The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​កំពុង​សិក្សា​នីតិវិធី ដើម្បី​សម្រួល​ដល់​ប្រតិបត្តិករ​ទេសចរណ៍​ងាយ​ទទួល​បាន​កម្ចី

ក្រសួង​កំពុង​សិក្សា​នីតិវិធី ដើម្បី​សម្រួល​ដល់​ប្រតិបត្តិករ​ទេសចរណ៍​ងាយ​ទទួល​បាន​កម្ចី

Content image - Phnom Penh Post

ក្រសួង​កំពុង​សិក្សា​នីតិវិធី ដើម្បី​សម្រួល​ដល់​ប្រតិបត្តិករ​ទេសចរណ៍​ងាយ​ទទួល​បាន​កម្ចី

ភ្នំពេញ៖ ក្រសួង​ទេសចរណ៍ កំពុង​ជំរុញការ​ដោះស្រាយ​បញ្ហា​ស្វែងរក​ទ្រព្យ​បញ្ចាំ​ធានា​កម្ចី​ក្នុង​គម្រោង​សហហិរញ្ញប្បទាន​ស្តារ និង​ជំរុញកំណើន​ទេសចរណ៍ ដើម្បី​ជួយ​ដល់​ម្ចាស់​អាជីវកម្ម​ទេសចរណ៍​នៅ​តាម​បណ្តា​ខេត្ត​ទេសចរណ៍​សំខាន់ៗ ទទួល​បាន​ឥណទាន​ងាយស្រួល និងទាន់​ពេល​វេលា។

កាលពី​ថ្ងៃទី២៤ ខែមិថុនា ឆ្នាំ២០២២ លោក សុង តុងហាប់ រដ្ឋលេខាធិការ និង​ជា​ប្រធាន អនុក្រុម​ការងារ​គាំពា​សហគ្រាស​និង​ការងារក្នុង​វិស័យ​ទេសចរណ៍ បាន​អញ្ជើញ​ជា​អធិបតី​ក្នុង​កម្មវិធី​ផ្សព្វផ្សាយ​ពី “នីតិវិធី និង​លក្ខខណ្ឌ​ដើម្បី​ទទួល​បាន​លិខិត​បញ្ជាក់​ទ្រព្យ​បញ្ចាំ​ពី​សាជីវកម្ម​ធានា​ឥណទាន​កម្ពុជា” ដែល​ជា​យន្តការ​បន្ថែម​ក្នុង​ការ​គាំទ្រ​គម្រោង​សហហិរញ្ញប្បទាន​ស្តារ និង​ជំរុញ​កំណើន​ទេសចរណ៍​ដែល​ត្រូវ​បានរាជរដ្ឋាភិបាល​ដាក់​ឱ្យ​អនុវត្ត​ កាល​ពី​ថ្ងៃទី​១៧ ខែ​ឧសភា ឆ្នាំ​២០២២ កន្លងមក។

លោក​រដ្ឋលេខាធិការ បាន​មាន​ប្រសាសន៍​ថា កម្មវិធី​ធានា​ឥណទាន (Credit Guaranteed Scheme)បាន​ដាក់​ឱ្យ​ដំណើរការ​ ចាប់​ពី​ថ្ងៃ​ទី២២ ខែ​កញ្ញា ឆ្នាំ​២០២១ តាម​រយៈសាជីវកម្ម​ធានា​ឥណទាន​កម្ពុជា (Credit Guarantee Corporation of Cambodia-CGCC) ដើម្បី​ផ្តល់​ការ​ធានា​ឥណទាន​លើ​កម្ចី​ដែល​ផ្តល់​ឱ្យ​អាជីវកម្ម ដើម្បី​ចែក​រំលែក​ហានិភ័យ​ជាមួយ​ស្ថាប័ន​កម្ចី​និង​បង្កើនប​រិយាបន្ន​ហិរញ្ញវត្ថុ ដោយទទួល​បាន​ដើម​ទុន​ដំបូង សមមូល​នឹង​ទឹក​ប្រាក់ ២០០ លាន​ដុល្លារ​អាមេរិក​ពី​រាជរដ្ឋាភិបាល។

លោក​បាន​បញ្ជាក់​ថា៖ «កម្មវិធី​ធានាឥណទាន​នេះ​នឹង​ជួយ​សម្រួល​ដល់​អាជីវកម្ម​ទេសចរណ៍​ដែល​មាន​តម្រូវការ​ឥណទាន​ពី​គ្រឹះស្ថាន​ហិរញ្ញវត្ថុ​ចូលរួម​ហើយ​មាន​កង្វះខាត​ទ្រព្យ​បញ្ជាំ ក្នុង​នោះ​ម្ចាស់​អាជីវកម្ម​ទេសចរណ៍​អាច​ស្នើសុំ​កម្ចី​ឥណទាន​ពី​គ្រឹះស្ថាន​ហិរញ្ញ​វត្ថុ​ចូលរួម ក្នុង​ទំហំទឹកប្រាក់​អតិបរមា​រហូត​ដល់ ៤០០ ០០០​ដុល្លារ​អាមេរិក ក្នុង​អត្រា​ការប្រាក់​សម្បទាន ប្រចាំ​ឆ្នាំ ៦,៥% ដោយ​មាន​ឬ​គ្មាន​ទ្រព្យ​បញ្ចាំ​ដើម្បីធានា​កម្ចី​បាន»។

លោក តុងហាប់ បាន​បន្ត​ថា គម្រោង​សហហិរញ្ញប្បទាន​របស់​រាជរដ្ឋាភិបាល គួបផ្សំ​កម្មវិធី ធានា​ឥណទាន​នេះ​នឹង​ក្លាយ​ជា​ឧបករណ៍​ហិរញ្ញវត្ថុ​មួយ​យ៉ាង​សំខាន់​ក្នុង​ការ​ជំរុញ​កតាលីករ​នៃ​វិស័យ​ទេសចរណ៍ ឱ្យ​ងើបទ្បើង​វិញ​ឆាប់​រហ័ស​ឱ្យ​ស្រប​តាម​ការ​រំពឹង​របស់​ក្រសួង​ទេសចរណ៍​ថា កម្ពុជា​នឹង​ទទួល​បាន​ទេសចរ អន្តរជាតិ ៧​លាន​នាក់​នៅ​ឆ្នាំ​២០២៥ និង​ទេសចរ​ផ្ទៃ​ក្នុង​ ១១ លាន​នាក់​នៅ​ឆ្នាំ ២០២៣។

លោក ណូ លីដា អគ្គនាយករង​នៃ​សាជីវកម្ម​ធានា​ឥណទាន​កម្ពុជា បាន​ឱ្យ​ដឹង​ថា អាជីវកម្ម​ទេសចរណ៍ ត្រូវ​បំពេញ​នូវ​គុណវុឌ្ឍិ​មួយ​ចំនួនដូចជា៖ ១).អាជីវកម្ម​ដែល​មាន​ម្ចាស់​ភាគហ៊ុន​ជា​សញ្ជាតិ​ខ្មែរ (កាន់កាប់​ភាគហ៊ុន​លើស​ពី ៥០%), ២).អាជីវកម្ម​ដែល​បាន​ចុះ​បញ្ជី​ជាមួយអាជ្ញាធរ​ពាក់ព័ន្ធ ឬ​មិន​បាន​ចុះ​បញ្ជី​ត្រូវ​តែ​ចុះ​បញ្ជី បន្ទាប់ពី​ទទួល​បាន​ការ​ធានា​ឥណទាន​និង ៣).អាជីវកម្ម​ដែល​មាន​លទ្ធភាព​សងត្រលប់​វិញ។

លោក​បាន​បញ្ជាក់​បន្ថែម​ថា៖«ដើម្បី​ទទួល​បាន​លិខិត​បញ្ជាក់​ការ​ធានា​ឥណទាន (Letter of Guarantee-LG) អាជីវកម្ម ទេសចរណ៍​អាចធ្វើការ​ទំនាក់ទំនង​ទៅ​គ្រឹះស្ថាន​ហិរញ្ញ​វត្ថុ​ចូលរួម ដើម្បី​ស្នើសុំ​កម្ចី​ក្នុង​គម្រោង​សហហិរញ្ញប្បទាន​ស្តារ​និង​ជំរុញ​កំណើន​ទេសចរណ៍ ដោយ​គ្រាន់តែ​បញ្ជាក់​ថា​អាជីវកម្ម​មាន​តម្រូវ​ការ​ស្នើសុំ​លិខិត​ធានា​ឥណទាន​ឬ​ទេ? ក្រោម​ការ​អនុម័ត​កម្ចី គ្រឹះស្ថាន​ហិរញ្ញ​វត្ថុ​ចូលរួម​នឹង​ដាក់​ពាក្យ​ស្នើ​សុំ​មកសាជីវកម្ម​ធានា​ឥណទាន​កម្ពុជា ដើម្បី​ផ្តល់​លិខិត​ធានា​ឥណទាន​ជា​ការ​ស្រេច។

គិតត្រឹម​ថ្ងៃទី៣១ ខែ​ឧសភា ឆ្នាំ​២០២២ មាន​មូលដ្ឋាន​អាជីវកម្ម​ទេសចរណ៍​ទូទាំង​ប្រទេស​ចំនួន ១១៩៦​ទីតាំង ដែល​បាន​បិទ/ផ្អាក​ដំណើរការ ក្នុង​នោះ​មូលដ្ឋាន​អាជីវកម្ម​ទេសចរណ៍​ចំនួន ៤៩៨ ទីតាំង​បាន​បិទទ្វារ និង ៦៩៨​ទីតាំង បាន​ផ្អាក​ដំណើរការ​បណ្តោះ​អាសន្ន ដែល​ធ្វើឱ្យ​បាត់បង់​ការងារ​ផ្ទាល់​ក្នុង​វិស័យ​ទេសចរណ៍ សរុប​ចំនួន ២១ ៩៩៨​នាក់៕

អត្ថបទគួរចាប់អារម្មណ៍