​ត្រង់​ពី​ឥណ្ឌូនេស៊ី​ឆាប់ៗ​នេះ

ឥណ្ឌូនេស៊ី៖ ឥណ្ឌូនេស៊ី និង​កម្ពុជា នឹង​ជំរុញ​ការ​ហោះហើរ​ត្រង់​ឡើង​វិញ​រវាង​កម្ពុជា-ឥណ្ឌូនេស៊ី នាពេល​ដ៏​ខ្លី​ខាង​មុខ​នេះ ក្រោយ​ពី​កម្មវិធី​ផ្សព្វផ្សាយ​ដំណើរ​ទេសចរណ៍​កម្ពុជា “Cambodian Tourism Roadshow”។

កាល​ពី​រសៀល​ថ្ងៃទី ២២ ខែ មិថុនា ឆ្នាំ ២០២២ លោក កាទើ មហាំម៉ាត់ណោស្រ៊ី អនុរដ្ឋលេខាធិការ​នៃក្រ​សួងទេសចរណ៍ បាន​ដឹកនាំ​ប្រតិភូ​ចំនួន ៤ រូប រៀបចំ​កម្មវិធី​ផ្សព្វផ្សាយ​ដំណើរ​ទេសចរណ៍​កម្ពុជា ក្រោម​យុទ្ធនាការ​ទស្សនា​កម្ពុជា​បន្ទាប់ ដែល​ជា​គោលដៅ​ទេសចរណ៍​ប្រកប​ដោយ​ភាព​កក់ក្តៅ សុវត្ថិភាព ស្អាត និង​បៃតង “Cambodian Tourism Roadshow – Visit Cambodia NEXT as a Safe, Warm, Clean and Green Tourism Destination” នៅ​ទីក្រុង​មេដាន ប្រទេស​ឥណ្ឌូនេស៊ី ដោយ​មាន​ការ​អញ្ជើញ​ចូលរួម​ធ្វើ​បទបង្ហាញ​របស់​វាគ្មិន​សំខាន់ៗ​ដោយ​ផ្ទាល់ (physical) និង​តាម​ប្រព័ន្ធវីដេអូ (ZOOM) រួមមាន លោក SATVINDER SINGH អគ្គលេខាធិការ​រង​នៃ​លេខាធិការដ្ឋាន​អាស៊ាន, លោកស្រី Laila Lubis តំណាង​មក​ពី​ការិយាល័យ​ផ្សព្វផ្សាយ​ទេសចរណ៍​នៃ​ខេត្ត​ស៊ូម៉ាត្រា​ភាគ​ខាង​ជើង, ព្រម​ទាំង​តំណាង​មក​ពី​ក្រុម​ប្រឹក្សា​អភិវឌ្ឍន៍​កម្ពុជា រដ្ឋលេខាធិការដ្ឋាន​អាកាសចរ​ស៊ីវិល ក្រសួង​ពាណិជ្ជកម្ម សមាគមន៍​ទេសចរណ៍ CATA, PATA Cambodia, CTF, និង CHA។

ក្រៅ​ពី​នេះ ក៏​មាន​ផ្នែក​ឯកជន​នៅ​កម្ពុជា​ដែល​អញ្ជើញ​ចូលរួម​ក្នុង​កម្មវិធី​នេះ​រួមមាន តំណាង​ក្រុមហ៊ុន Mean Tour (Cambodia) Trading & Tour Co., Ltd. និង​តំណាង​ក្រុមហ៊ុន Satguru Travel and Tour Co., Ltd. ដោយ​មាន​អ្នក​ចូលរួម​មក​ពី​សមាគមន៍​ទេសចរណ៍​ឥណ្ឌូនេស៊ី​ចំនួន ១២០ នាក់ និង​សារព័ត៌មាន​ល្បីៗ​ចំនួន ៦ ស្ថាប័ន។

លោក កាទើ មហាំម៉ាត់ ណោសស្រ៊ី បាន​មាន​ប្រសាសន៍​ថា កម្មវិធី​ផ្សព្វផ្សាយ​ដំណើរ​ទេសចរណ៍​កម្ពុជា “Cambodian Tourism Roadshow” ក្រោម​យុទ្ធនាការ ទស្សនា​កម្ពុជា​បន្ទាប់ ដែល​ជា​គោលដៅ​ទេសចរណ៍​ប្រកប​ដោយ​ភាព​កក់ក្តៅ សុវត្ថិភាព ស្អាត និង​បៃតង “Cambodia Tourism Roadshow – Visit Cambodia NEXT as a Safe, Warm, Clean and Green Tourism Destination” សំដៅ​ផ្សព្វផ្សាយ​អំពី​សក្តានុពល វិស័យ​ទេសចរណ៍​កម្ពុជា ពង្រឹង​ទំនាក់ទំនង និង​កិច្ច​សហការ​ល្អ​រវាង ផ្នែក​ឯកជន កម្ពុជា-ឥណ្ឌូនេស៊ី ឱ្យ​បង្កើន​ការ​លក់​កញ្ចប់​ទស្សនកិច្ច​ទេសចរណ៍​កម្ពុជា​លើ​ទីផ្សារ​ឥណ្ឌូនេស៊ី។

លោក​បាន​បញ្ជាក់​ថា៖ «ការ​លក់​កញ្ចប់​ទស្សនកិច្ច​ទេសចរណ៍​កម្ពុជា​លើ​ទីផ្សារ​ឥណ្ឌូនេស៊ី ត្រូវ​មាន​ការ​ផ្សព្វផ្សាយ​អំពី​ការ​បើក​ដំណើរការ​សេវាទិដ្ឋាការ​ពេល​មក​ដល់ (Visa On Arrival) សម្រាប់​អ្នក​ដំណើរ​ពី​បរទេស​ចូល​មក​កម្ពុជា​តាម​ផ្លូវ​អាកាស ផ្លូវ​គោក និង​ផ្លូវ​ទឹក ការ​លើកលែង​លិខិត PCR Test អវិជ្ជមាន ៧២ ម៉ោង​មុន​ធ្វើ​ដំណើរ ការ​លើកលែង​ធ្វើ​តេស្ត​រហ័ស​ពេល​មក​ដល់ និង​ការ​លើកលែង​កាតព្វកិច្ច​ពាក់​ម៉ាស់ នៅ​តាម​ទី​សាធារណៈ​ទូទាំង​ប្រទេស ព្រម​ទាំង​ជំរុញ​ការ​ផ្សព្វផ្សាយ​ព្រឹត្តិការណ៍​ស៊ីហ្គេម​ ឆ្នាំ ២០២៣ (SEA Games 2023) អាស៊ាន​ប៉ារ៉ាហ្គេម (ASEAN Para Games) និង​ព្រឹត្តិការណ៍​កីឡា​យុវជន​អាស៊ី​ឆ្នាំ ២០២៩ (Asian Youth Games 2029) ដែល​កម្ពុជា​នឹង​ធ្វើ​ជាម្ចាស់​ផ្ទះ»។

បើ​តាម​ក្រសួងទេសចរណ៍ កម្មវិធី​ផ្សព្វផ្សាយ​នេះ ទទួល​បាន​ការ​ស្វាគមន៍​យ៉ាង​កក់ក្តៅ​ពី​រដ្ឋបាល​ខេត្ត​ស៊ូម៉ាត្រា​ភាគ​ខាង​ជើង (North Sumatera) និង​បណ្តា​ក្រុមហ៊ុន​ទីភ្នាក់ងារ​ទេសចរណ៍​នៃ​ប្រទេស​ឥណ្ឌូនេស៊ី ហើយ​ភ្នាក់ងារ​ទេសចរណ៍​ឥណ្ឌូនេស៊ី និង​កិច្ច​សហការ​ពី​ក្រុមហ៊ុន Singapore Airlines ក្នុង​ការ​ជំរុញ​ការ​ហោះហើរ​ត្រង់​ឡើង​វិញ​រវាង​កម្ពុជា-ឥណ្ឌូនេស៊ី នាពេល​ដ៏​ខ្លី​ខាង​មុខ​នេះ។ តាមរយៈ​កម្មវិធី​នេះ ក្រសួង​ទេសចរណ៍​រំពឹង​ថា កម្ពុជា​នឹង​អាច​ទាក់ទាញ​ភ្ញៀវ​ទេសចរ និង​វិនិយោគិន​ឥណ្ឌូនេស៊ី​ឱ្យ​មក​ទស្សនា “កម្ពុជា-ព្រះរាជាណាចក្រអច្ឆរិយៈ សុវត្ថិភាព និង​ភាព​កក់ក្តៅ” កាន់​តែ​ច្រើន​ឡើង​នៅ​ឆ្នាំ ២០២២-២០២៣ ដែល​ជា​ដំណាក់កាល​ស្តារ​ឡើង​វិញ​នៃ​វិស័យ​ទេសចរណ៍៕

អត្ថបទគួរចាប់អារម្មណ៍